Mashora 10
10
Petro na Kornelio
1Kyasia kweefo nndu umwi wa Kaisaria, irina lyakwe ni Kornelio, ekee nniini wa itorito lya Vasikari lyevangwaa Kiitalia 2ni nndu nsongovisi, mwiindya Iruva, we na mmba yakwe shoose, nawe mmbo eningyaa vandu findo fiingyi fyeevekya, kava na mwiitereva Iruva kyeeri kyoose. 3Nkonu umwi (Nndumi) kamoora paa, kwikee sha saa keenda ta nsanyiny, nsu wa Iruva kansheya kammbia, “Kornelio, 4Fiterewo fyafo na firaso fyafo filefika uwe na iva kindo kyekumbuwa mbee ya Iruva.” 5Naasa ulaalu rika vandu kulya Yafa, kundevaanga-fo Simon avaangwa ni Petro. 6We mmbo akee muny wa nndu umwi avaangwaa Simon mwisisa shony, mmba yakwe ikee yoo mbai ya iruva; nawe mmbo ashekuviaa kyetana. 7Naasa nsu ulya wa Iruva arera nawe ekimaa yeenda, Kornelio kavaanga-u varundi vavii va efo kyeny kwakwe, na nsikari umwi akee nndu nsaari nnang'ani ya valya vendundyaa wo nkonu; 8nawe ekimaa ivavia filya fyatanyika fyoose kavaruma veende Yafa.
9Na elyi lya ndesi, veshendaa kufii vaafukye muriny, Petro kasaama ghorofeny naambo nandetereva, saa irindaru ta nsanyiny; 10katirwa nshaa deny, kakunda shoonga; lyo kyeeri shoonga yekeekorwa kaorya, 11kalollya efo iruveeu kurauka na kiiya kyivakye ntaraso nniini wishoolokaa, wikee nnunute na taari ta vayo iinya kikafika si; 12neefo ntarasony eto kwiifo findo fikee na muu fya wo ngata, fitiri marende aana, neefyo fikurufwaa si na ndeye ta nginiiu. 13Naasa unyanga lukansheya immbia, “Kwiipoo Petro, shisha kwalya.” 14Kyaindi Petro kaamba, “Oode Nndumi, shamashika nshilellye kindo kitefusu tara-fo.” 15Unyanga llwa lukansheya lya kavii, lwiimmbiaa, “Yefyo Iruva amfyeeremuta, yewe kulafivaange mfitefusu-fo.” 16Kindo ekyi kikatanyika kararu sele; numa ntaraso ulya ukawaryose ukawuya iruveeu.
17Naasa kyeeri Petro etirwa nnyinyira nriminy mbwakwe, nalamanyi urango lwa efyo alollya, vandu valya valerumwa ni Kornelio, vekimaa ivesa ando mmba ya Simon ikai, vakasalala yoo mwaangony, 18vakavaanga vakavesa kwakooya Simon avaangwa Petro mfo akai. 19Kyeeri ekyi Petro mmbo ekeekusara mbony ta myoorye ilya. Mumuyo kammbia, “Kwiifo vandu vararu vakeekuruuya. 20Naasa kwiipoo kweende nawo nta kulatirwa nnyinyira-fo, mashika ni yeny shavaruma.” 21Petro kaolokany kakooya vandu valya, kaamba, “Ni yeny mukeeshiruuya. A nkyokyi kyamweende?” 22Vakaamba, “Ni Kornelio nshilyi, akee nndu wa usumanu, mwiindya Iruva, akee nndu atiri irina isha kwa Vayuda woose, mmbo alevavasywa ni nsu mweele, narumi vandu kwafo, kweende kyeny kwakwe, naambo needimi ikwaaranya.” 23Naasa kavawarya vave veny vakwe.
