Luka 13
13
Alashikeny nrima mulasherumaka
1Naasa fyeeri filya kweesheye nafo vandu valemwoongoya mbony ta Vagalilaya valya Pilato alesasanda samu yaawo na firaso fyawo. 2Nawe kaalwa kavavia, “A ndesa mmbo mukusarye Vagalilaya yewo mmbo vekee vandu valyamari vakeerya Vagalilaya vengyi woose elyi valeliswa indo ukiva?” 3Nshi indo-fo! Mmbo shamuvia, “Kwakooya mulashaalashikaa nrima ni indo mushesarumyaa moose! 4Naasa na vandu valya ikumi na nyanya valya valewoyo ni nnara kulya Siloamu, ukavawaa. A nyira mukusarye mmbo vekee varekwa vakairyaa vandu valele Yerusalemu woose?” 5Nshi indo-fo! Mmbo shamuvia, “Kwakooya mulashaalashikaa nrima ni indo-da mushesarumyaa moose!”
Kyaaso kya nkuu ulavikye nndunda
6Nawe kaveera kyaaso kyikee ule, “Kweefo nndu eetiri nkuu wakwe wa nndeny ukee nronge efo nndeny wakwe wa misabibu. Kasha isya-u ndunda nalaoni. 7Nawe kavia ulya mwiiremmya misabibu, ‘Lla-te kwansia myaaka iraru uka elyo shilepooka isya ndunda kunu nkuuny yeu shilawonise. Umanyiny-te! Nkyiki elyi wakuvisa sumbai ruu?’ 8Nawe kaalwa kambia, ‘Nndumi kuureye-u mwaaka yeu umwi-da, neeny shiuremyi na iwaalya kirashi. 9Kulakooye uvikaa ndunda kyeeri ekyi kishaa. Kilave indo llyo kusheumanyaany.’ ”
Yesu ashiisa nka umwi nkonu wa Sabato
10Naasa eefo eloshaa efo mmba yaawo imwi yeeterevya elyi lya Sabato. 11Nalyo akakau nndu nka eefo atirwa mmumuyo nkasha ullweesye ando a myaaka ikumi na nyanya. Nawe kakulema nta naleedimi yooroka shumu. 12Naasa Yesu allolya kammbaanga na yoo akai, kammbia, “Nka kwameeyauwa unana yelo lwafo!” 13Kamweekerya maako. Nalyo yeni kaoroka, kapookany iitikisa Iruva. 14Nalyo ulya nniini wa mmba ilya yeeterevya kasukyo elyi Yesu akyira vandu nkonu wa Sabato. Kaallwa, kavia vandu valya vakuumbye-fo, “Mmbo kwiifo mikonu irindaru isumani irunda nayo. Naasa niyo musheshaa nayo ishekirwa nta mulashe nkonu yeu wa Sabato.” 15Nalyo Nndumi kanndouwa kaamba, “Mmbo mukee vakunang'ari-te! A kunu kwany nshi wo nndu ashauwaa shau yakwe ao nshungu wakwe efo nguvanuny, katiauwa kandetiniinga mura, nkonu na ukava wa Sabato? 16Afikaany yeu akee wa ufyari lwa Abrahamu na satana kamfinga myaaka yei ikumi na nyanya myoose, a nshi kyeemaa naauwa elyi akee mwiinive indo, nkonu na ukava wa Sabato? 17Nalyo elyi arera indo, vakatirwa nsony woose valya vantirye kiduva. Na valya vakuumbye-fo mamwiingyi vakafura woose kya findo fya wiitori fitanwaa mmbwe.”
Kyaaso kya mbeu shidu ya Haradali
(Mat 13:31-32; Mar 4:30-32)
18Naasa kaamba, “A umangyi lwa Iruva mmbo lufwanani neekyi, nalo nkindo kyingakyi nshelwananisaa nalo? 19Mmbo lufwanani na mbeu ya haradali, na Nndu kaiipoo, Kandeyeera efo nndeny wakwe. Nayo ikang'ana ikava nri nniini na ndeye ta nginiiu tikakaa efo marambeny avayo.”
Kyaaso kya kinruwo kitarang'aa
(Mat 13:33)
20Nalyo kawuya kaamba, “A nkyikyi nshiinanisaa nakyo umangyi lwa Iruva? 21Mmbo lufwanani na kinruwo kitarang'aa kyifumbisaa nswa.”
Mwaango ni nsiise
(Mat 7:13-14, 21-23)
22Nalyo kawara shia karumbwa muriny kwi muri na fimuriny asheloshaa-fo. Kavaany arwaany na kulya Yerusalemu. 23Nalyo kakooya nndu ambia, “Yewo vakoyaa ikirwa ni vaangu ndesa?” Nawe kavavia, 24“Kapanyiny ngiri yeyo shisiise mukooye yaanga nafo! Mashika shamuvia, kwiifo veengyi vasiaa yaanga nafo valashiidimaa.” 25Mukammbera muni kyeny kakwipoo na iraya mwaango, neeni kwakooya llyo mwapooka isalala yoo poo na ikakapa mwaango na yaamba, “Woi Nndumi luruye mmba, nalyo ashallwaa, ‘Nshimwiishi kundo muukye-fo!’ 26Llyo mushepookaa yaamba, ‘Mmbo lulelya shoonga na ina yoo usanguny lwafo-te, na efo minyanuny yeeru mfo kundo kulelosha.’ 27Nalyo asheambaa, ‘Mmbo shamuvia, nshimwiishi kundo muukye-fo. Shyuukeny yeni moose mutannyi fya kiila!’ 28Nafo kushekaa-fo ikapa kiiyo na irafunnya mayoo, elyi mushelolyaa Abrahamu na Isaki na Yakobo na vakisuku valya woose vakee efo umangyiny lwa Iruva, neeni muveni musheerwa efo poo. 29Nalyo vasheshaa vandu vauka taari ya ngama na ya nkwaany na nturu na ya sinde vashekaa rembo valye shoonga efo umangyiny lwa Iruva. 30Neeni manyiny, va numa vashevaa va mbee, na vambee vashevaa va numa.”
Yesu aiya kya Yerusalemu
(Mat 23:37-39)
31Nalyo saa ilya sheni kasheywa ni Vafarisayo vaangu. Vakammbia, “Kwipoo kuuke yaa kukai! Mashika Herode arie ikuwaa!” 32Nawe kavavia, “Endevieny iparwe elyo, akakau shiifo nshantaa mimuyo mikasha na itana mashora eshiisa vandu inu na ndesi. Na nkonu yeto wa kararu nsheinutyony. 33Indi kuti shilunge kyaaro kyakwa inu na ndesi na nrondo. Shamashika nkivaa nndu nkisuku narumatyo ando engyi kulaore ni kulya Yerusalemu-fo.” 34“Yewe Yerusalemu! Yewe Yerusalemu! Kukee mwiwaa vakisuku na yewo varumwa kwafo kwaveera mawe! Ni keengyi sheekundye yuumbya vana vafo shaasa nguku ishyuumbya fivana ikasikya na maaru. Neeni mulakunde. 35Llen-te mmba yeyo yaany mushereywaa ikee irama. Mmbo shamuvia, Mmushekishilolyaa-se-fo kutani kwafika kyeeri elyi musheambaa, ‘Kundearafumwa yeu asha arumwa ni Nndumi!’ ”
Currently Selected:
Luka 13: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
