Okuruga 2

Okuzarwa kwa Musa

1Aho Omulevita omoi agenda ashwera Omulevitakazi. 2Omukazi atwara enda azara omwana w'omwojo; kayaboine okwo yabaire ali murungi, amusheleka emyezi eshatu. 3Kayabaire atakishobora kumusheleka kushagaho, amuletera ekitukuru ky'ebifunjo, akihomesa eisha n'elami, akitamu omwana ogwo akiteka omu rufunjo aha rukungu rw'omwiga. 4Munyanya ayemelera harai kake kuleba okw'araba. 5Aho muhara wa Farao asongoka aha mwiga kwoga, abazanabe basigara nibagendagenda aha mwiga. Wenene abona ekitukuru omu rufunjo, atuma omuzanawe kukileta. 6Kayakibundwire abona akana, leba akana kakaba nikalira. Akakwatirwa ekisha, agamba ati, “Akana aka k'Abaheburania.” 7Aho munyanya omwana abaza muhara wa Farao ati, “Ngye nkwetere omulezi Omuheburania akulerere omwana ogu?” 8Muhara wa Farao amugambira ati, “Iroko!” Aho omwisiki agenda ayeta nyina mwana. 9Muhara wa Farao amugambira ati, “Otware omwana ogu omundelere inye ndakuhera.” Aho omukazi atwara omwana amulera. 10Omwana akura, amuletera muhara wa Farao, aba mutabani; amuruka eibara amweta Musa, aha rw'enshonga akagamba ati, “Kuba nkamwihya omu maizi.”

Musa nasingirwa Midiani

11Ekiro kimoi ka Musa yabaire yakuzire, akyalira abarumuna Abaheburania, abona enaku zabo, abona Omumisiri natera Omuheburania w'eihangalye. 12Alebaleba oku n'oku tabona muntu, aho aita Omumisiri ogwo amusheleka omu mushenye. 13Bukeire kayashohoire aheru, abona Abaheburania babili nibarwana; abaza ayabaire naboya, ati, “Kubaki notera mutahi wawe?” 14Ogu amuhorora ati, “N'ohai akutaireho kututwara okaturamura? Noyenda kunyita nk'okwo oisire Omumisiri?” Aho Musa atina atekeleza ati, “Mazimakwo ekigambo ekyo kyamanyikire.” 15Farao kayakihuliire ahiga kumwita. Kyonkai Musa amwiruka, atura omu nsi ya Midiani.

16Omukuhani wa Midiani akaba aina abahara mushanju. Ekiro kimoi Musa ashuntamire bwatana aha iziba baija bataha amaizi, baijuza enyato kwoshera obuhyo bwa ishebo bw'entaama. 17Abashumba baija bababinga, kyonkai Musa ayemelera abajuna, boshera obuhyo bwabo bw'entaama. 18Orwo baizire ahali ishebo, Reweli, ababaza ati, “Byaba bitai kir'eki kwija bwangu?” 19Bamushubamu bati, “Omumisiri yatwihya omu mikono y'abashumba, nangu yatutahira n'amaizi, yayoshera obuhyo.” 20Abaza abahara abo ati, “Ali nkahai? Kubaki omushaija ogwo mwamusigayo? Mumwete alye ekyakulya.” 21Musa asanirwa kutura n'omushaija ogwo; na wenene asiigira Musa omuhara Sipora. 22Amuzalira omwana w'omwojo, Musa amweta eibara Gerishomu; aha rw'okuba akagamba ati, “Mbaire mufuruki omu ihanga eli.”

Ruhanga naijuka Isiraeli

23Ebiro kabyakeire bingi, omukama wa Misiri afa. Abaisiraeli omu bwiru bwabo obwo bataga, bataka kubona obujuni. Okutaka kwabo okwo kugoba ahali Ruhanga. 24Ruhanga ahulira okutaka kwabo, aijuka endaganoye na Aburahamu, Isaka na Yakobo. 25Abona enaku z'Abaisiraeli abaganyibwa.

Currently Selected:

Okuruga 2: RHAY01

Highlight

Compare

Copy