Okuruga 10

Ekibundo kya munana: Enzige

1Omukama agambira Musa ati, “Ogye omwa Farao; wenene n'abaramatabe mbagumanganisize emitima, mbone kubakolera ebitangazo byange. 2Nirwo olija okagambira mutabani wawe na mwijukuru wawe okwo nzanisize Abamisiri n'obubonero obwo mbakoleire, mumanye okwo Omukama aba inye.”

3Musa na Aroni bagya omwa Farao bamugambira bati, “Omukama Ruhanga w'Abaheburania nabaza ati, ‘Oraberahai n'okwanga kunyetohyaho? Taishura abantu bange bagende banfukamire. 4Enshonga k'olikwanga kubataishura, nyenkya nindeta enzige omu nsi yawe, 5zigibunde, nangu taliho n'omoi arabona nsi egyo, mara ziralya eby'orubare rusigireho, zilye emiti yanyu yona emezire omu ndimiro. 6Kandi ziraijura amaju gawe n'ag'abaramata bawe n'ag'Abamisiri bona. Ndasindika ezo basho na bashwenkuru bataboine kwema ekiro ekyo baizireho omu nsi kugoba kir'eki.’ ” Aho ahinduka aturuka kuruga omwa Farao.

7Abaramata ba Farao bamubaza bati, “Omushaija ogu araberahai n'okutwita kubi? Taishura abantu bagende bafukamire Omukama Ruhanga wabo; tokashobokeirwe okwo Misiri yasisikara?” 8Bagarura Musa na Aroni ahali Farao; abagambira ati, “Genda mufukamire Omukama Ruhanga wanyu; kyonkai ab'okugenda ni bahai?” 9Musa amuhorora ati, “Nitugenda ichwena n'abana baitu n'abagurusi baitu; na batabani baitu na bahara baitu, n'amahyo gaitu g'entaama n'amahyo g'ente, aha rw'okuba nitugya kukolera Omukama ekiro kikuru.” 10Farao abagambira ati, “Obuso bw'Omukama, kandaziza kubataishura n'abana banyu! Okwo omu maisho mwinayo omugendelero gubi. 11Chei, mugende abashaija inywenkai, mufukamire Omukama, ahakuba ekyo nikyo mulikwegomba.” Aho bababinga omu maisho ga Farao.

12Omukama agambira Musa ati, “Imukya omukono aha nsi ya Misiri, olete enzige, zije zilye ebimera byona eby'orubare rusigireho.” 13Musa aimukya enkoniye aha nsi ya Misiri, Omukama aletera ensi omuyaga gw'oburugaizoba, gwihya nyemishana n'ekiro. Obwire kugya kukya gukaba gwalesire enzige. 14Enzige ziizira kimoi omuli Misiri yona. Omujumbi ogw'amani ogwabaire gutakabonekaga kandi ogutalibaho rundi. 15Enshonga zikabamba ensi yona, yaba mwilima. Zilya ebimera byona, n'ebiraba byona by'emiti eby'orubare rwabaire rusigireho. Misiri yona taliho kantu kabisi akasigairemu, gwaba muti, anga ekimera omu ndimiro. 16Aho Farao ayeta Musa na Aroni omu bwangu agamba ati, “Nfakaliire Omukama Ruhanga wanyu na inywe. 17Mbwenu aha rw'ekyo mungarulire obufu obu, nimbatagiliza, eli limoi lyonkai; mushabe Omukama Ruhanga wanyu buzima anyihyeho orufu oru.” 18Musa aruga ahali Farao, ashaba Omukama. 19Aho Omukama ahindura omuyaga ogw'amani gangi ogw'obugwaizoba, gushutura enzige guzinaga omu Nyanja Rutuku; tihasigaireho nzige n'emoi omuli Misiri. 20Kyonkai Omukama agumanganisa Farao omutima, tiyataishwire Baisiraeli.

Ekibundo kya mwendai: Omwilima lindindi

21Omukama agambira Musa ati, “Imukya omukono ogwolekeize eiguru, Misiri ebundwe omwilima, baguhulire.” 22Musa aimukya omukono agwolekeize eiguru, aho Misiri yona ebundwa omwilima elindindi ebiro bishatu; 23Ebiro bishatu byona taliho yaboine mutahiwe anga kwimuka mbali yabaire ali. Kyonkai mbali Abaisiraeli baturaga bakaba baina omushana. 24Aho Farao ayeta Musa agamba ati, “Mugende mufukamire Omukama, abana banyu mwakugenda nabo; ekiliho amahyo ganyu g'entaama n'ag'ente gasigare.” 25Kyonkai Musa amugambira ati, “Noragirwa kutuha ebitambo n'ebihongo by'okwokibwa, tubone ebyo turatambira Omukama Ruhanga waitu. 26Ebitunganwa byaitu nabyo nituragirwa kubitwara; nangu n'ekinono tikilikusigara nyuma, aha rw'okuba omuli byonene nituragirwa kugira ebyo twaihyamu tubone kufukamira Omukama Ruhanga waitu. Mara titulikumanya ni bihai ebyo turamutambira kuhika orwo turagobayo.” 27Kyonkai Omukama agumanganisa Farao omutima, tiyabataishwire. 28Farao agambira Musa ati, “Ndugamu, mara orayelinda iwe, otakuziza kuntahamu rundi, kiro eky'olintahamu olifa.” 29Musa agamba ati, “Nk'okwo wagamba! Tinkutahemu rundi.”

Currently Selected:

Okuruga 10: RHAY01

Highlight

Compare

Copy