Mashora 2
2
Maolokyony a Mumuyo Mweele
1Naasa kwikifika nkonu ulya wa Pentekoste vakiloshyony woose mmbo vekee ando amwi. 2Kukaitiwa yoona iniini lya uraato lwa finya, nalo lukaishwa kulya mmba kundo vekai. 3Vakasheyo ni findo fivakye fipalapala fya muro fikwaavye-avye fikakaya wo umwi wa valya veiyo. 4Woose vakaishurwa Mumuyo Mweele, vakapooka irera na fishomu fyeny, shaasa Mumuyo alevasimba irera.
5Neefo Yerusalemu kweefo Vayuda, vandu veereiye Iruva, nawo vaukye wo ando ulaniny. 6Naasa kyeeri yoona lyilya lyileitiwa nkuka ulya wa vandu ukasavaa, vakakusanyirya, mashika llya valevaita wo umwi ereraa kishomu kyakwe muni. 7Vakafulukyo nnu, vakaviana, “A nkyelola, yeva vakerera woose nshi Vagalilaya? 8A mmbo kyava indaany elyi wo umwi weeru eeta kishomu kyakwe ekyo awonikye nakyo? 9Vaparti na Vaamedi na Vailami, neewo vakee Mesopotamia, na Yudaya na yewo vakaa Kapadokia, Ponto na Asia, 10Frigia na Pamfilia, Misri na va taari ta Libia kulya kufii na Krene, na veny yewo vaukye Rome, wo Vayuda na vandu veeshi Iruva, 11na Vakrete-da na Vaarabu; yeva woose mmbo lwaita veereraa na fishomu fyeru luveni mbony ta mashora maniini a Iruva.” 12Vakafulukyo deny woose neetirwa nnyinyira, vakaamba, “A nkyoki eki nyira vandu? 13Kukakaa-fo na vengyi vamina, vakaamba, ‘Mmbo vannangwa mmbwari wa kyaanka.’ ”
Petro kulya Yudaya
14Lyo Petro kasalala ando amwi na valya ikumi na umwi, kaonisa unyanga kaamba, “Eni vandu va Yudaya, neeni moose va Yerusalemu, manyiny kindo ekyi, mwaranye marero akwa, 15Nshi shaasa mukusarye-fo; vandu yeva mmbanangyo-fo, mashika ulaalu ni saa isaru ta ngama; 16kyaindi kindo ekyi ni kilya kyikee kirere na kana ka nkisuku Yoeli kyeamba,
17‘Mmbo kyishevaa mikonu yeyo yeefurumya,
ni Iruva aamba,
mmbo nshepusuyaa vandu woose Mumuyo wakwa,
na vana vany va womi na va kyeny,
vasheambaa fisuku,
na vana vakoo vashelolyaa ngyende,
na vamiku vasheoryaa moorya.
18Yee, na kyeeri yekyo nshepusuyaa varundi wakwa,
womi na vaka,
Mumuyo wakwa, nawo vasheavuyaa fisuku.
19Neeny nshoraa ngyende efo nginiiu,
neefo urukeny si,
samu na muro, na nrike wa nsu.
20Nkyeere mmbo ushevaa ireema,
na mwiiri uve samu,
kulaore nkonu ulya wa Nndumi wansha,
ukee nniini nato ukee kuti ushe.
21Neeto moose ashesendaa irina lya Nndumi,
mmbwe ashekirwaa.’ ”
22“Yeni vandu va Israeli, aranyeny marero yaa; Yesu wa Nasareti, nndu ulya Iruva amoora paa kyany na shia ya ngyende na findo filandelolyo lyingi, Iruva kafitana kwany na woko lwakwe, shaasa yeni muveni mwiishi. 23Shaasa Iruva alekunda immbika kwany, shaasa eekundye uka elyo mbee, mukanrambikya vandu vakasha vakankapya nsalabeny, mmukambwaa. 24Mmbwe Iruva alenduta, kafisha mwinga wa ufu, mashika lluleidima intira-fo. 25Mashika Davidi alerera mbony takwe kaamba,
‘Shilelollya Nndumi mbee yakwe wo nkonu,
mashika elyi akee taari ya woko lwakwa usha,
shilashesinga-singa.
