Okuruga 5

Musa na Aroni omwa Farao

1Ahanyuma Musa na Aroni bagenda owa Farao bamugambira bati, “Omukama Ruhanga wa Isiraeli nagamba ati, ‘Otaishure abantu bange bagende kunkolera ekiro kikuru omw'irungu.’ ” 2Kyonkai Farao agamba ati, “Omukama ogwo n'ohai inye kumuhulira nkataishura Abaisiraeli? Inye Omukama ogwo tindikumumanya, mara kandi Abaisiraeli tindikubataishura.” 3Musa na Aroni bamuhorora bati, “Ruhanga w'Abaheburania atubonekeire. Iwe otuleke tugende orugendo rw'ebiro bishatu omw'irungu, tutambire Omukama Ruhanga waitu ebitambo, atakwija akatunaga omu kibundo anga omu ndashana.” 4Kyonkai omukama wa Misiri abagambira ati, “Iwe Musa na Aroni, kubaki nimwihya abantu aha milimo? Mugarukeyo mukore. 5Nimubona okwo abantu aba bali bangi nimushuba nimubanafaza, nimubaihya aha milimo yabo.”

6Kir'ekyo kyonene Farao aragira abanyampara b'embaga n'abalebelezi babo ati, 7“Mutakiha bantu binyasi bya kukoza matofari nk'orwa mbere; mubaleke bagende babyehigire. 8Kandi amatofari mubakoze gangi nk'obubere; aha rw'okuba banafu. Tibaina mulimo gumazire nikyo balikwombera bati, ‘Tugende kutambira Ruhanga waitu ekitambo.’ 9Mubahe emilimo egumire kushagaho, bahendeke, mara baleke kugyaho kuhuliliza ebishuba.”

10Aho abanyampara n'abalebelezi bashohora bagambira abantu abo bati, “Farao nagamba ati, ‘Timbahe binyasi. 11Mugende inywe nywenene mwehigire ebinyasi hona hona mbali murabishanga; kandi amatofari mubumbe gangi nk'obubere.’ ” 12Kityo abantu bemalira Misiri yona kushombokya ebishagate aha mwanya gw'ebinyasi. 13Abanyampara bakaliliza bati, “Mugobye amatofari aga buli kiro, nk'orwo ebinyasi bibaire biliho.” 14Abanyampara ba Farao batera abalebelezi abo babaire bataireho, nibababaza bati, “Kubaki mutagobya rubara rwanyu rwona rwa matofari nk'obubere?”

15Nikwo abalebelezi abo b'Abaisiraeli kugya bakatakira Farao bati, “Kubaki notugir'oti? 16Tibalikutuha binyasi, nibashuba nibatugambira bati, ‘Mubumbe amatofari!’ Nibashuba nibatutera; kyonkai omushango guli omu bantu bawe.” 17Farao nawe ati, “Muli banafu, muli banafu; nikyo mulikwekwatiliza muti, ‘Tugende tutambire Omukama ekitambo.’ 18Iroko mugaruke aha mulimo, ebinyasi tibalikubibaha, kandi orubara rw'amatofali rwonene rwonene murugobye.” 19Aho abalebelezi b'Abaisiraeli babona okwo bali omu kabi, orwo Farao yabagambire ati, “Orubara rwanyu rw'amatofali orwa buli kiro murugobye rwona.” 20Orwo barugiire owa Farao bagoba ahali Musa na Aroni, bakaba babalinzire. 21Babagambira bati, “Omukama yabona ebyo mwakora. Ababonabonyie aha rw'okuba n'inywe mwatubonesa enaku ahali Farao n'abaramatabe. Mwabaha mbali barayekwasa kutwita.”

Musa omu mashoberwa

22Aho Musa ashuba aha Mukama agamba ati, “Waitu Mukama, kubaki wakora kubi abantu bawe aba? Kubaki ozilize kuntuma? 23Aha rw'okuba kwema nyizire kugambira Farao omw'ibara lyawe, akozire kubi abantu aba, mara toina ky'okozire kubajuna nakati!”

Currently Selected:

Okuruga 5: RHAY01

Highlight

Compare

Copy