Luka 15
15
Kyaaso kya ishonri lyirekye
(Mat 18:12-14)
1Naasa vadedemi veefo vensheyaa woose na valyamari vashemwaaranya. 2Na Vafarisayo vasasangyi na veelosha mavavaso vakarininda vakaamba, “Yeu mmbo awarya valyamari kalya nawo shoonga.” 3Nawe kaveera kyaaso kaamba, 4“Ndesa kunu kwany ni nndu ungau akooya atiri moonri iyana, kareta-u lyimwi, nawe nare nalatiiya alya makumi keenda na keenda kulya kasa nandevingya llya lyirekye kutani alyikooya? 5Kammelyikooya nalyivike mevee-u etirwa ni nsia. 6Kamfika kyeny kwakwe kandevaanga mbuya takwe na vandu va nnyanu vakwe, navavie kesangeny neeny mwiifuraa, mashika yoonri llya lyakwa lyeerekye ekakalyi shallyikooya!” 7Na yeny shamuvia, “Efo iruveeu ni indo-da kukaa-fo nsia kya nndu llyamari umwi elyi aaluka, ngota kya vandu va usumanu iyana valatiri kimaruma kya yaaluka.”
Kyaaso kya shilingyi irekye
8“Ao ni nndu nka ungau eefo atiri shilingyi ikumi, kareta-u imwi, nawe nare nalaata kimwii na yaaiya mmba na iruuya na sina kutani aikooya? 9Kammeikooya mmbo andevangaa vaka vambuya na va nnyanu navavie kyesangeny neeny mwiifuraa mashika shilingyi ilya yakwa sheeretye akakai shammeeikooya. 10Na yeny shamuvia, ni indo-da kukaa-fo nsia efo kwa vasu va iruveeu kya nndu llyamari umwi elyi aaluka.”
Kyaaso kya mwana nreti
11Kawuya kaamba, “Kweefo nndu etiri vana vakwe vavii va womi. 12Na ulya mwanawo wa nndu kavia ndeye shiniinga kyenga kya masaa yoo eefo, ekyo kikwaani neeny. Nalyo kavaavya umasi llwa lwiiyo. 13Nalyo mwana ulya mwanawo wa nndu kavera mikonu myaangu. Kaumbya findo filya fyoose ando amwi. Kasama naambo nandekaa uruka lwa kwaasha. Nafo kanyanyatya-fo masaa alya akwe esindi na vandu va ngula. 14Naasa elyi ammaa findo fyoose, uruka llwa lukawoywa nshaa shiniini nnu. Nawe muni kapooka ifikyo mfindo. 15Nalyo kawara shia kandekunanavya na muni kyeny umwi wa uruka llwa. Nawe kanruma efo mareminy akwe, nandeisa-fo nguve. 16Nalyo kava alangany makanda alya alyiwaa nnguve tilya, kulakae-fo nta nndu anniinga kindo. 17Naasa kakwiindukya we muni kaamba, ‘Varundi vakee efo veekya kwa nde-yaakwa vafye indo, mmbo vatiri fyeelya fiingyi filasiaa. Neeny shatana shafiiya nshaa kunu!’ 18A shikwipoo shindefika kwa nde-yaakwa shimmbie, ‘Woi nde, mmbo shilelyamara kya efo iruveeu na yoo usanguny lwafo! 19Nshikisumani-se ivaangwa ni mwana wafo-fo. Shaallwa shive umwi wa varundi vafo.’ 20Nalyo kakwipoo keenda kulya kwa ndeye. Elyi akee kwaasha ndeye kallollya, kavavyo mmuu, keenda eerishaa, kallingilya singony kammiminda.”
21“Naasa mwana ulya kammbia, ‘Woi nde mmbo shilelyamara kya efo iruveeu na yoo usanguny lwafo! Nshikisumani-se nta ivaangwa mwana wafo-fo!’ 22Naasa ndeye kavia mashinga alya akwe, ‘Angusyeny mundeende soori ya wuuru mumbike na nrashi efo wokony, na fyaaru. 23Muvendeende na ngashe ya shau ikee shivanri mwiishishe. Neese ndifony lulye lukese! 24Kimmba mwana yeu wakwa efiiye kawuya iruka. Erekye kawuya ilollyo.’ Nalyo vakapooka indekesa.” 25Naasa mwana ulya vavaye wa nndu kakooya akee ireminy. Nalyo elyi eefo ashaafukyaa kyeny keeta kwiireraa finanda na ufina.
26Nalyo kavaanga umwi wa mashinga alya kansununda nammbie kindo ekyo kiifo nkyokyi? 27Nawe kammbia, “Ni mwanamau ansha. Na ndoo kanshishya ngashe ilya shivanri, kimmba awuya immbwarya akee na muu. 28Naasa kafulukwa nta nalakunde yaanga na mmba. Naasa ndeye kasomuka na poo kandellelemba.” 29Nawe kavia ndeye, “Lla-te yeny shileva mwikurundya myaaka miingyi indo nta ivavaso lyafo lyimwi shilalyiimbwe. Neewe nta kulakunde ishiniinga nta ngurana ya mburu shifure ando amwi na mbuya takwa. 30Indi mwana yeto wafo alemaa masaa afo moose asangyi na vaka va shia, kwallollya ashe we kwanshishya ngashe shivanri.” 31Nawe kammbia, “Mwana wakwa, mmbo kusindi neeny fyeeri fyoose, na fyoose fikee fyakwa fikaveva fyafo. 32Kya indi yese mmbo lwalollya kuti lufure na ilooka kimmba mwanamau yeu mmbo efiiye kawuya iruka, mmbo eerekye kawuya ilollyo.”
Currently Selected:
Luka 15: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
