Okuruga 17
17
Amaizi nigaruga omu rwazi
(Orub 20:1-13)
1Enteko y'Abaisiraeli ekaruga omw'irungu lya Sini omu bichweka, nkw'ok'Omukama yabaire ahangire, bagya basisira Refidimu. Kyonkai abantu tibaboineho maizi ga kunywa. 2Aha rw'ekyo bakwata Musa omushango bati, “Otuhe amaizi g'okunywa.” Musa abagambira ati, “Kubaki nimunkwata omushango? Kiki kulengesa Omukama?” 3Kyonkai abantu baguma bakwetwe eiliho baikara nibamweboroboitera bati, “Okatwihiraki Misiri, kutwisa eiliho n'abana baitu n'ebitunganwa byaitu?” 4Aho Musa atakira Omukama ati, “Abantu aba mbagiire ntai? Baraliire kunteza amabare.” 5Omukama amuhorora ati, “Ogire abebembezi ba Isiraeli abo wagenda nabo, oyebembere embaga okwete enkoni yawe eyo wateize naili. 6Ndakwemelera omu maisho aha rwazi rwa Horebu; otere orwazi orwo, rurugwemu amaizi abantu banywe.” Musa agira atyo omu maisho g'abebembezi ba Isiraeli. 7Omwanya ogwo agweta Masa na Meriba aha rw'enshonga y'Abaisiraeli kumukwata omushango, kandi bakalengesa Omukama nibagamba bati, “Omukama twinawe anga chei?”
Abaisiraeli nibarashana n'Abaamaleki
8Aho aijwa Abaamaleki barashana n'Abaisiraeli ahali Refidimu. 9Musa agambira Yoshua ati, “Orondeho abaisherukare mugye murashane n'Abaamaleki, muturashanire. Nyenkya ndayemelera aha mutwe gw'eibanga nkwete enkoni ya Ruhanga.” 10Kityo Yoshua agira nk'okwo Musa yamugambira, arashana n'Abaamaleki; kandi Musa wenene na Aroni na Huri batemba aha mutwe gw'eibanga. 11Orwo Musa yaimukyaga omukono Abaisiraeli basinga, kandi orwo yagwisaga Abaamaleki basinga. 12Kyonkai Musa alemwa emikono; aho bakwata eibare balita ahansi alishuntamaho, Aroni na Huri bamwinunura emikono, omoi rubaju orumoi n'ondijo rubaju orundi; kityo aguma emikono kuhika eizoba kutobera. 13Yoshua atema Amaleki n'abantube, abatemesa embanda.
14Aho Omukama agambira Musa ati, “Ohandike amakuru g'endashana egi omu kitabo gaije gaijukwe. Mara ogambire Yoshua okwo ndikwija kuchwa Abaamaleki omu nsi.” 15Musa ayombeka ealutare agyeta Yehovanisi#17:15 Yehovanisi Omukama niwe bendera yange. 16nagamba ati, “Ebendera y'Omukama ogikwatire eiguru! Ebiro byona Omukama alikara arashaine n'Abaamaleki.”
Currently Selected:
Okuruga 17: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
