Okuruga 6
6
1Aho Omukama agambira Musa ati, “Mbwenu orabona ekyo ndakora Farao. Ndamugimba ataishure abantu bange. Ndamugimba ababinge omu nsiye.”
Ruhanga nagumisa Musa
2Ruhanga agambira Musa ati, “Omukama n'inye. 3Nkabonekera Aburahamu, Isaka na Yakobo; mba Ruhanga Rushoborabyona, kyonkai eibara lyange, Mukama, tinalibamanyisize. 4Kwakwo nkaragana nabo okwo ndibaha ensi ya Kanaani, ensi eyo baturagamu bali bafuruki. 5Kandi nahuliire okutaga kw'Abaisiraeli abo Abamisiri balikuhindura bairu, mara naijuka endagano yange. 6Aha rw'ekyo ogambire Abaisiraeli abo oti, ‘Omukama n'inye, ndabaihya omu bwiru bw'Abamisiri. Ndakoza obushobora bwange bungi mbahe ekibonabonyio ky'amani kandi inywe mbarokore. 7Ndabahindura bantu bange, inye mbe Ruhanga wanyu; mara muramanya okwo ndi Mukama Ruhanga wanyu, orwo ndaba nabaihire omu bwiru bw'Abamisiri. 8Ndabatwara omu nsi eyo nanahiire kuha Aburahamu, Isaka na Yakobo; ndagibaha mugilye. N'inye Mukama.’ ” 9Musa agambira atyo Abaisiraeli; kyonkai tibamwikiliize enshonga bakaba bayenanukire aha rw'obwiru bubi obwo babaire balimu.
10Aho Omukama agambira Musa ati, 11“Ogende ogambire Farao omukama wa Misiri ataishure Abaisiraeli baruge omu nsiye.” 12Kyonkai Musa amugambira ati, “Abaisiraeli tibanyikilize; aho Farao aranyikiliza atai inye omuntu atamanya kugamba?” 13Kyonkai Omukama aragira Musa na Aroni ati, “Mugambire Abaisiraeli na Farao omukama wa Misiri okwo nabaragira kwihya Abaisiraeli Misiri.”
Entabuko ya Musa na Aroni
14Aba nibo bakuru b'amahiga gabo: Batabani ba Rubeni omuzigaijo gwa Isiraeli ni Hanoki, Palu, Hesironi na Karimi; aga nigo mahiga agalikutabuka ahali Rubeni. 15Batabani ba Simeoni ni Yemweli, Yamini, Ohadi, Yakini, Sohari na Shauli owo yazaire aha Mukanaanikazi; aba nibo bagurusi b'ebika by'Abasimeoni. 16Aga nigo mabara ga batabani ba Levi kuhonderana n'emizarwa yabo: Gerishoni, Kohati na Merari. Levi akarora emyaka kikumi mwo makumi gashatu na mushanju. 17Batabani ba Gerishoni ni Libuni na Shimei kuhonderana n'ebika byabo. 18Batabani ba Kohati ni Amuramu, Izihari, Heburoni na Uzieli. Kohati akarora emyaka kikumi mwo makumi gashatu n'eshatu. 19Batabani ba Merari ni Mahuli na Mushi. Ebi nibyo bika by'Abalevita kuhonderana n'emizarwa yabo. 20Amuramu ashwera Yokebedi ishenkazi, amuzaraho Aroni na Musa. Amuramu akarora emyaka kikumi mwo makumi gashatu na mushanju. 21Batabani ba Izihari ni Kora, Nefegi na Zikiri. 22Kandi batabani ba Uzieli ni Mishaeli, Elisafani na Sitiri. 23Aroni ashwera Elisheba muhara wa Aminadabu, munyanya Nashoni amuzaraho Nadabu, Abihu, Eleazari na Itamari. 24Batabani ba Kora ni Asiri, Elikana na Abiasafu; ebi nibyo bika by'Abakora. 25Eleazari mutabani wa Aroni ashwera muhara wa Pusieli; amuzaraho Finehasi. Aba nibo bagurusi b'ebika by'Abalevita nk'okwo ebika byabo bili.
26Aba nibo Aroni na Musa abo Omukama yagambire ati, “Mwihye Abaisiraeli Misiri kuhonderana n'ebika byabo.” 27Nibo bonene aba abagambire Farao omukama wa Misiri kutaishura Abaisiraeli kuruga Misiri.
Ruhanga nahangira Musa na Aroni
28Kiro ekyo Omukama yagambire Musa omuli Misiri, 29ati, “Omukama n'inye, ogambire Farao omukama wa Misiri ebyo ndikukugambira.” 30Musa amubaza ati, “Lea, Inye tindi ngambagambi; aho mbwenu Farao aranyikiliza atai?”
Currently Selected:
Okuruga 6: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
