Luka 17
17
Misindara
(Mat 18:6-7, 21-22; Mar 9:42)
1Naasa kavevia-se valya vakiloshyony vakwe, “Nkivaa misindara ire ilasha-fo; indi nndu yeto misindara ishaa yeendwa mmbwe, oshiny lwakwe! 2Mmbo kyeesumani nafingyo isewe efo singony nandeerwa efo yeeveny, ngota yeengye yewo vafwafwa nsindara naakwa ni yeto umwi waawo. 3Kwiiseny muveni-te! Kwakooya mwanamau alyamara nrerye na kwakooya arumbuya mfwaaye! 4Na kwakooya akulyamarya matorito mfungare nkonu umwi-da kakuwuiya kaamba, ‘Shanrumbuya!’ Neewe kyevemfwaaye-da!”
Kyikusiryo
5Nalyo varumi valya vakavia Nndumi, “Lweengerye kyikusiryo kyeru!” 6Naasa Nndumi kaamba, “Kukooye mwetiri kyikusiryo kifye sha mbekye ya haradali, mmbo mweeviaa nri yeu wa nkuu iluka kweende efo yeeveny, nato wemwirikyaa.”
Kya ishinga
7“A nndu wa kunu kwany ni ungau akoyaa atiri ishinga lyiremaa na ng'umbe, ao yiisa findo, kakooya lyasha na kyeny lyuuka ireminy, nawe nalyivie, ‘Angusya isha kukaa rembo, kulye shoonga!’ 8Nshi indo-fo! Mmbo alyiviaa, ‘Songosya shoonga nshelya nkwaany, kusheny kukwiinive kushifurukanyi shitani shalya na ina. Shammaa llyony neewe kushekulyiiyaa na ina.’ 9A mmbo mwaamba asheviaa ishinga elyo aika, elyi lyatana shaasa lyikee ivavasye? 10Neeni ni kiwo-da, Kwakooya mwantana fyoose mukee vavavasye, ambeny lukee mashinga a mweelu! Mmbo lwatana efyo tupu lweevavasyo lufitani.”
Yesu ashiisa vandu ikumi vatirwa ni ivave
11Nalyo kikava elyi arie kyaaro kya yeenda Yerusalemu, nawe muni eefo erumbwaa kulya Samaria kufiitani na Galilaya. 12Elyi afika yaafukya kundo kwa muri, kakwaanannya na vandu ikumi vatirwa ni ivave. 13Vakoonisa ngyunyanga veshambaa, “Woi Yesu woi Nndumi weeru! Lulyillye ukiva lweru!” 14Nawe kavavia, “Kweengyeny mundekoora efo kwa vakohani!” Naasa veefo vasheendaa vakeeremuka. 15Naasa ulya umwi eekilolya ammishia, kawuya kwa Yesu eng'anisaa Iruva na unyanga uniini. 16Kashekweera yoo marendeny a Yesu, kamwaana, nawe ni nndu wa kulya Samaria. 17Nalyo Yesu karouwa kaamba, “A vandu veremuka nshi ikumi? A valya keenda valla kwi? 18A ndesa nkwawonika-u awuya isheetikisa Iruva, kulaore ni nndu yeu nawe kaveva muny?” 19Naasa kambia, “Kwankusirya-u indo nkyo kyakukira!”
Isha lya Umangyi lwa Iruva
(Mat 24:23-28, 37-41)
20Naasa Vafarisayo vakavesa Yesu, “A ni indii umangyi lwa Iruva lusheshaa?” Nawe karouwa, “Isha lya umangi lwa Iruva llyivaa isununda-fo! 21Nta llushambawaa, akakalu kunu! Ao akakalo kulya-fo. Mashika lleny-te, umangyi lwa Iruva ni efo nnang'ani yaany lukai!” 22Naasa kavia valya vakiloshyony, “Kukaa kushe fyeeri elyi mushelangaa ilollya mikonu yeyo ya Mwana yeto wa nndu, nta umwi tupu mulaulolyaa. 23Nalyo vandu vashemuviaa, Ekakau kunu! Ekakato efo! Neeni nta muleende-fo nta mularishe nafo-fo! 24Mashika shaasa ukova lushakaa paa luuka marayony a ngina taari yei lukafika marayony a ngina taari yei ingyi lwivevaa paa, na Mwana yeto wa nndu ni indo ashevaa elyi kufikaa nkonu yeto wakwe. 25Indi kindo kyikee kirummbwe kishesongwaa immbonisa ni indeliswa ukiva wiingyi na iminwa ni vandu va irika elyi. 26Na shaasa kileva fyeeri filya fya Noe ni indo kishendaa elyi kufikaa fyeeri efyo fya Mwana yeto wa nndu. 27Mmbo valeva veelya na ina na yaalyika na yaalyikwa kutani kwafika nkonu ulya Noe aleanga na efo isandukuny llya iniini. Nalyo yeeve ilya ikasha ikavarumata woose. 28Nakyo kyikafwanana na kyilya kileutika fyeeri filya fya Loti. Mmbo veefo vellyaa na ina na yuura na ikumba na ivaakya na itana mmba tawo. 29Naasa nkonu ulya Loti alekwiipoo kulya Sodoma, kukooloka mbua ya muro na kibiriti yuuka na efo iruveeu ikavakomba kombi. 30Na elyi kufikaa nkonu yeto Mwana yeto wa nndu ashefumaa nato paa, ni indo-da kishendaa. 31Nkonu yeto nndu akooyaa akee efo mmbeu na fiiya fyakwe fikee efo mmba, nta nalaoloke-fo nandefipoo-fo. Na nndu akooyaa akee ireminy ni kiwo-da nalawuye na numa. 32Kyekummbweny nka ulya wa Loti. 33Nndu katambalya ikyira muu wakwe, mmbo asheuretaa. Na nndu kakuretya, mmbwe akooyaa ikaa nato. 34Mmbo shamuvia, vandu vavii vakooyaa valele kitareny kimwi. Yeto umwi awarywaa, na yeto ungyi narewa-u. 35Kuvekaa-fo na vaka vavii vakee ando amwi vesaa nswa. Yeto umwi awarywaa na yeto ungyi narewa-u. [ 36Vandu vavii vakooya vakee ireminy, nawo yeto umwi awarywaa na yeto ungyi narewa-u.]” 37Nawo vakarouwa vakaamba, “A nkwi, Nndumi?” Nawe kaamba, “Kundo kuwoye nnying'a na mamutony mfo kundo ashekuumbyaa.”
Currently Selected:
Luka 17: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