Naasa elyi lya ndesi, Petro kakupoo ando amwi nawo, na vandu maata va Yafa vakamwiimya. 24Elyi lya ndesi vakaafukya Kaisaria. Nawe Kornelio mmbo eevavereye, emma isanyirya va mmba yakwe na vambuya vakwe. 25Kyeeri Petro ekeeyaanga Kornelio kasomuka nandemwaambya, Kammboya yoo marendeny kyemwindya. 26Kyaindi Petro kamwiipoo, kammba, “Salala, naakwa ni yeny ni nndu wa vandu.” 27Na ereraa indo kaanga na mmba, kalollya-fo vandu veengyi vakuumbyeu. 28Kavavia, “Yeni mwiishi nshi kindo kisumani kwa nndu Myuda netani na nndu wa ufyari lungyi, nta yaanga kwakwe-fo, lyo Iruva mmbo aleshiikyimba, shilavaange nndu moose ntefusu-fo. 29Nkyo kimaruma shasha elyi kwashivaanga, nta shilalemi; naasany, a shimuvese, nkyokyi mwashivaangya?” 30Kornelio kaamba, “Mmikonu iraru ileira, saa yei sheni, nnyo saa kyeenda, mmbo shekee kyeny kwakwa shiterevaa, kukava nndu asalala mbee yakwa, aree soori timikaa, 31kaamba, ‘Kornelio, fiterewo fyafo fyammitiwa, na firaso fyafo fyankumbuwa ni Iruva. 32Naasany, ruma vandu veende Yafa, kundevaanga-fo nndu avaangwaa Petro, nawe mmbo akee mmba ya nndu umwi avaangwaa Simon akee mwisisa shony, kufii na mbai ya iruva; nawe kansha kurere nawe.’ 33Llyo neeny sharuma vandu kwafo, neewe kwantana kisha elyi kwasha. Naasany yese loose mmbo lukee yaa mbee ya Iruva, naambo lwaaranyi marero moose Nndumi alekuvavasya.”
Miloshye ya Petro
34Petro kaamba, “Nkya dede shammanya Iruva nnyatiri ikundya-fo.” 35Kyaindi wo nndu eefo wa wo isanga kantana usumanu mmbo awonaa iwaryo mmbwe. 36Irero llya alerikya vana va Israeli eshambaa Nrumi ya Nsia ya ufoo ya Yesu Kristo (yeto akee Nndumi wa woose), 37kindo ekyi yeni mukiishi, kilekwaana kulya Uyuda koose, kupookya kulya Galilaya, numaya ubatiso llwa lwa Yohane; 38mbony ta Yesu wa Nasareti, shaasa Iruva alemwaamba mafura na shia ya Mumuyo Mweele na finya, nawe karingitya efo neefo erundaa mashora mesha neeshiisa woose vekee vafote ni yeto nkasha; mashika Iruva ekee nawe. 39Neese mmbo lukee vakureekyi eki va mbony toose aletana kulya urukeny lwa Vayuda na kulya Yerusalemu, mbweny valemmbwaa vembammbyaa nriny. 40Yeu Iruva kannduta nkonu wa kararu, kanniinga imanyika, 41nshi kwa wo nndu-fo, kuuta ni kwa vakureekyi valya vemmaa isauwa ni Iruva, mmbo yeseny, lulelya na ina nawe kyeeri kilya alemaa iruka auka kwa vafu. 42Kaluvavasya luvie vandu na ikureekya sheelyi yeu mmbwe alevavasywa ni Iruva nave we mmbwe mwianduya vakee na muu na vafu. 43Yeu vakisuku woose mmbo vammbikye ukureeki, sheelyi na irina lyakwe yewo vamwirikya mmbo vashewonisaa ifwaayo kya ulyamari.
Kornelio na va kyeny kwakwe vawarya Mumuyo Mweele
44Kyeeri Petro ekeerera marero yoo Mumuyo Mweele kaolokya woose valeita irero elyo. 45Na valya vakee varini, vakakusiryau, vakafulukyo, kya vandu woose valya valesha na Petro, elyi vandu va masanga nawo vanletyo simbo ya Mumuyo Mweele. 46Mashika mmbo valevaita veereraa na fishomu, neerumisha Iruva. Naasa Petro kaamba, 47“Ni vi yeto ashiidima iima vandu yeva vare valebatiswa na murwa; vandu vambwarya Mumuyo Mweele indo kimwi sha yese? 48Kavavasya vabatiswa na irina lya Yesu Kristo. Llyony valentereva neengere ikaa nawo mikonu mive.”
Currently Selected:
Mashora 10: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
