Okuruga 12

Akataama ka Pasika

1Omukama agambira Musa na Aroni omu nsi ya Misiri ati, 2“Omwezi ogu gurababera mbandizo y'omwaka; nigwo mwezi gwa mbere. 3Mugambire enteko yona ya Isiraeli okwo aha kiro kya ikumi ky'omwezi ogu, buli muntu akwate omwana gw'entaama kuhonderana n'amahiga gabo; buli ka omwana gw'entaama. 4K'eka eraba eli nke muno aha mwana gw'entaama, aho omuntu ayeme na mwataniwe nju na mulyango balye akataama kamoi kuhonderana n'orubara rw'abantu; kandi okwo buli muntu alikushobora kulya. 5Omwana gwanyu gw'entaama gube gutaina kamogo, mara kabe kapaya k'omwaka gumoi. Muragwihya omu ntama anga omu mbuzi. 6Mugubike kugoba aha kiro kya ikumi na binai bwaigoro ky'omwezi ogu, orwo enteko yona ya Isiraeli baraita obutama bwabo. 7Baihehyo obwamba babusiige aha nti z'emilyango zombili, n'aha bishasi by'amaju mbali baraliira obutaama obwo. 8Omu kiro balye enyama eyokize; n'omukate gutatumbisiibwe n'emikubi elikushalira. 9Mutagira yomwalya eli mbisi anga echumbire, shana ebe eyokize: Omutwe gwayo n'amaguru n'eby'omunda nabyo mubilye. 10Kandi mutagira kyomwarazaho kikagoba bwankya. Kyona kyona ekirasigaraho kugoba bwankya mukyokye. 11Kandi mugilye muti: Mube mwekomire enyugunyu, enkaito zanyu zibali omu maguru, enkoni zanyu zili omu mikono; mugilye bwangu bwangu. Egi niyo Pasika y'Omukama. 12Aha rw'okuba ndaraba omu nsi ya Misiri omu kiro omwo, nyite emizigaijo yona ya Misiri, omuntu n'ekigunju kumoi. Kandi baruhanga bona ba Misiri ndababonabonyia: Omukama aba inye. 13Obwamba aha nti z'emilyango burabamanyisa amaju ago mulimu. Orwo ndabona obwamba obwo, ndabahinguraho, taliho kibundo kirabagwera kubasilikya orwo ndaita ensi ya Misiri.

14“Ekiro ekyo kirabaga ky'okubaijukwa, muraikaraga nimukijuka, kibe kiro kikuru ky'Omukama. Omu mizarwa yanyu yona mulikikora kiro kikuru, kibe kiragiro ky'ebiro byona.”

Ekiro kikuru ky'omukate gutatumbisiibwe

15“Ebiro mushanju muralya omukate ogutatumbisiibwe; aha kiro kya mbere mwihye eitumbyo omu maju ganyu, kuba omu biro mushanju ebyo alilya ekiina eitumbyo, omuntu ogwo aliba atakili wange omuli Isiraeli. 16Aha kiro kya mbere muteho omuterano gutakatifu, n'aha kiro kya mushanju omuterano gutakatifu; hatabaho mulimo omu biro ebyo; kyonkai ekyo buli omoi aragiirwe kulya, ekyo kishai mube nikyo mutekateka. 17Kandi mwekomeleze ekiro kikuru ky'omukate ogutatumbisiibwe, aha rw'okuba aha kiro ekyo kyonene kyonene nirwo naihire enganda zanyu Misiri. Aha rw'ekyo mwekomeleze ekiro ekyo, omu mizarwa yanyu yona kibe kiragiro ky'eirai lyona. 18Bwaigoro bw'ekiro kya ikumi na binai ky'omwezi gwa mbere mulye omukate gutatumbisiibwe, mara mutyo kugoba aha kiro kya makumi gabili na kimoi ky'omwezi ogwo bwaigoro. 19Ebiro mushanju ebyo eitumbyo litakushangwa mu maju ganyu; kuba omu biro ebyo omuntu alilya ekiina eitumbyo, aliba atakili muntu wange omuli Isiraeli, alikaba mufuruki anga munyansi. 20Mutalilya kintu kitumbisiibwe; omu buturo bwanyu bwona mulye omukate ogutatumbisiibwe.”

