Okuruga 3

Ruhanga nayeta Musa

1Musa akaba nalisa obuhyo bwa ishezara, Yetiro, omukuhani wa Midiani. Atwara obuhyobwe rubaju orw'obugwaizoba bw'eirungu, agoba Horebu, Eibanga lya Ruhanga. 2Omumalaika w'Omukama amubonekera omu rushashwe rw'omuliro ayemire omu kishaka. Musa abona okwo ekishaka kilikuhya, kyonkai kitalikusosotoka. 3Agamba ati, “Kangye aha rubaju mbone eihano lihango eli. Kubaki ekishaka kitalikusosotoka?” 4Orwo Omukama yaboine okwo yagya aha rubaju kuleba, Ruanga amweta ayemire omu kishaka ati, “Musa, Musa!” Ayetaba ati, “Kaboneke Rugaba!” 5Amugambira ati, “Otagoba haihi, jura enkaito zawe omu maguru aha rw'okuba omwanya ogw'oyemeleireho nsi ntakatifu.” 6Ashuba ati, “Inye ndi Ruhanga wa sho, Ruhanga wa Aburahamu, Ruhanga wa Isaka mara Ruhanga wa Yakobo.” Musa abunda obusobwe, akatina kuleba Ruhanga.

7Aho Omukama agamba ati, “Mboine enaku z'abantu bange abali Misiri, nahulira okutaka kwabo aha rw'enshonga y'abanyampara babo, nimanya obushasi bwabo, 8naija kubaihya omu mikono y'Abamisiri, n'omu nsi egyo, mbagobye omu nsi nungi eyeyanjaire, ensi elikusheshekana amata n'obwoki; mbali Abakanaani, n'Abahiti, n'Abaamori, n'Abaperizi, n'Abahivi n'Abayebusi batura. 9Okutaka kw'Abaisiraeli kungobire, nabona obushasi obwo Abamisiri balikubashasa. 10Mbwenu, ija, nkutume ahali Farao, ogye oihye abantu bange Abaisiraeli Misiri.” 11Kyonkai Musa agambira Ruhanga ati, “Waitu, inye ndi ohai kugya ahali Farao kwihya Abaisiraeli Misiri?” 12Ruhanga amugambira ati, “Turaba tuli hamoi, aka niko karaba kabonero ahali iwe, okwo nakutuma; k'oraba waihire abantu Misiri, muranfukamiraga aha ibanga eli.”

Ruhanga namanyisa Musa eibaralye

13Aho Musa abaza Ruhanga ati, “Lea, Kandagoba Abaisiraeli nkabagambira nti, ‘Ruhanga wa baisheinywe yabantumaho,’ bakambaza bati, ‘Eibaralye n'ohai?’ Mbagambire ntai?” 14Ruhanga amuhorora ati, “N'INYE ASINGIRE.” Ashuba amugambira ati, “Ogambire Abaisiraeli oti, ‘ASINGIRE yabantumaho.’ 15Oti, ‘Omukama Ruhanga wa baisheinywe, Ruhanga wa Aburahamu, Ruhanga wa Isaka mara Ruhanga wa Yakobo yabantumaho,’ eli nilyo ibara lyange eirai n'eirai, mara nikwo ndaijukwagwa ntyo omu mizarwa yona. 16Iroko ohikanise abebembezi ba Isiraeli obagambire oti, ‘Omukama Ruhanga wa baisheinywe, Ruhanga wa Aburahamu, wa Isaka na Yakobo, yambonekera, nagamba ati, “Mbagobireho nabona ebyo mulikukolerwa omuli Misiri; 17nindagana okwo ndabaihya omu naku za Misiri, nkabagobya omu nsi y'Abakanaani, Abahiti, Abaamori, Abaperizi, Abahivi n'Abayebusi, ensi elikusheshekana amata n'obwoki.” ’ 18Barahulira eby'orabagambira, iwe n'abebembezi ba Isiraeli mugende aha mukama wa Misiri mumugambire muti, ‘Omukama Ruhanga w'Abaheburania atwesire, mbwenu nitukutagiliza otutaishure tugende orugendo rw'ebiro bishatu omw'irungu, tushobore kutambira Omukama Ruhanga waitu ekitambo!’ 19Nimanya okwo omukama wa Misiri atabataishure kugenda, k'atakakirwe na mani. 20Kityo inye ndakoza obushobora bwange mbonabonyie Misiri, ngihe ekibonabonyio ekilikutinisa; ahanyuma arabataishura mugende. 21Ndagilira abantu aba ekisha omu maisho g'Abamisiri; mara orwo muragenda timugende bushai. 22Buli mukazi ayenze mutahiwe n'ashuzire omwe emilengyo y'efeza, n'ey'ezahabu, n'ebijwaro, mubijweke batabani banyu na bahara banyu. Nikwo muranyaga mutyo Abamisiri.”

Currently Selected:

Okuruga 3: RHAY01

Highlight

Compare

Copy