Okuruga 4

Musa nahabwa obushobora bw'ebitangazo

1Aho Musa ahorora ati, “Kyonkai tibanyikilize anga kuhulira ebyo ndabagambira, nibaija kugamba bati, ‘Omukama takubonekeire.’ ” 2Omukama amubaza ati, “Okweteki ekyo?” Ahorora ati, “Nkoni.” 3Ruhanga ati, “Ginage ahansi.” Musa aginaga ahansi, ehinduka njoka; agiiruka. 4Kyonkai Omukama amugambira ati, “Imukya omukono ogikwate omukira,” Musa aimukya omukono agikwata, ehinduka nkoni okwo akagikwete; 5“Babone kwikiliza okwo Omukama Ruhanga wa baishebo, Ruhanga wa Aburahamu, Ruhanga wa Isaka na Ruhanga wa Yakobo yakubonekerakwo.” 6Omukama ashuba amugambira ati, “Funya omukono ogugarure omu kanzu.” Musa afunya omukonogwe agugarura omu kanzu aha kifuba. Kugya kugushohoza gukaba gwabembire, nigwera nk'eseruji. 7Aho Ruhanga agamba ati, “Funya omukono ogugare omu omu kanzu aha kifuba.” Musa agufunya agugarura omu kanzu, kugya kugushohoza gukaba gwakizire gwashushaniraine n'omubiligwe. 8Ruhanga agamba ati, “Kabaraba batakwikiliize, anga kwikiliza akabonero ka mbere, baraikiliza akabonero aka nyuma. 9Kabaraba bataikiliize na bubonero obu bwombili anga kuhulira kwo wabagambira, oihye amaizi omuli Naili ogasheshe aha nsi; gahinduke bwamba.”

10Kyonkai Musa agambira Omukama ati, “Waitu Mukama wange, inye tindi ngambagambi, ebe nyeigoro anga ijo, anga kwema okagambire n'omwiru wawe; inye ngamba mpora ngira n'akaneta.” 11Omukama amubaza ati, “N'ohai ayahaire omuntu akanwa? N'ohai amuhindura mutita anga mwigazi w'amatwi, anga akamubonesa, anga akamuhindura mpume? T'inye Omukama? 12Mbwenu aha rw'ekyo genda, ndakujuna ogambe, nkwegese n'eby'oragamba.” 13Kyonkai Musa ati, “Waitu Mukama wange, ninkutagiliza batume omuntu ondijo.” 14Aho Omukama amutamwa, agamba ati, “Aroni murumuna wawe Omulevita taliho? Nimanya okwo alikushobora kugambage; mara lea nashohora kukuchwekera, k'arakubona arashemelerwa aha mutima. 15Iwe omugambire, mara omuragilire eby'aragamba. Nywembi ndabaha eby'okugamba mbagambire n'ebyo murakora. 16Arakugambilira abantu, agambe omw'ibara lyawe. Kandi iwe omuli wenene orashusha Ruhanga. 17Okwate enkoni egi, niyo orakoza ebitangazo.”

Musa nagaruka Misiri

18Musa agaruka owa Yetiro ishezara, amugambira ati, “Ninkushaba ontaishure ngaruke Misiri omu banyaruganda bange ndebe nka bakyarora.” Yetiro amugarukamu ati, “Ogende n'emilembe.” 19Aho Omukama agambira Musa omuli Midiani ati, “Garuka Misiri, aha rw'okuba bona abakuhiganisaga kukwita bafire.” 20Musa akwata mukaziwe n'abatabani, abakuubisa aha ndogobe, agaruka Misiri; agenda akwete enkoni eyo Ruhanga yamugambiire.

21Omukama agambira Musa ati, “K'orashuba Misiri oyekomye kukolera Farao ebitangazo byona ebyo nakuhera obushobora bw'okubikora. Kyonkai ndamugumanganisa omutima, tataishure bantu. 22Ogambire Farao oti, ‘Omukama nagamba ati, Isiraeli aba mutabani wange w'omuzigaijo, 23mara ninkugambira nti, Otaishure mutabani wange agende kunfukamira, k'orayanga kumutaishura akagenda, ndaita mutabani wawe w'omuzigaijo.’ ”

24Omu rugendo mbali yabaire akambikire Omukama atanganwa Musa ahiga kumwita. 25Aho Sipora akwata eibare ly'obwogi atahiri omutabani, akashunshu akakwasa Musa aha bushaijabwe, nagamba ati, “Mazima oli ibanye ayanyebohoire.” 26Aho Omukama amuleka. Nikyo Sipora yagambire ati, “Oli ibanye ayanyebohoire.”

27Omukama agambira Aroni ati, “Ogende omw'irungu ochwekere Musa.” Agenda kumuchwekera, amutanganwa aha Ibanga lya Ruhanga, amunywegera. 28Musa agambira Aroni eby'Omukama yabaire amutumire byona n'ebitangazo byona ebyo yabaire amuragire kukora. 29Aho bombili bagenda bahuruza abebembezi b'Abaisiraeli. 30Aroni abagambira eby'Omukama yabaire agambire Musa, mara Musa wenene abakolera ebitangazo ebyo. 31Aho abantu baikiliza; kandi kabahuliire okwo Omukama yabasingiire n'okwo yabaire yaboine enaku ezo babaire balimu, bainama bafukama.

Currently Selected:

Okuruga 4: RHAY01

Highlight

Compare

Copy