Mashora 17
17
Paulo alosha kulya Tesalonike vandu vakarorongya
1Kyeeri valemaa iira Amfipoli na Apolonia vakafika Tesalonike, na yoo kweiyo mmba ya Vayuda yeeterevya. 2Na Paulo shaasa eeshivye, kaanga na kulya vakai, kavesana neerouwana nao marero a mareiyo, ando a sabato isaru. 3Kavarambuya mareiyo na ivaora sheelyi mmbo kyekooye Kristo nalyiso ukiva neeruka nooke kwa vafu; na kingi-se, Yesu yeu shikee moongoya yeni mbony takwe niwe Kristo. 4Veengyi nnang'ani yaawo vakakusiryau, vakakulunga na Paulo na Sila; na Vagriki veirikye Iruva, veengyi nnu na vaka vatiri nnduma vekee veengyi. 5Na Vayuda vakalollya kififi, vakaipoo vandu vave vakee vandu va tangalu, valatiri nnduma nsha vanduny, nawo vakaumbya vandu vakaanta kituuru kulya muriny, vakeengya vandu va mmba ya Yason, vakakunda ivarwaa mbee ya vandu va muri; 6kyeeri valevatura vakaburusa Yason na vandu vengyi fika mbee ya vaniini va muri, vekomaa, vakaamba, “Vandu yeva valemfullwa ulana vamfika kunu nafo, na 7Yason kavawarya; na yeva woose mmbo vakeetana findo fikeekapana na mavavaso a Kaisari, veshambaa, ‘Kwiifo mangyi ingyi avaangwaa Yesu.’ ” 8Vakaerevise nsemu ulya wa vandu na vaniini va muri llya valeita indo. 9Vekimaa ivarya ikari lyuuka Yason na valya vengyi vakavalotora vakakweengya.
Kulya Beroya
10Na llya yeni Siri ilya ikarwaa Paulo na Sila Beroya elyi kio. Nawo kyeeri valefikafo vakaanga kiterevyony kya Vayuda. 11Vandu yeva vekee vafoo ngota valya va Tesalonike, mashika mmbo valewarya irero llya na nrima nsha, vakasununda mareiyo meele wo nkonu, naambo valole kwakooya mbony yeto ni indo tikai. 12Veengyi nnang'ani yaawo vakakusiryau, na vaka va Kigriki vatiri nnduma, na vomi vekee veengyi.
13Kyaindi kyeeri Vayuda wa Tesalonike valeeta irero lya Iruva mmbo lyikeyoongowa ni Paulo kulya Beroya, vakandefika-fo nafo vakasarya vandu neevaveesa. 14Kyeeri ekyo kyeni vandu va siri lya vakarwaa Paulo mbai ya yeve, kyaindi Sila na Timoteo vakasaa-u mbele. 15Llyo valya valeimmya Paulo kulya Atene vakawuya, nao vekaende ivavaso sheelyi Sila na Timoteo walantye Paulo uvinyadwa.
Paulo arera na vandu va Atene
16Kyeeri Paulo ekeevavereya kulya Atene neelollya shaasa muri ulya wiishwe mafwanu a maruva, nrima wakwe ukavava nnu deny. 17Naasa efo mmba ya kiterevyo ya Vayuda na veindya Iruva kavesana neerouwana nawo, ando amwi na valya venlolyaa wo nkonu singireny. 18Na Vaepikureo maata na Vaistoiko, vatiri urango, vakakwanannya nawe. Vengyi vakaamba, “Yeu ni nrung'ani, a nki akunndye yaamba?” Vengyi-se vakaamba, “Akee sheelyi ni mwaamba mbony ta maruva meny, mmashika llya ekeyaamba mbony ta Yesu na iruka lya vafu.”
19Vakantira vakanrwaa mmba ya shila, vakaamba, Ndesa lushiidima imanya kya ufundo yelu wiiya kukeererya? 20Mashika mmbo kukeende mbony shiiya maarwiny eru, mmbo lukunndye imanyany urango lwa mbony eti. 21Mashika Vaatene na veny veefo mmbeekundye imanya kindo kingyi-fo kuuta yaamba na iita mbony shiiya.
22Paulo kasalala yoo nnang'ani kavii ya mmba ya shila kaamba, Yeni vandu va Atene, nnang'ani ya findo fyoose mmbo shilollye yeni ni vandu vekusara nnu mbony ta iindya maruva. 23Mashika kyeeri shekeiira efo neefo neelollya mbony ta miindye yaany, mmbo shilelollya kitara kyerasya kyikee kireiye, KWA IRUVA NALAISHIWA. Kyasiany, yeny mmbo shimuviaa mbony ta yeto mukeemwindya kulaore mumwiishi.
24Iruva yeto atanye ulana na findo fyoose fiifo, we, kimmba akee Nndumi wa iruveeu na si, nalakaa mbeny tikeeshitane na maako; 25nta nalarundyoo mmaako a vandu sheelyi mmbo akee mwaanguye nkindo mmbwe yeto aniinga woose muu na mumuyo na findo fyoose. 26Nawe mmbo alevikafo vandu va wo isanga vauka kwa yeto umwi nsi, vakee yaa ulaniny koose, kyeeri alemaa ivavikya fyeeri filya alefivavasya uka elyo kasha, na minyanu ya efo vakai, 27naambo varuuye Iruva, na kyikava ni iwara-wara, lyo vallolye, na kikava nnyakaa kwaasha neese-fo. 28Shamashika mmbo lukee na muu efo nnang'ani yakwe, lukaruarua-fo. Shaasa umwi waany, mwireiya fyaaso aleamba, “Mashika yese loose mmbo lukee vana vakwe.” 29Naasany kimmba yese lukee vana va Iruva, nkivaa yese lukusare Iruva ni wa ngata ya saabu ao fesa ao iwe, nafyo mfindo fikee fipashe na urango na waarya lwa nndu wa vandu-fo. 30Naasa, fyeeri filya fya ireema Iruva mmbo aleva sheelyi nalalollye, indi ulaalu mmbo avavasya vandu woose va wo ando vakurye. 31Shamashika mmbo avikye nkonu yeto asherumbuya ulana yelu mwaandu kya usumanu, kwa nndu ulya alensauwa; nawe mmbo alelyimya vandu nrima nkaari wa mbony yeti elyi alenduta auka kwa vafu.
32Naasa vekiita mbony ta iruka lya vafu, vengyi vakamina; na vengyi vakaamba, lushekwaanyaa lyingyi kya mbony yeyo. 33Paulo ekimaa irera keenda kavara-u. 34Vandu maata vakakutira nawe, vakakusiryau; nnang'ani ya yewo ni Dionisio Mwareopago, na nka umwi irina lyakwe ni Damari, na vandu vengyi-da ando amwi nawo.
Currently Selected:
Mashora 17: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