21Ahanyuma Musa ayeta abebembezi bona ba Isiraeli, abagambira ati, “Muronde obutama kuhonderana n'amaka ganyu, mwite akataama ka Pasika. 22Mukwate omuganda gwa hisopo mugwibike omu bwamba obuli omu pakuli, musiige ekishasi n'enti z'emilyango zombili obwamba obwo; hatabaho n'omoi omuli inywe kuruga mwa wenene kulemwa kugoba bwankya. 23Aha rw'okuba nirwo Omukama ararabamu kwita Abamisiri. Orwo arabona obwamba aha kishasi n'aha nti z'omulyango zombili, arahingura orwigi orwo, tajubure mwisi kutaha mu maju ganyu kubaita. 24Murayekomya omuchonchozo ogu, ahali inywe na batabani banyu kibe kiragiro eirai lyona. 25Kamuragoba omu nsi eyo Omukama arabaha, nk'okwo yaragaine, mwekomye omuchonchozo ogu. 26K'abaana banyu balibabaza bati, ‘Omuchonchozo ogu gwina nshongaki ahali inywe?’ 27Mugambe muti, ‘Kitambo kya Pasika y'Omukama, aha rw'enshonga nirwo yahingwire amaju g'Abaisiraeli omuli Misiri, akaita Abamisiri kyonkai amaju gaitu yagahungya.’ ” Aho abantu bainika emitwe bafukama. 28Ahanyuma Abaisiraeli bagenda bakora batyo. Okwo Omukama yabaire aragiire Musa na Aroni, nikwo bagizire.

Ekibundo kya ikumi: Okufa kw'emizigaijo

29Omu kiro eitumbi Omukama aita emizigaijo yona omuli Misiri, kwema aha muzigaijo gwa Farao ayabaire ashuntamire aha nketo, kugoba aha muzigaijo gw'omufungwa ayabaire afungirwe, n'emizigaijo yona y'ebitunganwa. 30Farao aimuka omu kiro, wenene n'abaramatabe bona n'Abamisiri abandi bona. Aho habaho okuchura kuhango omuli Misiri, enshonga taliho nju n'emoi mbali habaire hatali mufu. 31Farao ayeta Musa na Aroni omu kiro abagambira ati, “Imuka, muruge omu bantu bange, inywe n'Abaisiraeli, mugende, mufukamire Omukama, nk'okwo mugambire. 32Mutware amahyo ganyu g'entaama n'ag'ente nk'okwo mugambire, mugende. Mara mumpe n'omugisha!”

33Abamisiri bakaliliza kubinga bwangu bwangu Abaisiraeli omu nsi yabo bati, “Nitwija kufa ichwena.” 34Aho Abaisiraeli bakwata ensano ekanzirwe kyonkai etakatumbisiibwe, n'epakuli zabo z'okukandiramu, bazikomerana omu bebo zabo bazita aha mabega. 35Bakaba bagizire okwo Musa yabaire abagambire, bayendize Abamisiri emilengyo y'efeza n'ey'ezahabu n'ebijwaro, 36Kandi n'Omukama akaba yahindwire Abamisiri bakunzire Abaisiraeli abo kubaha ebyo babendize. Banyaga batyo Abamisiri.

Abaisiraeli nibaruga Misiri

37Abaisiraeli bakalibata n'amaguru kwema Ramesesi kugoba Sukoti. Bakaba bashaija nk'enkumi mukaga, abakazi n'abana batabulimu. 38Bakagenda bali mbaga etabiraine, n'ebitunganwa bingi muno, amahyo g'entaama n'ag'ente. 39Bachumba ekeki zitatumbisiibwe z'ensano ekanzirwe eyo babaire baihire Misiri. Engano egyo ekaba etatumbisiibwe, kuba aha rw'okubingwa Misiri tibakelereirwe, anga kugir'oti bakaba bekomire n'entanda.

40Abaisiraeli bakatura Misiri eibanga ly'emyaka bikumi binai mwo makumi gashatu. 41Kiro ky'emyaka egyo yagoba nirwo enganda z'abantu b'Omukama zaruga Misiri. 42Kiro ky'Omukama yabaihya Misiri akarara aha nkera. Kiro kyonene kyonene eki eitumbi bakakihongera Omukama amakiro gona n'agalija. Kiba kiro eitumbi orwo Abaisiraeli barara aha nkera.

Entwaza ya Pasika

43Omukama agambira Musa na Aroni ati, “Ogu nigwo mugenzo gwa Pasika: Omunyamahanga atalilya aha nyungu ya Pasika; 44kyonkai omwiru aguzirwe ogwo yakulya. 45Omufuruki anga omupagasi akataama batakalyaho. 46Kalirwe omu nju emoi, mara mutalikashohoza heru; kandi akataama ako mutalikahendamu igufa. 47Enteko yona ya Isiraeli eshemeze ekiro kikuru eki. 48K'omugenyi alibafurukiramu akenda kushemeleza Omukama Pasika, abashaija bona omwe babatahiri. Aho yakuba nk'Omwisiraeli omunyansi, abona kwema na inywe kushemeza ekiro kikuru. Omuntu atatahirirwe atalya Pasika. 49Harabaho eiteka limoi aha munyansi n'omugenyi abafurukiiremu.”

50Nikwo Abaisiraeli bona bagizire. Okwo Omukama yabaire aragiire Musa na Aroni, nikwo bagizire. 51Aha kiro kilinya kyonene kyonene nirwo Omukama yaihire Abaisiraeli Misiri buli ruganda harwo.

Currently Selected:

Okuruga 12: RHAY01

Highlight

Compare

Copy