Mashora 12
12
Siri yengera ikapwa
1Kwiikee fyeeri efyo fyeni mangyi Herode kasisya vandu vave siri. 2Kawaa Yakobo mwanamaye wa Yohane na usu. 3Na ekilollya mmbo kilesenya Vayuda kawuya itira na Petro nawe. Mikonu yeyo yekee mikonu ya mikate ilatiri ntarang'o. 4Kyeeri alemaa intira kammbika kifingyony maakony a ngyulimali ta vasikari vaana vaana, vamwiise naambo numa ya pasaka nansomute neenrambikya vandu.
5Naasa Petro kavikwa kifingyony. Nalyo siri ikatereva Iruva nnu kimaruma kyakwe. 6Kikava kyeeri Herode ekundye imuuta-fo, kio ekyo kyeni Petro elele nnang'ani ya vasikari vavii, ekeemfinge na mise ivii, na varingyi yoo mwaangony veeringaa kifingyony ekyo. 7Pari pari nsu wa Nndumi kashesalala yoo akai, sa ikamika kulya mmba, nsu wa Nndumi kantukuva yoo uvariny, kamwaanta kammbia, Kweete uviny. Mise ilya ikasuruka efo maakony ikawa si. 8Nsu ulya wa Iruva kammbia, “Kwiinive, kurae fyaaru fyafo.” Katana indo. Kawuya immbia, “Raa soori tafo, kwashisora.” 9Kasomuka kansora; nta nalaitumuso sheelyi ni dede kindo nsu yeto atana, we kakusara mmbo akee yorya tupu. 10Llya valeira kiringyony kya mbee na kya kavii, vakashekooya ngiri ya minya yeaanga kulya muriny, mwaango ulya wa ngiri ukarwiika to mweni. Vakasomuka vakashekooya shia imwi, nsu ulya kanra-u. 11Kyeeri Petro alemarukya-fo, kaamba, “Ulaalu shammanya na nshushwa sheelyi Nndumi mmbo anruma nsu wakwe nasheshuuta maakony a Herode ave ando ufyari loose lwa Vayuda lushevikaa nsia.” 12Na kyeeri ekeekusara efyo fyoose kashekooya amfika kyeny kwa Maria, we maye wa Yohane ulya evaangwaa ni Marko; nafo kweefo vandu veengyi vesasangyi-fo veterevaa. 13Nawe kyeeri alekakapa mwaango wa ngiri yeyo, kishinga kyimwi kyevaangwaa Roda kikashearanya. 14Kyeeri alemanya ni unyanga lwa Petro, nnyalerua mbele ngiri-fo, kyeendwa ni ifura, lyo mmbo alerisha mbele, kaanga mmba kavavia sheelyi Petro mmbo asalalyi yoo mbee ya ngiri. 15Vakammbia, “Ni ukwale lukutiri-ro!” Kyaindi we karumisha deny sheelyi niindo kikai. Vakaamba ni nsu wakwe. 16Petro keengera ikakapa; naasa kyeeri valenduya, vakallollya vakaawukwa. 17Llyony alevatukya woko naambo vamalallye, kavaongoya shaasa Nndumi alemuuta kulya kifingyony. Kaamba, “Endevieny Yakobo na valya vengyi mbony eti.” Kauka-u keenda kundo kungyi. 18Naasa kwikyikya vasikari vakeereve nnu, mmbo kyava inda kya Petro. 19Na Herode kyeeri alennduuya nalallolye, neekyivesa-vesa varingyi valya, kavavasya vawaawa. Naasa Herode kasama kooka Uyuda kandefika Kaisaria, kakaa-fo.
20Na Herode emmiswa nnu kimaruma kya vandu va Tiro na Sidoni; vakamweengya na nrwe umwi nsi, nawo vammaa iitana na Blasto, yeto mwikallya kiria kya mangyi kyeelala, vakatereva ufoo shamashika uruka lwawo llwewonisaa shoonga yuuka urukeny, lwa mangyi. 21Naasa nkonu umwi ukee n-deerye, Herode karaa masara a kimangyi, kakaa rembo kitiminy kya umangyi, karera mbee yaawo. 22Vandu vakakapa ngaya vakaamba, “Elu ni unyanga lwa Iruva muni, nshi unyanga lwa nndu-fo.” 23Naasa nsu wa Nndumi kankapa, ni llya ara nalaniinga Iruva nnduma; kalyiwa nshoka, kakumba muu kafwa. 24Irero lya Nndumi lyikaengera ikwaana. 25Na kyeeri Barnaba na Saulo valemaa iinutya urundi lwawo, vakawuya vauka Yerusalemu, vakeenda veerie Yohane evangoo Marko ando amwi nawo.
Currently Selected:
Mashora 12: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
