Tlehhema'aá ya/Abuuse 1
1
Al'axweesantá Qeeruú hhoohhoó' kuwa haniisi
1Kitaábuuduú geera nguna gooiím dír kuúng Teofilo, gawaá daanduú muruudá' sleémeero oo Yesu aa tleéhh nee oo aa intsaahhatimís iimír geeraawo, 2ay qoomaadá' inós kuwa ar tláy gawtí alé. Qoomaadae inós ya/abuuseerós tidá' aa tsawaár gaa hara'ayarós i haniís ar /uuruú Qeeruú hhoohhooe. 3Alaá gwa'araarose inós tina laqaqán dír ya/abuuse deelo mibeeri tsiyáhh ar layaá dimbadimbé, gídaabá inós i slaaf. Nee iidíguú waawuti'iimár Mungú guri axweés. 4Tam qoomár inós nee ya/abuuse tiwa doogiyé', hara'aya gari dir'ín i haniís, iri oó', “Ma ti'iitara' baraá Yerusalemuwo, ala al'axweesantadá' ar Baabá na daamaak, tidá' taa axasé' dir'eé' wa ale. 5Yohana ina baatimiís ar ma'aay, ala kuungá' tundu baatimiis ar Qeeruú hhoohhoó' alaá deeloorí niina aa meti.”
Yesu aa tsa/án
6Qoomár tawa burumburiít, ya/abuuse Yesu guri yaahás guri beér, “Qoomaarí a tidá' múk Israeli kuwa waawuti'iimar'ín i ki/ísa?”
7Iri oó', “Siiwadá' nee qoomaadá' Baabá aa qaás baraá aleesleemuuwose a gadiyérhungeeká kuungá' kawa xua'. 8Ala kuungá' /uuru u sleerá' bál Qeeruú hhoohhoó' bura sleeré'. Nee kuungá' tari lamabu'uuser'eé' tleehhitá' baraaká' Yerusalemúr wa ale, nee baraá Yudea sleémeero, nee Samaria, tam ay alhhe'eesoó yaamu.” 9Axweesanaywí ooaro nguwa hhe'eés, qoomár inooín kuwa ga/ay, inós kurir gawtí tláy, hunki guri ilaót dír ilaaín wa ale.
10Qoomár Yesu iwa gawtí tláy, muu ilaaín giri kiririhhín gawaá doori. Múk tsár iri sihhiít bihhaaín i alé oo inqwar /awák. 11Mukdá' iri oó', “Aá múk Galilaya, asma milá mas sihhimitá' tawa dooraá ga/eerá'? Yesuwí gawaá doorí tsa/a/ám ni kii/, ar adoosíng kura aandé' iwa tsa/a/an gawaá doorí alé.”
Heé taa tsawaár daanduú Yudá wa ale
12Tindiri aweér gawaá tloomár Miseitunír wa ale, tidá' bihhaá Yerusalemúr i tseew, tari kií/ ay Yerusalemu, a har qoomoó hi'itanór deelór hungu/uma. 13Tari dáh baraá do', tari tsa/án amór do'dá' taa daanduú kuqá' i tleéhh, amoodá' geeraawo tawa iwiwiít. Petro nee Yohana, Yakobo nee Andrea, Filipo nee Tomaso, Bartolomayo nee Matayo, Yakobó Alfayo nee Simonudá' yaamuuwós aleeslaáqw#1:13 Simonudá' yaamuuwós aleeslaáqw Gídaabá inós a heé wák oo yaamuuwós aleeslaáqw dír múk Rumír wa ale, kudá' yaamuuín gi sa waawuti'ii'ín., nee Yuda oo Yakobo. 14Mukwí sleémeero ina hoót ar muunuú wák baraá firooro, dinkwa nee /ameena sleeme, nee Mariamu aayór Yesu, nee hha'aá Yesu.
15Looarka wake Petro iri sihhiít dír tla/ángw hhae. Faaror'ín a tsiiruú wák nee mibeeraá tsár. Iri oó', 16“Hháe, Gooi gár kawa hariím aqo in bó/, tidá' Qeeruú hhoohhoó' aáng ira axweés ar afkuú Daudi, daanduú iidíguú Yuda. Inós an kudá' múk Yesú oohár áw gwa geerahaar. 17Inós geerawo nee atén a dinkwa, asma inós sleeme kuna tsawaár as gadiyeérí atén ta tleehhaan kawa al tleehhaan nee inós.”
18Heewí qaymo gari tlaáxw ar peésár aa sláy ar malgweét. Iri huú' ar hu'umaá tlakw. Iri pu/uút, guruuwós sleémeero iri ti'iít tsee/áy alé. 19Iidíguuwí muu sleémeero oo Yerusalemu guri xuú', tam qaymoodá' kari báy Akeldama tsifrir'ine. Gídaabárós a “Qaymór tseere”.
20“Asma kaa gooín baraá kitaabuú Daa'ángw Bara/uwo gídaabá,
‘Hotaangós i tawó iwiiti.
Slám heé baraadá' wa hoót miwa deeruut.’
Slamtí kaa gooín gídaabá,
‘Gadiyeédá' i tlehhahhiti heé hatlá' ngi oohi.’
21“Múk nee atén aga al hotaatimaan i deer, deelo sleémeero qoomár Yesu iwa ayaarén i dirii'i, tam ay bál iwa ayaarén wa tláy, 22iimír qoomaadár baatimisuú Yohana, ay bál Yesu kuwa ar tláy dirtén wa ale, kuwa tsa/aás gawaá doori. I hariín heé wák iwa lamabu'usmoó waasle/uuwós tleehhiiti dinkwa nee atén.”
23Múk tsár kuri qaás, Yosefu kudá' ta babay Barsaba, nee umuuwós oo tsár a Yusto, nee Matiya. 24Mungú kuri firín, tari oó', “Aáko, kuúng munér muu sleémeero a xú', dír mukí tsare heé kuúng taa tsawát laqaamang, 25asma pa/aangwí nguwa oohi nee gadiyeérí ar ya/abitoorí, tí Yuda aa dakuús, iri amoorós i tláy.” 26Tsawdo kari tleéhh ar loohír adór mugú'. Matiya tsawdo gari sláy, nee inós kuri harafaár tawa heé wák dír eeharuuseedá' mibá nee tsare.
Currently Selected:
Tlehhema'aá ya/Abuuse 1: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
