Okuruga 14

Nibashabuka Enyanja Rutuku

1Aho Omukama agambira Musa ati, 2“Ogambire Abaisiraeli bagaruke basisiire omu maisho ga Piahahiroti omugati ya Migidoli n'Enyanja Rutuku, bwatana Baalizefoni. 3Farao naija kutekeleza ati, ‘Abaisiraeli nibabumbulikwa omuli Misiri; eirungu lyabatangatanga.’ 4Inye ndamugumanganisa omutima ababinge, nyije musinge n'eihelye mbonereho ekitinwa. Abamisiri baramanya okwo Omukama aba inye.” Abaisiraeli baba nikwo bagira.

5Orwo bagambire omukama wa Misiri okwo abantu abo bairuka, wenene n'abaramatabe befuhya bati, “Twakoraki eki, kutaishura Abaisiraeli bakagenda bakalekera kutukolera?” 6Kityo atekateka egaliye y'endashana n'eihelye. 7Agenda n'amagalige gona ga Misiri, hamoi n'amagali rukaga agarungi muno, gaina abakuru bago. 8Omukama agumanganisa Farao omutima, omukama wa Misiri ogwo abinga Abaisiraeli ngu barugisamu eijeme. 9Eihe ly'Abamisiri n'efarasi za Farao n'amagali, n'ab'efarasi n'eihelye, bababinga babashanga basisiire aha Nyanja Rutuku bwatana Piahahiroti, omu maisho ga Baalizefoni.

10Orwo Farao yagobire haihi, Abaisiraeli kunaga amaisho, babona Abamisiri nibatambuka babahondeire; bagira obutini bungi. Batakira Omukama; 11bagambira Musa bati, “Misiri talimu iwe kutuleta kugwa omw'irungu? Watukoraki kutwihya Misiri? 12Eki tikyo twakugambiire tuli Misiri tuti, ‘Otuleke tukolere Abamisiri?’ Hakili twakukoleire Abamisiri kukira okugwa omw'irungu.” 13Musa abagambira ati, “Mutatiina, mugume, mwije mubone okwo Omukama arabarokora kir'eki; enshonga Abamisiri abo mulikubona mbwenu, timulibabona rundi n'akati. 14Omukama arabarashanira, ekyanyu mutebekane.”

15Omukama agambira Musa ati, “Nka nondilira? Gambira Abaisiraeli bagendelere. 16Imukya enkoni yawe ogyolekeize omu nyanja ogibeganise, Abaisiraeli barabe ahomire bagiguturane. 17Inye ndagumanganisa Abamisiri emitima nangu batahemu babahondeire; Farao ninyija kumusinga n'eihelye, amagalige n'ab'efarasibe, mbabonereho ekitinwa. 18Abamisiri baramanya okwo Omukama aba inye orwo ndaba nasingire Farao, amagalige n'ab'efarasibe, namuboneireho ekitinwa.”

19Aho omumalaika wa Ruhanga ayabaire ayebembeire eihe lya Isiraeli aija agya enyuma yabo; n'enyomyo y'ekichwi eruga omu maisho gabo ebemelera enyuma; 20eija omugati y'eihe lya Misiri n'eihe lya Isiraeli. Habaho ekichwi n'omwilima; obwire bukya obuzira eihe kugoba linu ekiro kyona.

21Musa aimukya omukono aha nyanja; n'Omukama asindika omuyaga gw'amani gw'oburugaizoba ekiro kyona, guchuma enyanja enyuma, amaizi gabeganuka enyanja agihindura nsi eyomire. 22Abaisiraeli baraba omugati y'enyanja aha nsi eyomire, amaizi gaba rusiika aha bulyo bwabo n'aha bumosho bwabo. 23Abamisiri babahondera, bababinga, bataha omu nyanja bagigoba omugati n'efarasi za Farao zona, amagalige n'ab'efarasibe. 24Bwankya Omukama ayema omu nyomyo y'omuliro n'ey'ekichwi aleba eihe ly'Abamisiri, 25agumanganisa entaro z'amagali gabo bagenda kubikubi. Aho Abamisiri bagamba bati, “Katwiruke turuge omu maisho ga Isiraeli; kuba n'orwo tulikurashana nabo Omukama nabarashanira.”

26Omukama agambira Musa ati, “Imukya omukono aha nyanja, amaizi gagaruke gabunde Abamisiri abo, amagali gabo n'ab'efarasi babo.” 27Aho Musa aimukya omukono aha nyanja, orwo obwire bwakeire enyanja egaruka n'amani; Abamisiri bairuka, kyonkai Omukama abakinigiza omu nyanja omwo omugati. 28Amaizi gagaruka gabunda amagali n'ab'efarasi n'eihe lyona lya Farao ababaire babahondeire omu nyanja. Tibasigaireho muntu n'omoi. 29Kyonkai omu nyanja omwo Abaisiraeli bakaraba aha rukaru, obulyo bwabo n'obumosho amaizi gaba rusiika.

30Nikwo kir'ekyo Omukama yarokoire atyo Isiraeli omu mikono y'Abamisiri; bakabona emitumbi yabo aha mwaro. 31Babona n'omulimo gw'amani ogw'Omukama yakozire aha Bamisiri abo; batina Omukama bamwesiga; besiga n'omwiruwe Musa.

Currently Selected:

Okuruga 14: RHAY01

Highlight

Compare

Copy