Okuruga 19
19
Abaisiraeli aha Ibanga lya Sinai
1Orwo okwezi kwayemire elya kashatu kwema Abaisiraeli barugiire Misiri, kiro ekyo nirwo batahire omw'irungu lya Sinai. 2Orwo barugiire Refidimu bakataha omw'irungu lya Sinai, omwo omu maisho g'Eibanga lya Sinai baba nimwo basisira. 3Musa atemba aha ibanga kubonangana na Ruhanga. Omukama ayema aha ibanga amweta, amugambira kugambira Abaisiraeli baijukuru ba Yakobo ati, 4“Muboine ebyo inye Omukama nkoleire Abamisiri. Inywe mbashutwire okwo kagoma eshutulira obwana bwayo aha mapapa nabeletera kunu owange. 5Mbwenu kamulimpulira mukekomya n'endagano yange, muliba bange omu mahanga gona; manya ensi yona yange. 6Muliba bantu bange omu ngeli eli kwayo, mube bukama bw'abakuhani mara ihanga elitakatifu. Ebi nibyo bigambo by'oragambira Abaisiraeli.”
7Aho Musa asongoka ayeta abebembezi b'embaga, abagambira aba byona eby'Omukama yabaire amuragiire. 8Abantu bahorora hamoi bati, “Byona ebyo Omukama yagamba turabikora.” Musa abarulira Omukama eby'abantu bagambire. 9Omukama amugambira ati, “Ndakwijaho omu kichwi kikwataine, abantu batuhulire orwo ndaba ninfumora naiwe, mara kwema aho bate nibakwikiliza.”
Musa agambira Omukama eby'abantu bahorora. 10Omukama amugambira ati, “Ogende omu bantu obahasilire kir'eki na nyenkya, bogye n'ebijwaro byabo. 11Aha kiro kya kashatu babe bayetekatekire; kir'ekyo kyonene ndasongoka aha Ibanga lya Sinai mbali bona barashobora kumbona. 12Obatereho embibi obuzingora bw'eibanga nogamba oti, ‘Mwelinde mutatemba mw'ibanga anga kukwata aha rubibi rwalyo. Weena arakwata aha ibanga bamwite; 13batamukwataho, shana bamuteze amabare anga bamurashe; kiraba kigunju anga muntu arafa.’ Orwo enzamba eraikara ejugire batembe aha ibanga.” 14Kityo Musa asongoka eibanga agoba abantu, abahasilira kandi bonene bogya ebijwaro byabo. 15Abagambira ati, “Aha kiro kya kashatu mube mwayetekatekire; omuntu atakugoba mukazi.”
16Bwankya bw'ekiro kya kashatu aha ibanga hakabaho ekichwi kikwataine, endabyo zirabya, enkuba zisharuka, enzamba ejuga n'eiraka lihango muno, nangu n'abantu ababaire bali omu nsisira bachundwa. 17Aho Musa abaihya omu rusisira kwakilira Ruhanga; bemelera aha kibazi ky'eibanga. 18Eibanga lya Sinai libundwa omwika aha rw'okuba Omukama akalisongoka omu muliro. Omwika gugya eiguru nk'ogw'etanuru, n'eibanga lyona litengeta muno. 19Orwo eiraka ly'enzamba lyagenzire nilyeyongera, Musa agamba na Ruhanga amuhorolera omu nkuba. 20Omukama asongoka aija aha aha mutwe gw'Eibanga lya Sinai, ayemaho ayeta Musa, Musa atemba. 21Omukama amugambira ati, “Songoka otatire abantu bataija bakashabuka rubibi kwija kunshamalira, bakafa bangi. 22N'abakuhani kwakwo abagoba Omukama behasilire, Omukama atakwija akababunda.” 23Musa agambira Omukama ati, “Abantu tibashobora kugoba Ibanga lya Sinai; iwe wenene okaturagira nogamba oti, ‘Muteho embibi aha ibanga, mara mumanye okwo lili litakatifu.’ ” 24Aho Omukama amugambira ati, “Osongoke ogye olete Aroni; kyonkai otajubura bakuhani na kushaga mbibi kutemba wange, ntakwija nkababunda.” 25Kityo Musa asongoka agoba abantu, abagambira.
Currently Selected:
Okuruga 19: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
