Mashora 1
1
Kyaasa kya irikyo Mumuyo Mweele
1Teofilo wakwa mmbee, kitabu kilya kya mbee shilekireiya mmbo kitiri mbony ta Yesu kya filya alepooka itana na ilosha fyoose, 2kutani kwafika nkonu ulya aleipowa na uwe. Nawe ammaa ivavasya vakiloshyony vakwe kwi shia ya Mumuyo Mweele valya emmbasauwa, 3valya alekoora nawo na shia shiingi, kyeeri alemaa ilyiswa ukiva, vakamanya akee na muu, kakoora nawo ando a mikonu makumi aana, neerera filya fikwaani na umangyi lwa Iruva. 4Kyeeri alekwaanannya nawo mmbo alevavasa valasheuka Yerusalemu, lyo vavereye mbele kyaasa kya Nde, kilya valeita mbony ta vayo kwakwe. 5Kyeyaamba sheelyi Yohane we mmura alebatisa nato; kyaindi yeni mmbo mushebatiswaa na Mumuyo Mweele numa ya mikonu yei myaangu.
Yesu arwa iruveeu
6Naasa kyeeri valekwaananya nawe vakammbesa veshambaa, “Ale Nndumi, kyeeri eki nkyo kusheviryaa Vaisraeli umangi?” 7Nawe kavavia. “Nshi kindo kyany imanya meendi na fyeeri efyo Nde avikye efo ushilyiny lwakwe muni-fo. 8Lyo mmbo mushewaryaa finya, elyi Mumuyo Mweele ashemusokyaa neeni mushevaa vakureeki vakwa kunu Yerusalemu, na Yudaya koose, na Samaria, na kufike kishingony kya ulana.” 9Elyi amaa irera indo, velollye indi, Yesu kaipowa na uwe ifishi lyikammbwarya kooka misony awo.
10Kyeeri vekeengera ilola efo uwe iruveeu, llyo ekeerwa na uwe, pari pari ekakava vasero vavii varee soori shaa vakasalala kufii nawo, 11vakaamba, “Yeni vandu va Galilaya a niinda elyi mwasalala mwiilolaa iruveeu? Yesu yeu aroswa na iruveeu auka kwany, mmbo ashewuyaa lyingyi indo shaasa mwallollya eerwaa na iruveeu.”
Matia avikwa ando a Yuda
12Naasa vakawuya na Yerusalemu vauka alya ifumbuny lyevangwaa lya Miseituni, lyikee kufii na Yerusalemu, ando a kirambo kyaangu. 13Kyeeri valefika vakasaama na kai, nawo ni Petro, Yohane, Yakobo, Andrea, Filipo na Toma, Bartolomayo, Matayo, Yakobo wa Alfayo, Simon Selote na Yuda wa Yakobo. 14Yeva woose mmbo vekee ando amwi veterevaa na nrima umwi nsi, ando amwi nawo veifo vaka valya Maria maye wa Yesu na vana va maye.
15Mikonu yeyo Petro kasalala yoo vakiloshyony yewo vekai (yeekena lyawo nsha iyana na makumi avii indi) kaamba, 16“Nyira, kilesenya indo mareiyo neenutyo, shaasa Mumuyo Mweele alerera kasha na kana ka Davidi. Kya mbony ta Yuda, yeto aletetera yewo valetira Yesu. 17Mashika elyi ekee ando amwi neese, kawonisa urundi elu.” 18(“Naasa nndu yeu mmbo aleura irema na fesa ya ulembi; nawe kawa uviny kariika ndeu maala akasomuka. 19Vandu woose yewo vekee Yerusalemu vakamanya; na irema lyilya lyikafishyo Akeldama ni kishomu kyawo kyeyaamba, ni irema lya samu.”) 20Mashika niindo kikee kireiye efo kitabuny kya Saburi:
Ando akwe na kuve nrapu
nta kulave nndu ashekaa-u lyingi
nndu ungyi nashesalala ando akwe.
21Naasa veefo vandu yewo vekee neese kyeeri kyoose ekyo Nndumi ekee neese, eshaangaa neesomuka, 22kupookya ubatiso lwa Yohane, kufike nkonu ulya eleipowa kweru karwa na uwe, kikooye umwi waawo nave nkureeki wa iruka lyakwe ando amwi neese. 23Vakavika-u vandu vavii, Yosefu wa Barsaba, ao Yusto, na Matiya. 24Naasa vakatereva, vakaamba, “Woi Nndumi, yewe kwiishi mirima ya vandu woose, loore ni ungau nnang'ani ya yeva vavii, 25naambo nakae kunu urundiny yelu na nruminy yei natire ando a Yuda.” 26Vakakapa kura; nayo ikawoya Matiya, nawe kasanga ando amwi na vakiloshyony valya ikumi na umwi.
Currently Selected:
Mashora 1: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
