Okuruga 15

Oruhoya rwa Musa

1Aho Musa n'Abaisiraeli bahoyera Omukama oruhoya oru, bati,

“Mpoyere Omukama,

aha rw'okuba yasinga yabona kitinwa;

efarasi n'omukuubi wayo, yanaga omu nyanja.

2Omukama niwe mani gange mara ruhoya rwange,

yaba mulokozi wange.

Ogu niwe Ruhanga wange, ndamuhaisiliza;

Ruhanga wa tata ndamusingiza.

3Omukama mwisherukale,

‘Mukama’ nilyo ibaralye.

4Amagali ga Farao n'eihelye yanaga omu nyanja,

n'abakuru b'eihe emanzi muno batoka omu Nyanja Rutuku.

5Emitunga yababunda,

batontobera obuziba nk'eibare.

6Omukono gwawe gwa bulyo, waitu Mukama,

amani gagwo g'ekitinwa;

omukono gwawe gwa bulyo, waitu Mukama,

guchwagulikya omubisha.

7Ekitiinwa kyawe kihango

nikyo osingisa ababisha bawe,

osindika ekiniga kyawe

kibokya okw'omuliro gwokya ekishagate.

8K'enyindo zawe zayesaimwire amaizi gatuumangana,

amaizi agaba nigagenda gayetuma hamoi;

omu nyanja obuziba okuzimu haganda.

9Ababisha bagambire bati, ‘Tubabinge tubakwate,

tubegane eminyago, tutware byona ebyo tulikwenda,

tushohorore embanda zaitu tubasilikye.’

10Okaihisa omuyaga gwawe, enyanja yababunda,

batobera nk'eishasi omu maizi gangi ag'amani.

11Waitu Mukama ni ruhangaki alikukushusha?

N'ohai alikukwigana iwe omutakatifu w'ekitinwa?

N'ohai ow'okukora ebitangazo n'ebikorwa by'amani?

12Okaimukya omukono gwa bulyo,

ensi yabamira.

13Omu kisha kyawe ochungwire abantu bawe,

washuba wabebembera,

omu mani gawe obahabwire

wabagobya omu nsi yawe entakatifu.

14Amahanga gahulire gachundwa,

abataka ba Filisitia bakwatwa orumatu.

15Abatwazi ba Edomu nibahwahwana,

abebembezi ba Moabu orujugumbo rubakwete;

abataka bona ba Kanaani bayagiliire.

16Bagwerwa akamazi n'orumatu;

aha rw'enshonga y'obungi bw'amani gawe,

bagandaire nk'eibare,

kuhika orwo abantu bawe barahingura,

waitu Mukama,

kuhika orwo abantu bawe ab'ochungwire barahingura.

17Waitu Mukama, orabagobya omu nsi egyo,

obabyare aha ibanga lyawe,

omwanya ogw'ohindwire buturo bwawe,

ahatakatifu, waitu Mukama

ah'emikono yawe etaireho.

18Omukama alitwara eirai n'eirai.”

Oruhoya rwa Miriamu

19Orwo efarasi za Farao n'amagalige n'ab'efarasibe batahire omu nyanja, Omukama akagarura enyanja yababunda; kyonkai Abaisiraeli omu nyanja baraba aha rukaru. 20Aho Miriamu, omurangi, munyanya Aroni akwata akadiika, n'abakazi baturuka bamuhondeire bakwete obudiika nibazina. 21Miriamu abahoyera ati,

“Muhoyere Omukama,

kuba yasinga, yabona ekitinwa kihango;

efarasi n'agikuubire yanaga omu nyanja.”

Amaizi g'enshalizi

22Aho Musa aihya Abaisiraeli aha Nyanja Rutuku, bataha omw'irungu lya Shuri; bagenda ebiro bishatu omw'irungu elyo bataboinemu maizi. 23Orwo bagobire Mara tibashoboire kunywa maizi gaho enshonga gakaba nigashalira; nikyo hayeteirwe Mara. 24Abantu bajojobera Musa bati, “Turanywaki?” 25Musa atakira Omukama; Omukama amwoleka omuti, agunaga omu maizi, amaizi ganulilira. Honene aho Omukama abaha ekiragiro n'omugenzo, abaraganisa 26ati, “K'oligira obwegendeleza okahulira eiraka lyange, okakora ebilikunshemelera oketaho emihango yange, okakwata ebiragiro byange, tindikusindikira ndwara ezo nasindikiire Abamisiri; Omukama omukiza wawe aba inye.”

27Abaisiraeli bagoba Elimu mbali habaire hali enchuro ikumi na ibili n'emitende nshanju, basisira aha nchuro ezo.

Currently Selected:

Okuruga 15: RHAY01

Highlight

Compare

Copy