Okuruga 9

Ekibundo kya katanu: Okufa kw'ebitunganwa

1Omukama agambira Musa ati, “Ogende omwa Farao omugambire oti, ‘Omukama Ruhanga w'Abaheburania nagamba ati, Otaishure abantu bange bagende banfukamire. 2K'orayanga kubataishura okaikara obazimatire, 3ebitunganwa byawe ebili omu malisizo: Efarasi, endogobe, engamia, amahyo g'ente n'ag'entaama, ndabiteza ekibundo ekibi muno. 4Eby'Abaisiraeli arabishorora omu by'Abamisiri, taliho kitunganwa kya Mwisiraeli ekirafa.’ ” 5Omukama agamba orwo kirabaho, ati, “Nyenkya ninkora ekikorwa eki.” 6Aho bukeire Omukama akora atyo, ebitunganwa by'Abamisiri bifa, kyonkai omu bitunganwa by'Abaisiraeli n'ekimoi tikyafire. 7Farao atuma abantu kuleba, bashanga okwo omu bitunganwa eby'Abaisiraeli tihafiremu na kimoi. Kyonkai aikara agumangaine omutima, abantu tiyabataishwire.

Ekibundo kya mukaga: Ebihute

8Omukama agambira Musa na Aroni ati, “Muyore ebikamato by'eijwi omu kyoto, Musa alituntumulire eiguru omu maisho ga Farao. 9Lirahinduka chuchu esesenukire omu nsi yona ya Misiri, lilete ebihute ebilikufumuka, abantu n'ebigunju omu nsi yona ya Misiri bagire ebironda.” 10Bayora eijwi elyo omu kyoto, bemelera omu maisho ga Farao, Musa alituntumulira eiguru, abantu n'ebigunju baterwa ebihute, bifumuka biba bironda. 11Abafumu tibashoboire kwemelera mu maisho ga Musa aha rw'enshonga y'ebihute byabaire bibateire, bikatera n'Abamisiri bona. 12Kyonkai Omukama agumanganisa Farao omutima, tiyabaikiliize, nk'okwo yabaire agambire Musa.

Ekibundo kya mushanju: Orubare

13Omukama agambira Musa ati, “Oimuke bwankya karai oyemelere omu maisho ga Farao, omugambire oti, ‘Omukama Ruhanga w'Abaheburania nagamba ati, Otaishure abantu bange bagende banfukamire. 14Kuba eli ninyija kukusindikira ebibundo iwe n'abaramata bawe n'abantu bawe, oije omanye okwo omu nsi yona taliho n'omoi alikunshusha. 15Enshonga mbwenu aha nakubaire naimukize omukono nakuteize endwara iwe n'abantu bawe, wakubaire wafire ensi yarandukire. 16Kyonkai aha rw'enshonga egi nkulekire buleka kukwoleka obushobora bwange, eiranga lyange limanyike omu nsi yona. 17Iwe okyagilira bantu bange eishaija, tolikubataishura. 18Nyenkya nka mwaha ndagwisa enjura mpango muno ey'orubare, etakabahoga kwema Misiri ebaireho kuhika mbwenu. 19Aha rw'ekyo otume batahye ebitunganwa byawe neby'oinabyo omw'ishwa byona, kuba omuntu n'ekitunganwa ekirashangwa aheru kitakatahire nikija kuterwa orubare kife.’ ” 20Aho omu baramata ba Farao ayatinire ekigambo ky'Omukama, niwe yasingisize abairube akabatahya omu maju akatahya n'ebitunganwa. 21Atayetaireho kigambo kya Mukama akasiga abairube n'ebitunganwabye omw'ishwa.

22Omukama agambira Musa ati, “Imukya omukono ogwolekeize eiguru, enjura y'orubare egwe Misiri yona. Etere omuntu n'ekigunju n'ebimera byona omw'ishwa omuli Misiri yona.” 23Musa aimukya enkoniye agyolekeize eiguru; Omukama ataishura enkuba n'enjura y'orubare n'omuliro bihanantuka omu nsi. Omukama agwisa enjura y'orubare omu nsi ya Misiri. 24Hakabaho enjura y'orubare, egwa n'omuliro nigurabarabya obutaleka. Enjura y'orubare egyo ekaba eli y'amani gangi muno eyabaire etakabahoga omuli Misiri kwema Misiri ebaire ihanga. 25Orubare rutera buli kantu akabaire kali omw'ishwa omuli Misiri yona, rutera omuntu n'ekigunju kwakwo. Rutera buli kimera kyona omw'ishwa, rusinjagulikya emiti yamwo yona. 26Omuli Gosheni mwonkai, mbali Abaisiraeli babaire bali, nimwo rutagobire.

27Aho Farao atumaho, ayeta Musa na Aroni, abagambira ati, “Eli nafakara, Omukama ali omu mazima, inye n'abantu bange tituli mu mazima. 28Mutagilize Omukama; enkuba n'orubare ebyabaho nibimara; inye ndabataishura mugende, timukiikara munu.” 29Musa amugambira ati, “Orwo ndashohora nti omu kigo, ndaimukiza Omukama emikono; enkuba ziralekera, kandi orubare tirugendelere, oije omanye okwo ensi eba y'Omukama. 30Kyonkai kandi iwe n'abaramata bawe nimanya okwo mutakatinire Mukama Ruhanga.” 31Epamba n'eshayiri bikafa eshayiri ekaba yagizire ebikumba n'epamba ekaba yatwara kwakya. 32Engano na kusemetu ebyo tibyafire aha rw'okuba bikaba bikelereirwe kumera. 33Musa aruga ahali Farao omu kigo, aimukiza Omukama emikono; enkuba n'orubare bilekera, enjura eba etakishesheka. 34Kyonkai Farao kayaboine okwo enjura n'orubare n'enkuba byalekera, ashuba kandi afakara, agumangana omutima, n'abaramatabe kutyo. 35Farao agumangana omutima, tiyataishwire Baisiraeli; nk'okwo Omukama yabaire agambire omu kanwa ka Musa.

Currently Selected:

Okuruga 9: RHAY01

Highlight

Compare

Copy