Okuruga 16

Manu n'endahi

1Enteko yona y'Abaisiraeli baimukya baruga Elimu, bagoba omw'irungu lya Sini, elili omugati ya Elimu na Sinai, aha kiro kya ikumi na bitanu ky'omwezi gwa kabili barugiire Misiri. 2Bona bajojobera Musa na Aroni omw'irungu elyo, 3bati, “Hakili kuba Omukama atwitiire Misiri, mbali tubaire nitushuntama aha nyungu z'enyama tukalya ekyakulya tukaiguta. Embaga egi yona mugihire Misiri mwagileta omw'irungu eli kugisa enjara?”

4Omukama agambira Musa na Aroni ati, “Ninyija kubagwisiza ebyakulya nk'enjura kuruga omw'iguru. Buli kiro omuntu agende ashombokye ebyakulya by'ekiro kimoi, mbalenge nka barakwata Amateka gange anga chei. 5Aha kiro kya mukaga bashombokye ebyakulya by'ebiro bibili babichumbe.” 6Musa na Aroni bagambira Abaisiraeli bati, “Bwaigoro muramanya okwo Omukama niwe abaihire Misiri. 7Kandi bwaigoro murabona ekitinwakye aha rw'okuba ahuliire okujojoba okwo mumujojobeire. Ichwe twaba bahai kutujojobera?” 8Musa agamba ati, “Bwaigoro Omukama arabaha enyama y'okulya, kandi bwankya abahe ebyakulya mwigute, enshonga yahuliire okwo mulikumujojobera. Ichwe twaba bahai? Timulikujojobera ichwe, nimujojobera Omukama wenene.”

9Musa agambira Aroni ati, “Ogambire enteko yona y'Abaisiraeli oti, ‘Mwije omu maisho g'Omukama kuba yahuliire okwo mulikujojoba.’ ” 10Orwo Aroni yabaire nabagambira ebigambo ebyo, babona ekitinwa ky'Omukama omu kichwi. 11Omukama agambira Musa ati, 12“Nahulira okujojoba kw'Abaisiraeli. Obagambire oti, ‘Aha kalembabazana muralya enyama, kandi bwankya muraiguta ekyakulya, aho muramanya okwo mba Mukama Ruhanga wanyu.’ ”

13Bwaigoro endahi zija zibunda orusisira; kandi bwankya orume rurara ruzingoire orusisira orwo. 14K'orume rwabaire rwayomire, leba, omw'irungu obuntu buke buke nibushusha orubare buhulingiliire. 15Orwo Abaisiraeli babuboine, babazangana bati, “Eki kiki?” Ahakuba tibamanyire ni kihai. Aho Musa abagambira ati, “Ebi nibyo byakulya eby'Omukama yabaha kulya. 16Nibyo byakulya eby'Omukama yaragira ati, ‘Mushombokye, buli omoi eby'arashobora kulya; kuhonderana n'orubara rw'abantu ab'omuntu ainabo omw'ihemalye, buli omoi omeri emoi.’ ” 17Abaisiraeli bakora batyo, aba bashombokya bingi abandi bashombokya bike. 18Orwo kababipimire omu omeri, ayashombokize bingi akaba ataina bishagire, n'ayashombokize bike tiyalebeleirwe. Buli omoi akashombokya ebyo yabaire nashobora kulya. 19Musa abagambira ati, “Omuntu n'omoi atarazaho kantu.” 20Kyonkai tibamuhuliliize. Abandi babirazaho, kyonkai byagira enzito, byanuka; Musa yabatamwa. 21Buli bwankya buli muntu yashombokyaga kingi ekyo yabaire nashobora kulya, kyonkai orwo omushana gwajwaga bwagilira.

22Aha kiro kya mukaga bashombokyaga ebyakulya by'ebiro bibili, buli muntu omeri ibili; orwo abebembezi b'enteko baizire bakagambira Musa, 23abahorora ati, “Ekyo nikyo Omukama aragiire, ati, ‘Nyenkya kiro ky'okuhumura, ni Sabato yange ntakatifu; ebyakulya ebyo murakanda mukande, ebyo murachumba muchumbe, ebirasigaraho byona mute aha rubaju mubirazeho.’ ” 24Kityo ebyasigaraho babita aha rubaju babirazaho, nk'okwo Musa yabaragiire. Tibyanukire anga kugira nzito. 25Musa agamba ati, “Mubilye kir'eki, aha rw'okuba ni Sabato y'Omukama. Ahali Sabato ebyakulya timubibone mw'ishwa. 26Mubishombokye omu biro mukaga; kuba aha kiro kya mushanju, niyo Sabato, tihabeho kantu.” 27Aha kiro kya mushanju ekyo abandi bagya kushombokya, tibashangireyo kantu. 28Omukama agambira Musa ati, “Muraberahai n'okwanga kukwata emihango yange n'Amateka gange? 29Mbahaire ekiro kya Sabato, kityo aha kiro kya mukaga nimbaha ekyakulya ky'ebiro bibili. Inywena buli muntu aikare aha mwanyagwe, aha kiro kya mushanju hatabaho muntu aturuka kuruga mbali ali.” 30Nikwo abantu kir'ekyo kuhumura.

31Ebyakulya ebyo Abaisiraeli bakabyeta manu Ekaba neshusha enjuma y'omugusha, neyera, mara nenura nk'amandazi gakolerainwemu obwoki. 32Musa agamba ati, “Omukama ahangire katubiikaho eomeri emoi ya manu egi, tugibiikire baijukuru baitu, baije babone ebyakulya ebyo yatuhaire kulya omw'irungu orwo yabaire natwihya Misiri.” 33Agambira Aroni ati, “Okwate emuga ogitemu eomeri emoi ya manu, emuga egyo ogite omu maisho g'Omukama, tugibiikire baijukuru baitu.” 34Nk'okwo Omukama yaragiire Musa, nikwo Aroni yataire emuga egyo omu Sanduku y'Endagano. 35Abaisiraeli bakalya manu emyaka makumi ganai, kuhika orwo bagobire omu nsi ya Kanaani bakatura. 36Omeri nikyo kichweka kya ikumi kya efa.

Currently Selected:

Okuruga 16: RHAY01

Highlight

Compare

Copy