Mashora 16
16
Timoteo akulunga na Paulo amwi na Sila
1Naasa Paulo kafika Derbe na Listra, na yoo kweiyo wa kiloshyony umwi evaangwaa Timoteo, nawe mmwana wa nka umwi Myuda ekee wa siri; kyaindi ndeye we ni Mgriki. 2Nndu yeu mmbo alekureekywa nisha ni siri ya Listra na Ikonio. 3Paulo kakunda yeu neende nawe, kammbwarya kanrina kimaruma kya Vayuda valya vekee taari tilya; mashika woose veishi ndeye ni Mgriki. 4Naasa kyeeri veke iira kulya miriny ilya, vakavaniingya mavavaso alya alevikwa ni varumi na vamiku kulya Yerusalemu, naambo nawo vaaringe. 5Siri tikavanga iirikyony yelyo, yeekena lyawo lyakaengereka wo nkonu.
Yoorya lya Paulo kulya Troa
6Vakaira urukeny lwa Frigia na Galatia, Mumuyo Mweele kaveema valasheenda Asia indeambafo irero elyo. 7Vekifika kufii na Misia, vakaasa yeenda Bitinia, kyaindi Mumuyo wa Yesu mulevaniinga mumu-fo, 8vakakillya Misia vakasokya Troa. 9Naasa elyi kio Paulo koorwa kindo; mmbo alelollya nndu wa Makedonia esalalyi, kantereva kammbia, “Ruuka kushelweekya kunu Makedonia.” 10Naasa kyeeri alemaa ilolya indo, llya yeni lukakunda yeenda Makedonia, mashika yese mmbo lulelollya deny sheelyi Iruva mmbo aluvaanga-fo lundeamba-fo Nrumi ya Nsia.
Ikirwa lya Lidya
11Naasa lukauka Troa na ngalava lukafika Samotrake, na nkonu wa kavii lukafika Neapoli; 12na kuukau lukafika Filipi, muri wa Makedonia nto muri nniini wa uruka lulya, ando Varome vasaamyi; lukakaa muriny yeu, mikonu mive na mive.
13Kwikifika nkonu wa sabato lukasomuka kipoo ya ngiri, lukeenda mbaambaa ya mura, lwikusarye kulakooye luwonaa-u ando esha eterevya; lukakaa rembo lukarera na vaka veiyo. 14Nka umwi, irina lyakwe avaangwa Lidya, ekumbaa fwana ya kinyanyari, ni nndu wa Tiatira, aindye Iruva, kalwarannya waarya, nawe nrima wakwe uleruwa ni Nndumi, navike nriminy marero a Paulo. 15Na kyeeri alemaa ibatiswa, we na va mmba yakwe, kalwikima, kaamba, “Kwakooya dede mushilollye shikee mwiindya Nndumi, angeny kyeny kwakwa mukae-u. Kalulelemba deny.”
Paulo na Sila vatirwa
16Naasa kyeeri lwekeenda ando alya eterevya, kishinga kimwi kyetirwa mmumuyo weemanya findo, kalukooya, nawe mmbo emmbonisya vanndumi vakwe fesa shiingyi kwa ishoro elyo. 17Kasora Paulo neese ekomaa, kaamba, “Vandu yeva ni varundi va Iruva akee uwe, vakeelosha shia ya dede ya ukiro. 18Katana indo ando a mikonu miingyi. Indi Paulo kasua, kainduka kavia mumuyo ulya, ‘Shakukyeemmya na irina lya Yesu Kristo, muuke.’ Kamuuka saa ilya sheni.” 19Naasa vandumi vakwe vekilollya sheelyi mbusha yaawo ikeereka, vakatira Paulo na Sila, vakavarufwa na si fika singireny mbee ya vaniini va muri; 20vakavarwaa kwa verumbwa mwaandu, vakaamba, Vandu yeva mmbo vakeelyamara muri weru nnu, nawo ni Vayuda; 21na lyingyi mmbo vakeamba mbony ta mikaaye ilakee ya usumanu kweru iwarya nta iilatya, mashika yese lukee Varome. 22Nsemu yeto wa vandu moose ukakupoo ukavasora, verummbwa mwaandu vakavauta soori tawo na finya, vakavavasya vakapwa na filemu. 23Na vekimaa ivakapa ngapo niini nnu vakaveera kifingyony, vakavavasya nringyi wa kifingyony navaringe nnu. 24Ekimaa iwonisa ivavaso elyi, kavaerya efo kiryeny kya efo mmba, kavafinga na minyororo. 25Kyeeri kya kio nnang'ani Paulo na Sila mmbo veketereva Iruva na ikwimmbya fiimbo fyeerumisha, Iruva na vafungwa vengyi vevaaranya. 26Paripari kukasha kidinasi, kutani sumbai na kifingyony kyarerema, na lyimwi nsi myaango ikarwiika, fifungo fya woose fikeeleliswa. 27Nringyi ulya wa kifingyo kakupoo, nawe ekilollya myaango ya kifingyo yanrwiika, koommwa usu, kakunda ikuwaa, ekusarye vafungwa mmbo vanrisha. 28Llyo Paulo alekooma na finya, kammbia, kulakuvavise-fo, mashika yese loose luiyo. 29Kaamba taa teendwa, kakillya mmba, eererema na weerei, kawoya Paulo na Sila; 30naasa kavasomuta poo kaamba, “Vanndumi vakwa, shatana-ki ndesa naambo shikooye ukiro?” 31Vakammbia, Kusirye na Nndumi Yesu, neewe kushekiaa ando amwi na va mmba yafo. 32Vakammbia Irero lya Nndumi, we na vandu woose vakeemmba kwakwe. 33Kavawarya kwakwe saa ilya sheni ya kio, kavasangya fyaasha filya fyawo, kavebatiswa, we na vandu vakwe woose kyeeri ekyo kyeni. 34Kaveende mmba kwakwe, kavadeesya shoonga, katirwa ni nsia nnu, we na mmba yakwe shoose, mashika elyi ammaa ikusirya na Iruva.
35Elyi kulekya veanduya vandu vakaruma vaniini va asikari vakaamba, “Kureeyeny vandu valya veende.” 36Nringyi ulya wa kifingyo kasheruuya Paulo mbony yeti kammbia, “Verumbuya vandu mmbo varuma mbony naambo mushelotorwa, naasa ulaalu somukeny, kweengyeny na ufoo.” 37Paulo kammbia, “Mmbo valukapa mbee ya vandu woose kulare valluutya uvingo, neese mmbo lukee Varome, na lyingi vakalweera kifingyony, noolalu mmbo vakundye iluuta-fo kirisi? Oode! Nshi indo-fo, na vashe veni vasheluuta-fo.” 38Vaniini va maaskari vakarwaaya verumbuya vandu mbony ta marero yaa; nawo vakeereya, kyeeri valeeta wo ni Varome. 39Vakavalelemba; na elyi valemaa ivasomuta poo, vakavatereva vauke kulya muriny ulya. 40Nawo vakooka kifingyony vakaanga kyeny kwa Lidya; na elyi valemaa ikwaanannya na Siri neevakaarisa, vakakweengya.
Currently Selected:
Mashora 16: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
