Okuruga 1
1
Enaku za Isiraeli omuli Misiri
1Aga nigo mabara ga batabani ba Isiraeli abaizire nawe Misiri, buli muntu n'omutungogwe: 2Rubeni, Simeoni, Levi na Yuda, 3Isakari, Zabuloni na Benjamini, 4Dani, Nafutali, Gadi na Asheri. 5Oruzaro rwona rwa Yakobo bakaba bali bantu nshanju; Yozefu akaba yatwire Misiri. 6Aho Yozefu afa, na barumunabe bona, n'omuzarwa gulinya gwona. 7Kyonkai baijukuru ba Isiraeli bakagira oruzaro, bakanya muno; mara bayeyongera bagira amani gangi muno munonga; kityo ensi bagijura.
8Aho agyaho omukama omuhya omuli Misiri ayabaire atalikumanya Yozefu. 9Agambira abantube ati, “Lea, Abaisiraeli bangi muno mara nibatukiza muno amani. 10Mwije tubarabe omu magezi bataija bakakanya, aha rw'okuba katwakugwerwa endashana bakwema n'ababisha baitu baturashanisa mara bairuka baruga omu nsi egi.” 11Aha rw'ekyo babateraho abanyampara babashase n'emijarabo esikiire; bombekera Farao ebigo by'esitoa, Pitomu na Ramesesi. 12Kyonkai orwo bashasibwaga okushagaho baba nirwo bakanya okushagaho n'okwemalira ensi yona. Abamisiri batina muno Abaisiraeli. 13Kityo bakoza Abaisiraeli emilimo y'ensika, 14babata aha kahangahango nibabakoza emilimo y'omujarabo, nibabajungisa eitaka n'okubabumbisa amatofari, n'engeli zona z'emilimo y'omu ndimiro; emilimo yabo na babakoza ey'ensika.
15Aho omukama wa Misiri agambira abazaza Abaheburania, omoiho eibara akaba nayetwa Shifura n'ondijo nayetwa Pua. 16Ati, “Orwo muraba nimuzaza Abaheburania, aha butebe bw'okuzaliraho, k'ali mwojo, mumwite; kyonkai k'araba ali mwisiki mutamwita.” 17Kyonkai abazaza batina Ruhanga, tibakozire nk'okwo omukama wa Misiri yabaragiire, abana b'abojo tibabaisire. 18Aho omukama wa Misiri ayeta abazaza, ababaza ati, “Kubaki mukozire eki, abaana bojo mutabaisire?” 19Abazaza bagambira Farao bati, “Abaheburania tibalikushusha Bamisiri, aha rw'enshonga bonene baina amani gangi nibazara omuzaza atakabagobire.” 20Aho Ruhanga asingira abazaza; mara abantu abo bakanya bagira amani gangi muno. 21Aha rw'okuba abazaza bakatina Ruhanga, yabaha omugisha gw'oruzaro. 22Aho Farao aragira abantube bona ati, “Buli mwana mwojo arazarwa omu Baheburania mumutokye omuli Naili, kyonkai omwana mwisiki mutamwita.”
Currently Selected:
Okuruga 1: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
