Tlehhema'aá ya/Abuuse 2
2
Qeeruú hhoohhoó' naa hardáh
1Bál deelór Pentekoste iwa bó/, inooín sleémeero ta dír wák i dirii'. 2Fur'ár dooraá daahh niri hardát ar gaanslaay, a adór fur'ár baambao, ar fukukuu' ar /uuru. Fur'adá' do'dá' inooín i dirii'iya' sleémeero guri hatsís. 3Muruú adór tsitór asla niri ti'iít, tiri partliít, iri iwiwiít dír umuúqo heé i alé, oo dir'ín tidá' i dirií'. 4Sleémeero kiri hatsiís Qeeruú hhoohhooe. Tari axweés ar tsifrír dimbadimbé, adoodá' Qeeru ngira aleesleemuú i haniís ilawatsto.
5Baraá gixsár Yerusalemuwo múk Yahudi i deer oo Mungú gwa haratlintii', múk amór yaamaá dimbadimbé daraáhh awa baraaká' yaamu. 6Xuraidá' kawa axaás, múk yaariír iri burumburiít, tari ló'wa da'ayuút, asma umuúqo heewo gár i axamiisi a tsifrirós ar kilá' kan ar axwees. 7Sleémeero tari da'ayuút tari waa/oo/amín tari oó', “Ahaá, mukwí sleémeero axweés a múk Galilayarookáhe? 8Ahaá, baré umuúqo heewo bura iiár i qaasaán, in axwees ar tsifrirén ar kilá'? 9Atén a múk Parti nee oo Medi, oo Elami, nee múk Mesopotamiár wa hoót, múk Yudea nee Kapadokia, Ponto nee Asia, 10múk Frigiár daáhh nee Pamfilia, oo Misri nee oo Libiya, múk inslaawoó bihhaá Kirene, nee dahaayér yaamaá Rumír daahh, 11múk Yahudi, nee múk hatlá' oo diinír Yahudi gaa eehaar, múk Krete nee múk Arabu. Adoorí a idoomá kiwa axamiisaan tawa axweesi ar tsifrirén, iidíguú tlehhema'aá waa/oo/amo awa Mungú.” 12Tari waa/oo/amín, tari amoqwaqwadín sleémeero, tari ooín, “Kángw adór kwí kureeriiwo a milá?”
13Muu bahh'alé tari niqimiís tari oó', “Buurár /aben gaa oonitiimís.”
Alki/ituú Petro deelór Pentekosteero
14Petro iri sihhiít dinkwa nee ya/abuuseedá' mibá nee wak, iri tseé' ar afór ur iri oó', “Kuungá' múk Yudea, nee kuungaásingá' sleémeero baraaká' Yerusalemúr hootá', axweesanay'eé' kwí iiár i qaasaak. /Aymuuwí xuaak, 15Mukwí aa oonimiitiiká adoosíng kuungá' kar kata', asma qoomaarí a looár tám ar matlatle. 16Ala kaangwí a kudá' aarusmo Yoeli aa axweés baraá kitaábuuwose gídaabá,
17‘Mungú ina oó',
Adoorí an adoodá' ni tleehh
bál deelór alhhe'eesaywo,
aníng muu sleémeero un Qeeruueé' i haniís,
daaqayhúng nee dasuuhúng tari aariirín,
masoombarhúng iigu'utu guri aán,
nee bariiserhúng iri tlatitiín.
18Ala baldá' sagadiyuuser'eé' ar hhawaate
nee ar /ameena
ngiri Qeeruueé' oo hhoohhoó' i ku'uús,
nee inooín tari aarirín.
19Aníng muruú waa/oo/amór koóm ngu gawaá doorí wa laqaám,
nee baraaká' yaamuuwo layu ngiri laqaám,
tseere nee asla, nee ququaamoó waahamuú koóm.
20Tsee/amá iri warqáy iri giwti tleehhiit,
nee slahhaangw iri tseere tleehhiit,
dír qoomár deelór Aako nira xeeriiká,
tidá' ak ur.
21Nee umuúqo heewo oo umuú Aako gwa ateeti i ba/án.’
22“Kuungá' múk Israeli, axweesanaywí iiár i qaasaak, Yesu, heé yaamaá Nasareti, Mungú nguna dirhúng i laqaqán ar loohír muruú xuawaslén, nee layu nee muruú waa/oo/amór koóm. Muruuwí Mungú guna tleéhh ar dákw Yesu tla/angwhúng wa ale, adoodá' kuungá' kar xua'. 23Heewí kunguna haniís dirhúng, adór Mungú baraá xu'utirose ngira qoomeés iimír iimu/úngw wa ale. Kuungá' kuri kikié' ar dabaá múk tlákw, kuri gasé'. 24Ala Mungú guri gweér baraá slahha'amaayér gwa'aaraaro, guri waasle/atís, asma gwa'ara gwa aleesleeriiká ooharo. 25Asma Daudi iidíguuwós gwa oó', gídaabá,
‘Án Aako una ar'a'ár geeraaeé' wa ale daqisleeme,
asma inós i bihhaá dakw'eé' oo doó /iyáy,
as aníng mawa daaraxaát.
