Okuruga 7
7
1Omukama agambira Musa ati, “Lea, nakushushanisa Ruhanga ahali Farao, kandi Aroni murumuna wawe niwe aramukugambilira. 2Ogambe byona ebyo ndikukuragira; kandi Aroni murumuna wawe aragambira Farao ataishure Abaisiraeli baruge omu nsiye. 3Kyonkai ndagumanganisa omutima gwa Farao. N'orwo ndakora obubonero n'ebitangazo bingi omuli Misiri, 4tibaikiliize. Aho nirwo ndabonabonyia Misiri nkaihyamu abantu bange Abaisiraeli kuhonderana n'enganda zabo. 5Aho Abamisiri baramanya okwo inye mba Mukama, orwo ndabonabonyia Misiri nkaihyamu Abaisiraeli bakabarugamu.” 6Musa na Aroni bakora okwo Omukama yabaragiire. 7Orwo balikugambira Farao ebyo, Musa akaba aina emyaka kinana, kandi Aroni aina emyaka kinana n'eshatu.
Ebibundo bya Misiri
8Omukama agambira Musa na Aroni ati, 9“Ka Farao arabagambira ati, ‘Mugire eky'amani ekyo mwakora mweyoleke okwo mulikugamba amazima,’ aho ogambire Aroni oti, ‘Kwata enkoni yawe ogishabure ahansi omu maisho ga Farao, ehinduke njoka.’ ” 10Bombili bagenda ahali Farao bakora nk'okwo Omukama yabaire abaragiire; Aroni ashabura enkoniye ahansi omu maisho ga Farao n'abaramatabe, ehinduka njoka. 11Aho Farao ayeta abamanyi n'abarogi n'abakonikoni ba Misiri, nabo bakora batyo omu bubuya bwabo beshelekire. 12Ahakuba buli muntu akashabura enkoniye ahansi, zona zaba njoka. Enkoni ya Aroni emira ezabo. 13Kyonkai Farao agumangana omutima, tiyabaikiliize; nk'okwo Omukama yabaire agambire.
Ekibundo kya mbere: Amaizi nigahinduka bwamba
14Aho Omukama agambira Musa ati, “Farao nagumangana omutima, nayanga kutaishura abantu bange kabagenda. 15Ogende otanganwe nawe bwankya, orwo araba nagya Naili, omulindilire aha rukunguru rw'omwiga, mara ogende n'enkoni ebaire ehindukire njoka, 16omugambire oti, ‘Omukama Ruhanga w'Abaheburania antumire ahali iwe, nagamba ati, Otaishure abantu bange bagende, bagye omw'irungu banfukamire, kyonkai tolikwikiliza. 17Mbwenu aha nirwo oramanya okwo Omukama aba inye: Amaizi ga Naili ndagateza enkoni egi eyo nkwete gahinduke bwamba, 18enfuru zamwo zife, Naili enuke, kandi Abamisiri baranuga kunywa amaizi gayo.’ ” 19Omukama ashuba agambira Musa ati, “Ogambire Aroni oti, ‘Kwata enkoni yawe, oimukye omukono aha maizi ga Misiri, aha miiga yabo, enyato zabo, n'ebitunga n'entunga zabo zona z'amaizi, bihinduke bwamba. Misiri yona ebe bwamba, n'amaizi agali omu bikwato by'emiti n'omu by'amabare garahinduka bwamba.’ ”
20Musa na Aroni bagira nk'okwo Omukama yabaragira. Omu maisho ga Farao n'abaramatabe Aroni aimukya enkoni atera amaizi ga Naili, gona gona gahinduka bwamba. 21Enfuru zamwo zifa; Naili enuka, kityo Abamisiri baba batakinywa maizi gayo; Misiri yona eba bwamba. 22Kyonkai abakonikoni ba Misiri nabo bakora batyo omu bubuya bwabo beshelekire; Farao aguma agumangaine omutima. Tiyabaikiliize, nk'okwo Omukama yabaire agambire. 23Agaruka omwe, nangu n'eki tiyakitaire aha mutima. 24Abamisiri bashokora ebina aha nkunguru za Naili nibahiga amaizi g'okunywa, tibashoboire kunywa maizi gayo.
25Ebiro mushanju bihingura kwema orwo Omukama yateire Naili.
Currently Selected:
Okuruga 7: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
