Mashora 11
11
Kindo Petro aamba kya Siri ya Yerusalemu
1Naasany vakiloshyony ewo na Vakristo vekee kulya Uyuda vakeeta sheelyi vandu va masanga nawo vambarya kirero kya Iruva. 2Na kyeeri Petro alerwa na Yerusalemu, valya va ngata ya Kiyuda yeerina vakasalala nawe. 3Vakallya nawe ulai vakaamba, “Mmbo kullenda kwa vandu valakee varini kwalya nawo?” 4Petro kapooka irera nawo waarya-dwa, kaamba, 5“Nkonu umwi mmbo shekee kulya Yafa, shiitereva, shooma, shoorya yooryeny, kiiya kikaoloka, sha ntaraso wa soori niini ikoolotwa yuuka iruveeu na taari tavayo iinya, ikashisheya. 6Shaimaiya-fo shalollya findo fikee na muu fya ngata shiingyi, fya marende aana na fya ngoroshony efyo fikuruffwaa si na ndeye teefo nginiiu. 7Sheeta na unyanga lushambaa, ‘Petro, kwiipoo, kushishe, kulye.’ 8Shaamba, ‘Oode Nndumi mashika nkwiifo kindo kitefusu kilemmanga kaniny kakwa tarafo.’ 9Unyanga luuka iruveeu lukashirouwa lya kavii, ‘Efyo Iruva anfyeremuta, yewe kulafyallwe fitefusu-fo. 10Kindo eki kikatanyika kararu, numa findo efyo fikaviirwa na iruveeu.’ ” 11Na llya yeni ekava vandu vararu vasalali yoo mwaangony wa mmba ilya lwekai, vekee varumi kwakwa vauka Kaisaria. 12Mumuyo Kashivia sheende nawo, shire itirwa nnyinyira. Vanavama eva varindaru vakaenda neeny lukandeanga mmba kwa nndu yeto; 13Kaloongoya shaasa alelollya nsu wa Iruva alesalala kyeny kwakwe na immbia, “Ruma vandu veende Yafa vandevaanga nndu avaangwa Simon Petro, 14nashekuvia marero ashidimaa ikukira, yewe na mmba yafo shoose.” 15Naasa kyeeri alepooka irera Mumuyo Mweele kavasokya shaasa alelusokya naako ni yese mapookyony. 16Neeny shakummbwa irero llya lya Nndumi, shaasa aleamba, Yohane mmbo alebatisa na mura, lyo yeni mmbo mushebatiswaa na Mumuyo Mweele. 17Naasany kwakooya Iruva muni finya toose ammbaniinga wo simbo ilya sheni aleluniinga yese luleirikya Nndumi Yesu Kristo, yeny mmbo shivaa sha vi shivakyane na Iruva? 18Llya valeeta marero yoo vakamalallya sau, vakarumisha Iruva, vakaamba, “Naasa-da Iruva allyilya na vandu va masanga vakakooya yaalashika lyeende muu.”
Siri ya Antiokia
19Naasany na valya valenyanyaka kimaruma kya ngatara ilya ilevasheya kya mbony tilya ta Stefano, vakaipoo kyaaro vakafika Foinike, Kipro na Antiokia, nawo mmbalevambisa irero llya kuuta kwa Vayuda veni-fo. 20Llyo kyaindi veengyi vawo vekee vandu va Kipro na Krene, nawo kyeeri valefika Antiokia vakarera na Vayuda wa Kigriki, veevambisa mbony shaantu ta Nndumi Yesu. 21Woko lwa Nndumi lukakaa nawo; vandu veengyi vakakusiryau, vakasora Nndumi. 22Mbony ta vandu yewo tikashefikya Siri ya kulya Yerusalemu, vakaruma Barnaba neende Antiokia. 23Nawe ekifika neelolya isarya lya Iruva katirwa nnu ni nsia, kavaikyima vengere yeenda na Nndumi kya nrima deny. 24Mashika ekee nndu nsaari aishwe Mumuyo Mweele na kikusiryo; valya valekaa kyaalu kya Nndumi vakaengereka. 25Numa kauka-u keenda Tarso nanderuuya-fo Sauli. 26Eekyimaa illolya kamweende Antiokia. Naasany ando a mwaaka moose vakakaa isiriny ilya vakalosha vandu veengyi. 27Mikonu yeyo myeni veawuya fisuku vave vakasoka vauka Yerusalemu vakandefika Antiokia. 28Kyeeri lulekwaanannya umwi waawo kasalala, irina lyakwe ni Agabo, kaawuya kisuku na finya ya Mumuyo Mweele sheelyi shaa niini ishaa kufii ulaniny koose; nayo dede ileshaa kyeeri kya Kaisari Klaudio. 29Na vakiloshyony valya, wo umwi kiinani na ivesyo lyakwe, vakarummbwa varike ngarami yaawo kwa vanavamaye vawo vakee Uyuda. 30Vakavetana indo, vakavarikya vamiku veeteterwaa ni Barnaba na Saulo.
Currently Selected:
Mashora 11: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