26Gawaá adoorihe muunuúeé' iri qwalalaá/,
aníng niri baraá/,
slám niri iwiwiít ar baraá haraxu'uti.
27Asma kuúng qeeruueé' u baraá múk aa qaátl#2:27 Múk aa qaatl Gídaabá múk yaamu. i geexeeraaká,
laqaá Heewók oo hhoohhoó' u meeraaká iwa hhitiruuti.
28Loohír amór slafíngw kaw nga aníng i xu'utís.
Aníng a haáts qwal/uuwo,
asma kuúng a dir'eé'i dirí'.’”
29“Hhaee'eé', án iiár i qaasaré', /ayma'aá niina ngi dirhúng i oó' ar pihhu'uuma, iidíguú Baabuúrén kudá' úr Daudi. Inós ina gwaá', kuri foól, nee /aantarós i diirír ayaarén i dirí' tam ay laarí. 30Slám inós a aarusmo, nee al'axweesantá Mungú aa dirós i haniís ga xuu', tidá' kah: Baraá xwaylaroge waawutmoó wák u qaás. 31Inós iidíguuwí oo waasle/uú Kristo guna ár ar baraá aaru'uuma, guri alki/iít iri oó',
‘Qeeruuwós kwa baraá gwa'arár i mayká,
nee tam slaqwtós aa hhitirutiká.’
32Yesuwí kuna waasle/atís nee Mungú, nee atén sleémeero a lamabu'uusér waasle/uuwós. 33Inós kuna tsa/aás ay dír dákw /iyáy oo Mungú, nee Qeeruú hhoohhoó' guri ilaóh dír Baabá wa ale adoodá' Baabá ngira oó'. Nee nguri ku'uús amoorén i alé. Nee hám an kaangwí kuungá' ta ga/eera' nee ta axamisa'. 34Asma Daudi inósuú kilá' aa tsa/aniká gawaá doori, ala inósuú kilá' ina oó',
‘Aako Aakooeé' guna báy,
bihhaá dakw'eé' oo doó /iyáy nay iwiiteek,
35ay dír wakuuseerók ngay gawaá dabaawók i qaas.’”
36“Gawaá adoorihe kuungá' múk Israeli, xuaak kángw kilá' wa ale, gídaabá Yesu kudá' kuungá' taa kikié' Mungú gwa Aako tleéhh, nee tawa Kristo.”
37/Aymi'iiká' kiwa axaamiís, muner'ín kari kwatiít ló'wa ale, Petro nee ya/abuusér hatlá' kay yaahamiís tari oó', “Atén adór ta laqaan, hhaeerén?”
38Petro iri oó', “Hhu'u'uumé', tundu baatimiisi ar umuú Yesu Kristo, as tlakweemaahúng kiwa gurtlay, nee daqaní kuungá' Qeeruú hhoohhoó' u sleerá'. 39Asma al'axweesantí a toohúng, nee ar na/'iihúng, nee ar muu sleémeero oo sawén, nee tam mukdá' oo taa ateeti nee Aakoó Mungú as ngu i hardahi.”
40Petro giri ló'wa lamabu'ún ar /ayma'aá hatlá' awa yaariir, nee giri gurbu'ún iri oó', “Tundu ba/amisi dír qartír sage gawdene.” 41Nee mukdá' axweesantadá' gaa haratlintii', kuri baatimiís, nee múk baldá' aa doogin a har afi qoomár kume tám. 42Tari kumiít baraá intsaahhasár ya/abuusér wa ale, nee baraá dinkwár Kríshaanáy, nee tam baraá muruú /aymár Aakoowo sleeme, nee baraá firooro.
Hotángw haratlintaauuse
43Umuúqo heewo dae guri eér, muruú xuawaslén oo yaariír nee layu kiri tleehhiít nee ya/abuuse. 44Mukdá' sleémeero aa haratlintii' tari dír wák wa iwiwiít, muruuín sleémeero a dinkwa. 45Daqaari'iimar'ín kari weeramiís, nee muruuín kudá' i kon'a kuri qasmiís dír umuúqo heewo ar hariimadá' qoom. 46Umuúqo deelooro tari dogiitiyé' ar muunuú wák baraá Doó Mungú wa ale. Muruú /aymár Aako kuna /aáy dír umuúqo dó' wa ale, muruú /aymar'ín kuri /aáy ar qwala/, nee ar muunuú /awaák. 47Mungú kuri sluufimiís, nee muu sleémeero kuri sla'atimís, Aako mukós guri tlahhás umuúqo deelooro ar mukdá' taa ba/amiimís.
Currently Selected:
Tlehhema'aá ya/Abuuse 2: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
