Okuruga 13

Emizigaijo y'Abaisiraeli

1Omukama agambira Musa ati, 2“Ompongere emizigaijo yona. Omuzigaijo gwona gwona omu Baisiraeli abe muntu anga kigunju, omuzigaijo ogwo gwange.”

Ekiro kikuru ky'emikate etatumbisiibwe

3Musa agambira abantu ati, “Mwijukega ekiro eki ekyo mwarugiiremu Misiri, omu bwiru; Omukama akabaihya omu nsi egyo omu bushoborabwe, kityo mutalilya mukate gutumbisiibwe. 4Kir'eki omu mwezi gwa Abibu nimuragirwa kuruga Misiri. 5Orwo Omukama alibagobya omu nsi y'Abakanaani, Abahiti, Abaamori, Abahivi n'Abayebusi, eyo yanahiliire baisheinywe okwo aligibaha, ensi elikusheshekana amata n'obwoki, mwekomye omuchonchozo ogu omu mwezi ogu. 6Ebiro mushanju mulye omukate gutatumbisiibwe, kandi aha kiro kya mushanju mushemeze ekiro kikuru ky'Omukama. 7Ebiro mushanju ebyo mulye omukate gutatumbisiibwe. Mutalizoka mwina mukate gutumbisiibwe, n'eitumbyo omu nsi yanyu yona litalizokamu. 8Aha kir'ekyo ogambire mutabani wawe oti, ‘Eki ninkikora aha rw'eby'Omukama yankoleire orwo narugiire Misiri.’ 9Okukora ekiro kikuru eki kurabaga kaijukiro nk'ekintu ekikukomirwe aha mukono anga aha buso. Kukwijukyega kwikara noshubamu Amateka g'Omukama, aha rw'okuba akakwihya Misiri n'obushobora bw'amani. 10Aha rw'ekyo oyekomye kuhikya ekiragiro eki omu bukiro obutairweho omwaka aha gundi.

Emizigaijo y'Abaisiraeli

11“Omukama alikutahya omu nsi y'Abakanaani nk'okwo yakurahiliire iwe na basho, mara akagikuha, 12olishorolera Omukama ogwo emizigaijo yona. Emizigaijo emishaija y'ebitunganwa byawe byona eliba y'Omukama; 13Buli muzigaijo gw'endogobe oliguchunguza akataama, anga k'oliba otenzire kuguchungura oguhende ebikya. Omuzigaijo gw'omuntu omuli batabani bawe oguchungure. 14Omu biro ebilija mutabani wawe k'alikubaza ati, ‘Eki kina nshongaki?’ Omugambire oti, ‘Omukama akatwihya Misiri omu bwiru, yatwihisayo obushobora bw'amani. 15Orwo Farao yagizire ekyejo akanga kututaishura, Omukama yaita emizigaijo yona omu nsi ya Misiri, emizigaijo yombili, ogw'omuntu n'ogw'ekitunganwa. Aha rw'ekyo nintambira Omukama ebishaija byona ebizigaijo; kyonkai batabani baitu bona emizigaijo tubachungura.’ 16Okushemeza ekiro kikuru kya Pasika kubega kaijukiro, nk'ekintu ekikomirwe aha mukono anga aha buso, aha rw'okuba Omukama akatwihisa Misiri obushobora bw'amani.”

Abaisiraeli nibaruga Misiri

17Orwo Farao yataishwire abantu kugenda, Ruhanga tiyabarabize muhanda gwa nsi ya Bafilisiti, n'orwo gulinya gwabaire guli gwa haihi. Ahakuba akagamba ati, “K'abantu batakwija bakefuhya kabakubona endashana, bakagaruka Misiri.” 18Akabazongesa yabarabya omuhanda gw'eirungu omu bwolekera bw'Enyanja Rutuku. Abaisiraeli bakaruga Misiri bekomeire endashana. 19Musa akagenda n'amagufa ga Yozefu; Yozefu akaba anahize Abaisiraeli ati, “Ruhanga k'alibasingira muliragirwa kwihya amagufa gange munu.” 20Baruga Sukoti basisira Etamu aha rubibi rw'eirungu. 21Nyemishana Omukama yabebemberaga omu nyomyo y'ekichwi kuboleka omuhanda kandi omu kiro abebembera omu nyomyo y'omuliro kubakiza, babone kugenda nyemishana n'ekiro. 22Nyemishana enyomyo y'ekichwi tiyabarugiire mu maisho, kwakwo n'enyomyo y'omuliro mu kiro.

Currently Selected:

Okuruga 13: RHAY01

Highlight

Compare

Copy