26Naasany nrima wakwa ukasennyo, shakapa nndoro,
neeny nshevaa nndu mwiivika nsia.
27Mashika nnyasheraa nrima wakwa uretiny-fo.
Nta nkusheningyaa mweele wafo nalyamarike-fo.
28Mmbo kuleshoora shia ya muuny
kisangu kyafo kisheshiningaa ifura.’ ”
29“Nyira wanavama, shisaryeny shirere nookaari yaa mbee yaany, mbony ta nde weeru nniini Davidi, kyeamba mmbo alefwa karikwa, na kifu kyakwe kiiyo fika inu. 30Naasa kimmba akee nkisuku eishi sheelyi Iruva mmbo alelyiiya mboo, sheelyi umwi wa ewo veshaukaa efo ufyariny lwakwe ashekaa yoo kitiminy kyakwe kya umangyi. 31Nawe muni shaasa alesongwa ilolya efyi fyoose, kasenda mbony ta iruka lya Kristo, kyeamba ufu llulentira-fo, nta mwili wakwe mmbulelyamarika-fo. 32Yesu yeto Iruva mmbo alenduta neese mmbo lukee vakureeki vakwe. 33Naasa we ekimaa isaamiswa fika woko usha lwa Iruva, na iwarya kwa Nde kyaasa kilya kya Mumuyo mweele, mmbo alepuswa simbo yei muilollye ulaalu na iita. 34Mashika Davidi muni nnyalensaama iruveeu-fo, lyo kaamba,
‘Nndumi mmbo alevia Nndumi wakwa,
salala yewe taari ya woko lwakwa usha,
35kutani shaara vakiduva vafo yoo si ya marende afo.’
36Naasany mmba shoose ya Israeli imanyi paa sheelyi Iruva mmbo alevika Yesu yeto mulenkapya nsalabeu nave Nndumi na Kristo.” 37Kyeeri valeita indo vakaokywa mirima yaawo, vakavia Petro na Varumi valya vengyi, “A lukatana inda vanavama veru?” 38Petro kavavia, kuryeny mundebatiswa wo nndu na irina lya Yesu Kristo, muwoni isaryo ngyulyamari tan, naambo muwoni simbo ya Mumuyo Mweele. 39Mashika kyaasa ekyi ni kimaruma kyany, na vana vany, na kwa yewo vakee kwaasha, neewo woose vashevaangwa ni Iruva Nndumi weeru vansheye. 40Kavautya ukureeki evaviaa findo fiingyi evaikyimbaa, kavavia, kwiiseny na irika elyi lya umini. 41Valya valeirikya marero akwe vakabatiswa, na nkonu eto vakaengerekau vandu sha fiku firaru indi. 42Vakatira ufundo lwa Varumi valya, neekaa ando amwi, neefisha nkate, neetereva.
Mikaaye ya vakiloshyony va Yesu
43Wo nndu katirwa mbwerei, ngyende shiingyi tikatanwa ni Varumi. 44Na yewo woose valekusirya-u vekee ando amwi, vakasanda masaa awo ando amwi. 45Vakakumba masaa awo na findo fyawo vetiri, na yaavya wo nndu shaasa ekee nting'i. 46Wo nkonu mmbo valekaa kulya mmba ya Iruva, vekee na nrima umwi nsi vakalya shoonga mmba kwi mmba, vakalya shoonga tawo na ifura na nrima umwi nsi, 47vakarumisha Iruva, vakavesennya vandu woose. Nndumi kafumbuta yeekena lya valya veeke ikirwa wo nkonu.
Currently Selected:
Mashora 2: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
