Okuruga 11

Musa naranga okufa kw'emizigaijo

1Omukama agambira Musa ati, “Hasigara ekibundo kimoi ekindi ekyo ndaletera Farao na Misiri. Ahanyuma arabataishura muruge munu. Orwo arabataishura arababingira kimoi. 2Mbwenu ogambire abantu. Buli mushaija ayenze mutahiwe ebikwato by'efeza n'eby'ezahabu, na buli mukazi kutyo abyenze mutahiwe.” 3Omukama ahindura Abamisiri bagonza Abaisiraeli. Kandi Musa akaba ali muntu mukuru muno omu nsi ya Misiri: Aha baramata ba Farao n'omu bantu.

4Musa agamba ati, “Omukama nagamba ati: Kwija kugoba omu kiro eitumbi ndaraba Misiri, 5emizigaijo yamwo yona erafa, kwema aha muzigaijo gwa Farao ashuntamire aha nketoye, kulemwa kugoba aha muzigaijo gw'omuzana alikusa aha rubengo n'emizigaijo yona y'ebitunganwa. 6Harabaho okuchura kungi omuli Misiri yona, okutakabagaho mara okutalibaho rundi. 7Kyonkai omu Baisiraeli yaba muntu anga kigunju, eraba milembe n'embwa yonkai terurume; mwije mumanye okwo Omukama alikukora enshororo aha Bamisiri na Isiraeli. 8Kandi abaramata bawe aba bona barampondera bambandamire nibagamba bati, ‘Oturuke, n'abantu bawe bona obatware.’ Ekyo kakirahwa ndashohora.” Aho aruga ahali Farao ekiniga kimubarabasire. 9Omukama agambira Musa ati, “Farao tabaikilize, ebitangazo byange bibone kukanya omuli Misiri.”

10Musa na Aroni bakora ebitangazo ebi byona omu maisho ga Farao, kyonkai Omukama agumanganisa Farao omutima, tiyataishwire Baisiraeli kuruga omu nsiye.

Currently Selected:

Okuruga 11: RHAY01

Highlight

Compare

Copy