Okuruga 18

Yetiro nazindukira Musa

1Yetiro omukuhani wa Midiani, ishezara Musa, ahulira bya ebyo Ruhanga yabaire akoleire Musa na n'Abaisiraeli abantube, akabaihya Misiri. 2Aho aleta omuhara Sipora muka Musa, kuba Musa akaba amushubizeyo, 3n'abatabani bombili. Omoi akaba ali Gerishomu, aha rw'okuba Musa akagamba ati, “Mbaire ndi mufuruki omw'ihanga,” 4n'ondijo akaba ali Eliezeri, enshonga akagamba ati, “Ruhanga wa tata akanjuna, yandokora aha mbanda ya Farao.” 5Yetiro aija na muka Musa n'abatabani omw'irungu mbali Musa yabaire asisiire aha Ibanga lya Ruhanga. 6Orwo omuntu omoi yagambire Musa ati, “Lea, shozara Yetiro na mukazi wawe na batabani bawe bombili nibaija owawe.” 7Musa ashohora kutangilira ishezara, abandama mara amunywegera, babazangana amakuru gabo bamara bataha omw'ihema. 8Aho Musa agambira ishezara byona okwo Omukama yakozire Farao n'Abamisiri aha rw'Abaisiraeli, n'enaku zona ezabagwireho omu muhanda, n'okwo Omukama yabarokoire. 9Yetiro ashemelerwa aha rw'ebirungi byona ebyo Omukama yabaire akoleire Abaisiraeli kubona nabaihya omu mikono y'Abamisiri.

10Yetiro agamba ati, “Omukama asingizibwe, abaihire omu mikono y'Abamisiri n'omu mikono ya Farao. 11Mbwenu namanya okwo Omukama ali mukuru kushaga baruhanga bona, aha rw'okuba arokoire abantube omu mikono y'Abamisiri orwo babaire nibabaita kubi n'ekyeju.” 12Yetiro ahongera Ruhanga ekihongo n'ebitambo; Aroni aija n'abebembezi bona ba Isiraeli kulya hamoi na ishezara Musa ekyakulya, kili kigiro ky'okufukamira Ruhanga.

Musa naronda abaramuzi

(Obw 1:9-18)

13Bukeire Musa ashuntama kuramura abantu. Abantu bamwemeleraho kwema bwankya kuturuka bwaigoro. 14Orwo ishezara yaboine bya ebyo yabaire nakolera abantu, abaza ati, “Biki ebi eby'olikukolera abantu? Kubaki noshuntama wenkai mara abantu nibakwemeleraho kwema bwankya kuturuka bwaigoro?” 15Musa amuhorora ati, “Nindagirwa ntyo kuba abantu nibanyijaho kambabaliza ahali Ruhanga. 16Orwo balikuhakana banyijaho, aho ndamura omuntu na mutahiwe, mara mbamanyisa ebiragiro bya Ruhanga n'emihangoye.” 17Ishezara amugambira ati, “Eky'olikukora ti kirungi. 18Iwe n'abantu ab'oinabo nimwija kwelemesa, aha rw'okuba omulimo ogu nigukusikilira muno; toshobora kugukora oli wenkai. 19Mbwenu hulira nkugambire; ninyija kukuhanulira mara Ruhanga abe naiwe! Iwe obe mubaka w'abantu omu maisho ga Ruhanga, mara omugambire empaka zabo. 20Kandi obegese emiku n'emihango, obagambire okwo bararora n'ebyo baragirwe kukora. 21Kandi orondemu abantu ab'akalyo abalikutina Ruhanga, abesigwa mara abatalikulya rushwa; aba obe nibo otaho kutwara abantu enkumi, ebikumi, amakumi gatanu n'eikumi. 22Babe baramuzi baramure abantu omwanya gwona; buli kigambo ekihango bakikuletere, kyonkai ekigambo ekike kyona kyona bakyeramulire. Aho omulimo gurakworobera kushaga, na bonene bakutwaze omugugu ogu. 23K'orakora otyo, nk'okwo Ruhanga alikukuragira, aho toyelemese, abantu bona barashuba omuka empaka zihoire eli milembe.”

24Kityo Musa ahulira ebyo ishezara yamugambira, aba nikwo akora. 25Aronda abantu ab'akalyo omuli Isiraeli yona, abahindura batwazi b'enkumi, ab'ebikumi, ab'agatanu n'ab'eikumi. 26Baramura abantu ebiro byona, emishango egumire bagileteraga Musa, kyonkai ekigambo ekike bakyeramuliraga. 27Ahanyuma Musa ataishura ishezara, ishezara agaruka owabo.

Currently Selected:

Okuruga 18: RHAY01

Highlight

Compare

Copy