Tlehhema'aá ya/Abuuse 3
3
Heé taqooramo
1Looarka wake Petro nee Yohana tana tsa/án as tawa saalíngw ay baraá Doó Mungú i alé siiwadár saaliingo. Qoomaadá' a looár gwaleél. 2Heeko taqooramo iimír kuwa laqwaali kuri afkuú Doó Mungú i áy, afkuú do'dá' ta babay oo hhoohhoó'. Heewí umuúqo deelooro kun gagaraarín didá' i ale, as ilahhooa ngiwa firirin dír mukdá' daráh baraá Doó Mungú i ale. 3Heewí Petro nee Yohana ngiwa ár tawa darahi baraá Doó Mungú i ale, giri firín ilahhooaro. 4Petro nee Yohana kuri ilaá i duxún, tari oó', “Amoorén i qaytsitang.” 5Giri i qaytsiít, gaa sleemuuwo gari dir'ín i haraxuú'. 6Petro iri oó', “Aníng peésa a koomaaká, laqaá miisli, ala tidá' aníng ni koom an tidá' ni haniis. Ar /uuruú Yesu Kristo oo Nasareti, sihhiít, tláw.” 7Dákw doó /iyáy guri óh, guri sihhitís. Hamtidár kilae tsa/a'aá ya'aawós niri kwa/iyé' nee diqoó ya'aawose. 8Heedaádá' niri yaamuú wa /akuút ar gaanslaay, iri sihhiít, iri hi'imiít. Tari aldáh baraá Doó Mungú nee Petro nee Yohana, iri ni/ín, Mungú guri diidi'iimiís. 9Muu sleémeero heedaádá' guri ár adór ira hi'imiít, nee Mungú kuri diidi'iimiís. 10Kuri tsaáhh tawa heedaádá' ilahhooár firaariím, kudá' ta qamamin dír afkuú do'dá' ta babay oo hhoohhoó'. Tari kwislimiít, adór inós ira hunguú/ kari waa/oo/amín.
Alki/ituú Petro baraá Doó Munguhe
11Heedaádá' taa hungu/uús, tari al dinku'uús nee Petro nee Yohana. Muu sleémeero giri i burumburiít didár islangwdá' ta babay islángw Sulemani, muu iri ló' wa waa/oo/amín. 12Petro adoorí ngiwa ár, iri oó' dír mukdí alé, “Aá múk Israeli, gár ta waa/oo/amiinda' a milá? Asma milá atén mista tawó ilaá i duxuundé', baré kwaáo' a adór atén heewí una hungu/uusaán ar /uureemoorén, laqaá ar ilaiwa/ameerén. 13Mungú Abrahamu nee oo Isaka nee oo Yakobo, Mungú baabi'iirén, sagadiyusmoowós Yesu guna xirfayeés, ala kuungá' sagdiyusmoowí kuri saki/é', kuri sa tlaké' geerá Pilató wa ale, qoomár Pilato kwasleema ngiwa tsaát gídaabá ku gweeri. 14Kuungá' kuri sa tlaké' Kudá' hhoohhoó', slám inós i gan'amuú kón. Nee kudá' aa tsu/uut kuri slaé' ilaooharo. 15Kudá' úr oo slafíngw koóm kuri gasé', nee inós an kudá' Mungú aa waasle/atís baraá múk aa qaátl wa ale, nee atén a lamabu'uuseerós. 16Heewí kuungá' ta ga/eera' nee oo ta xua', heé inós gwa /uuruú i haniis a Yesu, asma haratlintaao. Heewí kuri hungu/uús ar /uuruú haratlintaaoorí amór Yesú daahh, adoorí kuungá' sleémero kur ga/eera'.
17“Ala hám daxta, hhaee'eé', aníng a xuú' gídaabá tidá' ana tlehhé' ar xuawaslerhúng, adoodár mukhúng oo urén aa tleéhh sleeme. 18Ala adoorí an adoodá' Mungú aa boo/eés, tidá' aa axweés ar afér aaruuseerós sleémeero gídaabá Kristo gár kuwa hariím, a kun slahhaeemiis. 19Ala gawaá adoorihe kuungá' hhu'u'uumé', nee ki/é' amór Mungú, as tlakweemaahúng kiwa fiitsi. As daqaní qooma i hardát ar Aako nuwa gurkwa/asi, 20nee Kristo Yesu nguwa ya/aawi, kudá' taa iimír aáng wa amohhe'eés as kuungá'. 21Kristo Yesu inós an kudá' aa gawaá doorí kii/, ay dír qoomaadá i xeer, tidá' mura' sleémeero kuwa hheehhe'eesár i ki/isi, adoodá' Mungú ngira qaroó axweés ar afér aaruuseerós ar hhohho'. 22Asma Musa ina oó' gídaabá, ‘Aakoó Mungúhúng aarusmo ngu ya/aaw, adoorí aníng ira ya/aáw. Aarusmoowí dír nguwa ya/aawi a baraá tla/ángw mukhúng. Ala kuungá' inós na iiár i qaasaak, muruudá' sleémeero inós ni dirhúng i kaahi. 23Umuúqo heewo oo aarusmoowí gu iiár i qaasaaká, inós ku qwaarees nee kuri paraatl dír mukose.’ 24Nee aaruuse sleémeero iimír aarusmo Samweli, nee kudá' sleémeero awa aluuwós nga hariye', inooín iidíguú taa alki/iít a iidíguú qoomaarí tay diriiaan. 25Kuungá' a na/'aá aaruuse, nee slám a na/'aá alqadoodá' Mungú aa qaroó alqadín dír baabi'iihúng, tidá' aa oó' dír Abrahamu gídaabá, ‘Baraá xwaylaroge xoordu sleémeero awa baraá yaamu ki tsuuq.’ 26Mungú sagadiyusmoowós kwí nguwa hhe'eés waasle/atisaro, nguri ya/aáw amorhúng geerí alé, as kuungá' nuwa tsuuqi as umuúqo heewo tlakweema ngiwa geexay.”
Currently Selected:
Tlehhema'aá ya/Abuuse 3: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
