Luka 14
14
Yesu ashiisa nndu afummbye malungo nkonu wa Sabato
1Naasa kikava elyi aleanga na efo mmba kwa nsongoru wa Vafarisayo elyi nkonu wa Sabato nandelya-fo shoonga, nawo vakava vanreiyaany. 2Nalyo akakau nndu alwee ndwari yeefumbisa malungo ansha nang'u asalalyi yoo usumanu nawe. 3Yesu kapooka irera, kavia valya vakufunndye-mavavasyo veefo na Vafarisayo, kaamba, “A ndesa kwiiyo mumu weeshisa nndu nkonu yeu wa Sabato ao oode?” 4Vakamalallya sau. Nawe kampaana kanshiisa kansama. 5Kawuya kavavia, “A kunu kwany kwiifo nndu ndesa akooya nshungu wakwe au shau yakwe yammooloka irininy lya mura, nawe kara nalaangusya iyoomwa-fo swany, naakwa ni elyi lya nkonu wa Sabato?” 6Nawo valeedimi irouwa kilya aamba.
Kya ikunyiisa
7Nawe keera valya vavaange kyaaso, elyi alolya shaasa vakusawuya marembo a mbee, kavavia, 8“Kwavaangwa walyiny ni nndu nta kulakunde ikaa kirembo ekyo kya mbee-fo, kukooyaa kwiiyo nndu nniini akwiilanyi akee mmbaange. 9Na ulya alemuvaanga nashekuvia, ‘Seiya yeu-te!’ Nalyo yewe kuti kukwiipoo kundekaa kirembo kya efo numa kwisukaa! 10Indi kwavaangwa enda kundekaa kirembo kya efo numa, na yeto akuvaanga kasha nang'u nakuvie, ‘Mbuya-akwa serikya efo kya mbee!’ Llyo kushewonisaa nnduma, na valya mukeelya nawo shoonga velollye woose. 11Shamashika wo nndu akwaallwa nniini we muni akaa nanyiiswa neeto akwaalla n-du we muni akaa naroswa.”
12Naasa kavevia na ulya ambaanga, “Kwafika ikora shoonga yevaangya vandu ya ngama ao ya nkwaany nta kulashevaanga mbuya yeto tafo-da-fo nta vanavamau-da-fo, nta vaufyari lwafo-da-fo, nta vandu va nnyanu vakee masimba-da-fo, naambo nawo vakuvaange ikamba lyawo kive ni kileko vakutaa. 13Indi kwafika ikora shoonga yevaangya vandu, vaanga vakiva na fisaya na yewo vakee miketekete, na yewo vafu miso. 14Neewe llyo kushevaa nndu wa ngoma, kyimmba valatiri kindo kyekutaa mmbo kushetawaa yoo marukyony a yewo wa usumanu.”
Kyaaso kya sukukuu
(Mat 22:1-10)
15Naasa elyi veefo valyaa shoonga, ulya umwi ammiita Yesu arera indo kammbia, “Ngoma nndu ashelyaa shoonga efo umanginy lwa Iruva!” 16Na Yesu kammbia, “Kweefo nndu alekora shoonga shiingi tevaangya vandu, kavaanga veengyi. 17Naasa kyeeri shoonga tilya tileya, karuma ishinga llya lyakwe, lyindevia valya vakee vaarye nrumi, kusheyeny fyoose fyammaa ideesyo. 18Naasa vakapooka na nrwe umwi nsi iviira nrumi ilya. Ulya wa mbee kammbia, ‘Shammuura irema, na shakyi kuti shyeende ilyisengera. Shakutereva manya mmbo shammbiira nrumi ilya.’ 19Na ulya ungyi kaamba, ‘Na yeny shammuura nguleta teengya mapaleny araanu, shiifo shindeteesaa. Shakutereva manya mmbo shammbiira nrumi ilya.’ 20Na ulya ungyi kaamba, ‘Na yeny shammaalyika nka, nkyo kindo kyashiima isha.’ 21Ishinga llya lyikafika kyeny, lyikanderuuya nndumi ulya wakwe mbony tilya. Nalyo ulya muni kyeny karooywa ni ngoo, kavia ishinga llya lyakwe, ‘Iluya kundefika shieny niini na shieny ta efo muriny, kundeende valya vakiva na fisaya na vafu miso, na fitongororo vashe na kunu.’ 22Ishinga llya lyikasha lyikaamba, ‘Kyammeeva indo-da shaasa kwavavasya, indi kwasaa-u mwaanya.’ 23Nndumi ulya kavia ishinga llya lyakwe, ‘Enda kufike efo shia, na efo minyanuny, kundevaitika vashe yaanga na kunu mmba, mmba yakwa iishwe. 24Mashika shamuvia, valya vakee vaarye nrumi nta umwi nnashelongwaa shoonga yakwa-fo.’ ”
Nndu asumani iva wa kiloshyony kya Yesu
(Mat 10:37-38)
25Naasa vandu vakeenda varyani nawe nkuka. Nawe kavaindukya kavavia, 26“Kwakooya nndu akusheya na kwakwa kara nalasua ndeye na maye na nka na vana na vanavamaye na vamfwamaye, navesanda-u na muu wakwe muni, we nnyashiidimaa iva nndu wa kiloshyony kyakwa-fo. 27Nndu kara nalakurika nsalaba wakwe muni nashilatye yoo numa, we nnyashiidimaa iva nndu wa kiloshyony kyakwa-fo. 28A mmbo kwiifo nndu wa kunu kwany akunda itana nnara kara nalakaa mbele rembo neekeni efyo ashelekeiyaa-u namanyi kwakooya atiri fya iinutya mashora yoo? 29Naambo nalakooye ammbika mawe a uvasha nalemwa imarisya. Nalyo vandu vallollyaa vapooke inseka woose, 30veshambaa, ate nndu yeu alepooka itana mmba naleedimi imarisya. 31A mmbo kwiifo nndu mangyi ndesa akwiipoo nandekwaananya na mangyi ingyi kya ikapana, kara nalakaa mbele rembo navike shila namanyi kwakooya ashiidimaa indekapana na ulya arye fiku makumi avii nawe muni kakooya arie fiku ikumi tupu? 32Kwakooya kilavaa mmbo ashutaa varumi veerumya ulya ekee kikwaasha, nandevesa kyindo kyeetana kuwonike ufoo. 33Naasany neeni ni kiwo-da, Wo nndu wa kunu kwany ara nalalakana na findo efyo atiri fyoose nnyashiidimaa iva nndu wa kiloshyony kyakwa-fo.”
Mmbala wa iturya
(Mat 5:13; Mar 9:50)
34Naasany mmbala nkindo kisha. Indi mmbala kwakooya wammba iturya a kindo uwuyaa iroliswa nakyo nkyokyi? 35Mmbukivaa-se nta ivika sumbai iwaallwa kirashi-fo. Mmbo vasheweeraa efo poo. Yeto atiri maarwi eyaaranya navearanya.
Currently Selected:
Luka 14: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
