Okuruga 8

Ekibundo kya kabili: Ebikere

1Omukama agambira Musa ati, “Ogende omwa Farao omugambire oti, ‘Omukama nagamba ati, Otaishure abantu bange bagende banfukamire. 2K'orayanga kubataishura ensi yawe yona ndagibunza ebikere; 3Naili eraijura ebikere ebyo, birugemu bije omwawe, bitahe omu kitabo kyawe, bigye n'aha kitabo kyawe, n'omu maju g'abaramata bawe, n'ag'abantu bawe, n'omu byoto byawe n'omu Pakuli zawe ez'okukandiramu engano. 4Bikukuube, n'abantu bawe bibakuube n'abaramata bawe bona.’ ” 5Omukama ashuba agambira Musa ati, “Ogambire Aroni oti, ‘Kwata enkoni yawe ogimukye aha miiga, aha nyato n'aha ntunga, okuubise ensi ya Misiri ebikere!’ ” 6Aho Aroni aimukya enkoni aha maizi ga Misiri; ebikere bitemba bibunda ensi. 7Kyonkai abakonikoni nabo bakora batyo omu bubuya bwabo beshelekire, baleta ebikere omu nsi ya Misiri.

8Farao ayeta Musa na Aroni abagambira ati, “Mushabe Omukama atwihyeho ebikere; abantube ndabataishura bagye bamutambire ekitambo.” 9Musa agambira Farao ati, “Iwe obe niwe ondagira orwo ndakushabira, iwe hamoi n'abaramata bawe n'abantu bawe. Aho birabarugaho, biruge n'omu maju ganyu, bisigare Naili mwonkai.” 10Farao agamba ati, “Nyenkya.” Musa agamba ati, “Okwo wagamba nikwo, nirwo oramanya okwo hatabayo ashusha Mukama Ruhanga waitu. 11Ebikere birakurugaho, biruge n'omwawe n'omu maju g'abaramata bawe, bisigare Naili mwonkai.” 12Aho Musa na Aroni baruga ahali Farao; Musa ashaba Omukama kushubyayo ebikere; nk'okwo yabaire aikilijainyie na Farao. 13Omukama akorakwo kuhonderana n'ekigambo kya Musa; ebikere bifa omu maju n'omu bibuga n'aheru. 14Babishombokya entumo, ensi enuka chuchuchu. 15Kyonkai Farao kayaboine okwo habaho akabu, agumangana omutima, aba atakibaikiliza, nk'okwo Omukama yabaire agambire.

Ekibundo kya kashatu: Enda

16Omukama agambira Musa ati, “Ogambire Aroni oti, ‘Imukya omukono otere echuchu ehinduke nda omuli Misiri yona.’ ” 17Bagira batyo. Aroni aimukya enkoniye atera echuchu ehinduka nda, zilya abantu n'ebigunju; echuchu yona omuli Misiri ehinduka nda. 18Abakonikoni balenga omu bubuya bwabo beshelekire kuleta enda, kyonkai tibashoboire. Kityo enda zilya omuntu n'ekigunju. 19Abakonikoni bagambira Farao bati, “Eki kyakorwa Ruhanga.” Kyonkai Farao wenene aguma agumangaine omutima, tiyaikiliize, nk'okwo Omukama yabaire agambire.

Ekibundo kya kanai: Enshwera

20Aho Omukama agambira Musa ati, “Oimuke bwankya karai, otanganwe Farao orwo araba nagya Naili, omugambire oti, ‘Omukama nagamba ati, Otaishure abantu bange bagye banfukamire. 21K'otabataishure, iwe n'abaramata bawe n'abantu bawe, ndabasindikira emijumbi y'enshwera; amaju gawe n'ag'Abamisiri gaijure, kutyo n'ensi eyo bemeleireho. 22Kyonkai kir'ekyo ndashorora ensi ya Gosheni, mbali abantu bange balikutura, emijumbi y'enshwera tebeyo; oije omanye okwo omu nsi omu Omukama aba inye. 23Kityo abantu bange ndabatanurana n'abawe. Ekitangazo ekyo kirabaho nyenkya.’ ” 24Mara Omukama akorakwo. Emijumbi mihango y'enshwera eija omwa Farao n'omu maju g'abaramatabe, zibunda Misiri yona, ensi esisikara aha rw'enshonga y'enshwera ezo.

25Aho Farao ayeta Musa na Aroni abagambira ati, “Mugende mutambire Ruhanga wanyu ekitambo omu nsi egi.” 26Kyonkai Musa agamba ati, “Tikibe kirungi kugira tutyo, aha rw'okuba turatambira Omukama Ruhanga waitu ebihongo eby'Abamisiri babona bili binyamunuge, tibatuteze mabare? 27Nituragirwa kugenda orugendo rw'ebiro bishatu omw'irungu kutambira Omukama Ruhanga waitu nk'okwo aratuhangira.” 28Aho Farao agamba ati, “Ndabataishura mugende mutambire Omukama Ruhanga wanyu ekitambo omw'irungu; ekiliho mutakugenda harai muno. Munshabire.” 29Aho Musa agamba ati, “Lea, Inye nakurugaho nashohora, ndashaba Omukama, emijumbi y'enshwera nyenkya ekurugeho, eruge n'aha baramata bawe n'abantu bawe; ekiliho otatulemba rundi kwanga kututaishura kugya kutambira Omukama.” 30Aho Musa aruga ahali Farao aturuka ashaba aha Mukama. 31Omukama akora nk'okwo Musa yashaba; aihya emijumbi y'enshwera ahali Farao, n'aha baramatabe n'aha bantube, tihasigaireho n'emoi. 32Kyonkai n'eli kwakwo Farao agumangana omutima, abantu tiyabataishwire.

Currently Selected:

Okuruga 8: RHAY01

Highlight

Compare

Copy