Mashora 14
14
Paulo na Barnaba kulya Ikonio
1Naasa vekifika kulya Ikonio vakaanga mwiindeny wa Vayuda, na shaasa llya valerera, ironda iniini lya Vayuda na Vagriki vakakusiryau. 2Kyaindi llyo Vayuda valya valandealuke vakafuluta vandu va masanga vakavaishura nrima nkasha kwa valya venkusirya.
3Naasa vakakaafo kyeeri kyaasha, vereraa na ukaari vekayo ni Nndumi, yeto alekureekya irero lya isarya lyakwe, kavalyimya ngyende na findo filandelollyo fitanwa mmbo. 4Lyo yewo vekaa miriny vakaraukana; maata vakakaa kyaalu kya Vayuda na yengyi kyaalu kya Varumi. 5Numa Vayuda veshaakana na vandu va masanga amwi na vaniini vawo vakakusara itannya varumii makasha. 6Varumi vakawonisa mbony yeto vakarishya Listra na Derbe ikee miri ya Likonia na ngyuruka ta nnyanuny, 7vakakaafo, veshaambaa Nrumi ya Nsia.
Paulo na Barnaba kulya Listra na Derbe
8Neefo Listra kweifo nndu umwi, ekee, kitongororo uka elyo awonika kwa maye, nnta nnyemwiidima irua-rua-fo. 9Nndu yeto mmbo ekee iirannya Paulo eshaamba Nrumi ya Nsia. Paulo kallola kyuumu kamanya atiri kikusiryo kya inshiisa. 10Nrumi kakooma na unyanga uniini, kammbia, “Salala shumu na marende afo.” Kasalala swany, kkapooka yeenda. 11Naasa nsemu ulya wikilollya filya Paulo atana vakaonisa ngyunyanga tawo vakaamba kwa Kilikaonia, Maruva allusheya vekee sha vandu. 12Barnaba vakamfishya Zeu, na Paulo vakamfishya Herme mashika elyi we ekeerera. 13Nkohani wa Zeu eetiri mmba yeeterevya yekee yoo mbee ya muri ulya, keende ng'umbe na ngyureto na fivaro fika yoo mwaangony, kakunda iniingya firaso ando amwi na nsemu ulya wa vandu.
14Kyeeri Barnaba na Paulo valemanya, vakarandwa soori tawo, vakaangusya yaanga kulya vanduny vakakooma, 15vakaamba, “Nyira vomi, nkikyi elyi mwatana indi? Yese neese ni vandu va vandu kimwi sheeni moose, mmbo lwamoongoya Nrumi ya Nsia, naambo mwinduke neera mbony yeti ta tangalu, na iindukya Iruva yeu akee na muu, yeu aleumba iruveeu na ulana na yeeve-da na fyoose fiifo; 16mmbwe yeto kasha alera vandu va masanga vasore shia tawo veni. 17Lyo nalare nakae nalatiri ukureeki, mashika aletana mesha, kamuniinga mmbwa yakwe yuuka iruveeu, na kyeeri kya fimu, kawuutisa miri yaany shoonga na nsia.” 18Na kwa marero yoo kikava kiroo kwawo iima nsemu ulya wa vandu ivautya firaso.
19Kyaindi Vayuda vakasha vauka Antiokia na Ikonio vakaaya mamwingyi ulya wa vandu kutani vakapa Paulo na mawe, vakanrufwa na si fika kipoo ya muri, veekusarye mmbo ammaa ifwa. 20Llo kyeeri vakiloshony vendingitye taari toose, kasalala, kaanga na kulya muriny; na elyi lya ndesi kauka-fo, keenda ando amwi na Barnaba fika Derbe.
Paulo na Barnaba vawuya na Muriny Antiokia ya Siria
21Naasa ekimaa yaamba Nrumi ya Nsia kulya muriny ulya, neewonisa vakiloshyony veengyi, kawuya-se na kulya Listra, Ikonio na Antiokia. 22Vakavangisa mirima ya vakiloshyony, neevaikima vakae iirikyony lyilya, na ekyo sheelyi nkuti lwaange umangyiny lwa Iruva na mavina meengyi. 23Naasa vekimaa ivika vamiku va siri, na itereva ando amwi nawo neekotoya, vakavavika maakony a Nndumi yeto vankusirye. 24Vakaira yoo nnang'ani ya Pisidia vakafika Pamfilia. 25Nawo vekimaa yaamba Nrumi ya Nsia efo Perge vakaoloka vakafika Atalia.
26Naasa kuuka yoo vakeenda kyaaro kya mureny fika Antiokia. Efo mfo valeterevyo isarya lya Iruva kyeendwa ni ishora llya vemmaa ilyirunda. 27Llya valefika indi vakaumbya siri, vakavaongoya findo fyoose Iruva aletana ando amwi nawo, na kyeyaamba Iruva mmbo alemmaa iruya vandu va masanga mwango wa iirikyo. 28Vakairisha-fo kyeeri kyaasha kyaangu ando amwi na vakiloshyony.
Currently Selected:
Mashora 14: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
