Mashora 18
18
Paulo kulya Korinto
1Numa ya findo efyo, Paulo kauka Atene kafika Korinto. 2Kalollya-fo Myuda umwi avaangoo Akila, awonikye Ponto; nawe mmbo asheye auka Italia mikonu ya kufii, ando amwi na nkawakwe Priskila, ni llya Klaudio emmumbuta Vayuda woose wooke Rome, nawe kafikya kwawo, 3na kimmba ishora lyawo lya waarya lyekee lyimwi, kakaa kwawo, vakarundya ando amwi, mashika verunda mashora eefuma meema. 4Wo sabato karera efo mmba yeeterevya, naambo noomwi Vayuda na Vagriki.
5Naasa kyeeri Sila na Timoteo valesoka vauka Makedonia, Paulo kavangisa nnu irero llya, ekureekyaa Vayuda kyeyaamba Yesu ni Kristo. 6Vekillya nawe ulai na yaarara Iruva, kasisika soori takwe kavavia, “Samu yaany imusheye uwe ya mirwe yaany; yeny nshitiri mbese-fo, uka ulaalu mmbo nshendaa kwa vandu va masanga.” 7Kooka-u kaanga mmba kwa nndu umwi avaangwaa Tito Yusto, mwiindya Iruva, nawe mmba yakwe mmbo yekee nnyanu na kiterevyo kya Vayuda. 8Krispo, nniini wa kiterevyo ekyo, kakusirya Nndumi ando amwi na mmba yakwe shoose. Kyeeri Vakorinto veeta indo, nawo vakakusiryau, vakabatiswa. 9Nndumi kavia Paulo na yoorya kio, kulairyee-fo, rera, nta kuladeerye-fo, 10mashika yeny shikee neewe, nta nkwiifo nndu akupaana-fo, nyelyi yeny shitiri vandu veengyi kunu muriny yeu. 11Kakaa-fo ando a mwaka umwi na miiri irindaru eelosha-fo Irero lya Iruva.
12Kyeeri Galio ekee nshilyi wa Akaya, Vayuda vakaanta kituuru na Paulo, vakamweende ishenkumba, 13vakaamba, “Nndu yeu mmbo akee yoomwa vandu vaindye Iruva kafisha mavavaso.” 14Naasa Paulo ekundye itarambwa kana narere, Galio kavia Vayuda, “Kukooye kweiyo kindo kyantambo ao kikasha, yeni Vayuda, kyevaa usumanu yeny shiirikyani neeni; 15kyaindi kwakooya ni mbony ta marero na marina na mavavaso any, Loleny efyo yeni muveni, mashika yeny nshikundye iva mwianduya findo sheefyo-fo.” 16Kavafuna vakauka alya mbee ya kiri kilya kya mwirumbwa myaandu. 17Nawo woose vakatira Sostene, nniini wa kiterevyo kya Vayuda, vakankapya yoo mbee ya kitima ekyo. Galio nalalollye nkindo.
Paulo awuya lyingyi Antiokia
18Numa ya mbony eti Paulo keengera ikaafo mikonu miingyi numa kasamana na siri naambo neende Shamu na ngalava; na Priskila na Akila vakeenda nawe, kyeeri alemaa yuuta fii ta alya Kenkrea, mashika emmbika kyaasa 19Vekifika Efeso kavatiya-fo. We muni kaanga kiterevyony kya Vayuda karera nawo. 20Lya valekunda nakee-u mmwasi we kalema; 21we kalakana nawo, eshaambaa, shimuwuiyaa-se kwakooya Iruva akunda. Kasaama ngalava kooka Efeso, 22na kyeeri alefika Kaisaria, keedikira siri, naasa kasokany na Antiokia. 23Naasa ekyikaa-fo mikonu mive na mive kakupoo, keera yoo nnang'ani ya uruka lwa Galatia na Frigia, muri kwi muri, ekarisaa vakiloshyony.
Apolo akeelosha Efeso na Korinto
24Naasa Myuda umwi irina lyakwe ni Apolo, awonikye Aleksandiria, ni nndu asomyi deny, kafika Efeso, nawe ekee ntakusu wa mareiyo. 25Nndu yeto mmbo elloshwa shia ya Nndumi; na kimmba nriminy wakwe etiri nkukumo, kapooka irera na ilosha mbony ta Yesu songosiny deny; lyo we mmbo eeshi ubatiso lwa Yohane weni. 26Kapooka irera nookaari kiterevyony kya Vayuda, na kyeeri Priskila na Akila walemwiita vakanrwaa kwawo, vakallosha shia ya Nndumi nisha mmwasi. 27Na kyeeri ekundye iruuka yeeve neende Akaya, siri ikareiya, vareiye vakiloshyony barwa naambo vambwarye; nawe kyeeri efika-fo keekya nnu valya vemmaa ikusirya-u kwi isarya lya Iruva. 28Mashika mmbo evinga Vayuda nnu kyuumu vandu woose velollye, ewooraa na mareiyo sheelyi Yesu ni Kristo.
Currently Selected:
Mashora 18: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
