Mashora 15
15
Shila niini ya Siri Yerusalemu
1Vakasoka nafo vandu valeuka Yudaya, vakashelosha vandu sheelyi mulanrinwa shaasa lukee uvavaso lwa Mose, mmushidimaa ikirwo-fo. 2Naasa Paulo na Barnaba vekimaa ivakyana na vandu yewo nnu, neerouwana nawo kyuumu, siri karummbwa sheelyi Paulo na Barnaba na vengyi-se nnang'ani yawo varwe na Yerusalemu kwa Varumi na vamiku va siri kyeendwa ni mbony yeyo. 3Naasa siri ikavarika; vakaira yoo nnang'ani ya uruka lwa Foinike na Samaria, vevambisaa mbony ta yaaluka lya vandu va masanga, vandu va kikusiryo vakafura nnu. 4Kyeeri valefika Yerusalemu vakawaryo ni varumi na vamiku, vakavaongoya findo fyoose Nndumi aletana ando amwi nawo. 5Kyaindi vandu vave va siri ya Mafarisayo vaalukye vakasalala vakaamba, nkuti varinwa na ivavasya vatire uvavaso lwa Mose.
6Varumi na vamiku vakakusanyirya naambo vedimi ikusara kindo eki. 7Naasa vammaa irera findo fiingyi Petro kasalala kavavia, “Vanavama, yeni mwiishi sheelyi uka mapookyony Iruva aleshisauwa shyuuke nnang'ani yaany naambo vandu va masanga veete lya Nrumi ya Nsia na kana kakwa, neelyiirikya. 8Na Iruva yeto eeshi mirima ya vandu kavakureekya, evaningaa Mumuyo Mweele indo kimwi sha yese; 9nta nnyalevikau kilakaniso nnang'ani yeeru yese nawo-fo; kavasangya mirima yaawo na kikusiryo. 10Naasany ulaalu nkikyi elyi mukeesa Iruva mwivikaa mario singony ta vakiloshyony mario kulaore vande veru nta yese luveni lulashidimaa iipoo. 11Kuuta elyi lwiirikye sheelyi mmbo lushekirwaa kyeendwa ni isarya lya Nndumi Yesu kimwi nsi nawo.”
12Naasa shila shoose ikamalallya, vakaarannya Paulo na Barnaba vevaviaa mbony ta ngyende na findo filandelolyo, Iruva alefitana kimaruma kya nrumi yaawo kwa vandu va masanga. 13Naasa vekimaa imalallya na Yakobo, karouwa, kaamba, “Vanavama, nkyeshaaranyiny-te! 14Simion mmbo aleloongoya shaasa Iruva yoo mapookyony alevaasya vandu va masanga naambo nasauwe vandu nnang'ani yaawo vave vandu vakwe. 15Na marero a veawuya fisuku akasumana na yoo, shaasa kyikee kireiye kyeyaamba,
16‘Numa ya mbony yeti nshewuyaa,
neeny nshetanaa se mmba ya Davidi ilya ilewunduka.
Nsheitana lyingyi iwa lya vayo
neeny nshisaleesaa.
17Naambo vandu yewo valeturunya varuuye Nndumi,
na vandu va masanga woose yewo irina
lyakwa lyikeesendwa kwawo;
18Nndumi aamba, yefyo uka masookyony.’ ”
19“Kimmba niindo neeny sharumbwa indi; lulasaveese vandu va masanga valya valealukya Nndumi. 20Lyo luvavie vakwiise na utefusu lwa maruva engyi na utuusi na nyama tikee shisasande na samu. 21Mashika uka elyo kasha Mose mmbo atiri vandu vakeyaamba mbony takwe, na wo muriny na wo nkonu wa sabato tikasomwa fisomyony fya Vayuda.”
Barua kwa Vakristo valakee Vayuda
22Naasa kyikasennya varumi na vamiku na siri shoose isauwa vandu nnang'ani yaawo neevaruma Antiokia ando amwi na Paulo na Barnaba; nawo mmbo yeva, Yuda evaangwaa Barsaba, na Sila, vekee vandu va nrwe nnang'ani ya siri. Vakareiya indi neevaningya vavarwaaye na maako awo, 23Varumi na vanavama vamiku, kwa vanavama veru vakee Antiokia na Shamu na Kilikia, mukee va masanga: Lwamwidikira nnuu. 24Mashika elyi luleeta sheelyi vandu maata valeuka kunu kweru mmbo valemwaatara na marero awo, vakaeveta mirima yaany, nawo nshi yese lulevaruma-fo; 25naasa lukalollya nkisha, kimmba lwammaisanda mirwe ando amwi na nrima umwi, isauwa vandu na ivaruma kwany ando amwi na vakunde veru Barnaba na Paulo, 26nawo ni vandu valemmbika muu wawo nrengeny kimaruma kya irina lya Nndumi weeru Yesu Kristo. 27Naasany mmbo lwamurumya Yuda na Sila, vashemuviaa wo veni na marero yoo meni vaambe na kana kawo. 28Mashika mmbo kilesenya Mumuyo Mweele na yese, lulavarike mario kuuta tupu yekyo kyikee kuti, 29kyeyaamba mukwiise na findo fileniingyo firaso kwa maruva a wongo, na samu na nyama tikee shisasande na samu, na utuusi. Mukankwiisa efyo, mmbo mwantana kisha. Kaeny na ufoo.
30Naasa yewo vekimaa isamwa vakasokya na Antiokia; na vekimaa isanyirya siri shoose vakavarambikya barua ilya. 31Nawo vekimaa iisoma vakafura nnu kimaruma kya iviiryo muu indo. 32Na lyingyi Yuda na Sila, kimmba wo ni veawuya fisuku vakaikima siri na marero meengyi vakavavangisa. 33Nawo vekikaa-fo ando a fyeeri da vakasamwa nsiri vaende na ufoo vawuye kwa yewo valevaruma.
[ 34Llyo we Sila kalollya nkisha nasaefo.] 35Wo Paulo na Barnaba vakakaa kulya Antiokia, veloshaa na yaamba Irero lya Nndumi, ando amwi na vandu vengyi veengyi.
Paulo alakana na Barnaba
36Kwikyiira-u mikonu mive na mive Paulo kavia Barnaba, “Kyasia ulaalu luwuye lundelola siri ya wo muri kulya luleamba kirero kya Nndumi, lumanyi shaasa veefo.” 37Barnaba kakunda iipoo Yohane ulya evaangwa Marko neende nawo. 38Paulo nalasenyo imwipoo mashika llya evara kulya Pamfilia, nalaende nawo mashoreny. 39Naasa kukasha-u ngany nnang'ani yaawo kutani valakana. Barnaba kaipoo Marko vakaenda Kipro. 40Paulo we keepoo Sila, kakupoo, ekiterevyo ni siri nawoni isarya lya Nndumi. 41Keera kulya Shamu na Kilikia evangisaa siri.
Currently Selected:
Mashora 15: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
