Luka 18

Kyaaso kya nka wa ding'u na nndu nshilyi mwiirummbwa myaandu

1Naasa Yesu kaveera kyaaso kyeevafunda kuti vave vetereva Iruva fyeeri fyoose nta valashelemwa. 2Kaamba, “Kweefo nndu mwiirumbwa myaandu ekee muriny mmbe, kava nndu naleereiye Iruva nta nalasarye nndu. 3Naasa efo muriny ulya kukavekaa-fo nka wa ding'u. Nawe kativa-tiva efo kwakwe kaamba, ‘Shirumbuya mwaandu wakwa nisha kwashiauwa nkiduva wakwa.’ 4Nawe kava mwiilema-da ando a mikonu myaashaa. Elyi lyeefurummya karera efo nriminy, ‘Na kyikava shileereiye Iruva na shilasarye nta nndu, 5indi nka yeu wa ding'u elyi ashitivila indo, ra shinrumbuye mwaandu wakwe kya songosiny naambo nalashaatare nnu.’ ”

6Kyasia Nndumi kaamba, “Aranyiny-te kindo mwiirumbwa myaandu yeto wa kiila aleamba. 7Iruva mmbo mwaamba we asheraa nalarumbuya yewo asawuye myaandu yaawo kya songosiny, nawo veefo vamfuyaa kio na nsanyiny, nawe navatevese tupu? 8Shamuvia mmbo ashevarumbuyaa myaandu yaawo kya songosiny uviny. Indi Mwana yeto wa nndu elyi asheshaa a ndesa ashewonisaa vandu vakusirye-u kunu ulaniny?”

Kyaaso kya Mfarisayo na N-dedemi

9Kavavia kyaaso ekyi, “Kwiifo vandu vakusarye wo veni mmbo vakee va usumanu vakamina vengyi. 10Mmbo kweifo vandu vavii valeenda na mmba ya Iruva. Ulya umwi ni mfarisayo, na ulya ungyi ni n-dedemi. 11Naasa Mfarisayo ulya kasalala-u, karera efo nrimin eetereva Iruva, kaamba, ‘Woi Iruva shakwaana elyi yeny shilakee sha vandu vengyi shilakee sha vasoki ao valembi, ao sha vandu vetuusa, shilakee nta sha n-dedemi yeu. 12Ando a mfungare umwi shava mwikootoya kavii, na findo shitiri fyoose kilya kya ikumi ikumi shakivika kya ukamba lwa Iruva.’ 13Na n-dedemi ulya kasalala kwaasha nalakare nta iinuya miso kya efo uuwe iruvee-u, kakukapa-kapa mbafu kaamba, ‘Woi Iruva shifwaaya yeny shikee nndu llyamari.’ 14Na yeny shamuvia, nndu yeto mmbo aleenda na kyeny eetiri usumanu ngota ulya. Mashika yeto akwaallwa nniini we muni mmbo akaa nanyiiswa, na yeto akunyiisa mmbo akaa nang'aniswa.”

Yesu avikya vana vadu mbora

(Mat 19:13-15; Mar 10:13-16)

15Naasa vakamweenngye vana vadu naambo naveekerye maako. Valya vakiloshyony vakavakyeemya. 16Naasa Yesu kavavaanga vakusheye na kwakwe. Kaamba, “Reny fivana efyo fikusheye na kwakwa, nta mulafiimi! Mashika yewo va ngata yaawo mmbo umangyi lwa Iruva lwava lwawo. 17Nkya dede shamuvia, kwakooya kulaore nndu awarya umangyi lwa Iruva ekee wa ngata ya fivana yefi, nnyakooya yaanga-fo-fo.”

Yesu na nndu umwi isimba

(Mat 19:16-30; Mar 10:17-31)

18Nalyo nndu nsongoru umwi kammbesa, “Ale llosha nsha, a shatana inda shiwonise ding'u ya muu wa llung'anu?” 19Naasa Yesu kammbia, “Nkyiki kwashivaangya nsha? Nkwiifo akee nsha kuuta Iruva muni-fo.” 20Mmbo kwiishi mavavasyo a Iruva, “Kulatuuse, nta kulawae, nta kulaive, nta kulafingye uroo kindo kya wongo. Indya ndoo na mau.” 21Nawe kammbia, “Efyo mmbo shilevefiringa fyoose uka elyo shekee n-du.” 22Naasa Nndumi ekiita indo kammbia, “Ni kimwi kiifo kuturye. Endekumba fyoose kutiri, kundeavya vakiva. Neewe llyo kushekuwonisyaa masaa efo iruveeu. Kwammaa kusheny kushilatye!” 23Naasa ammiita indo kasokywa mfyoova deny, kimmba eetiri masaa meengyi nnu. 24Naasa Yesu eekilolya indo, kaamba, “A paa ndesa kyava kyuumu-dwa kya vandu yewo vatiri masaa vakooye yaanga na efo umanginy lwa Iruva! 25Mmbo kyava kyaangu ngamula iire neefo mmbweny ya sindano, ngota nndu isimba yaanga neefo umanginy lwa Iruva.” 26Naasa valya veeta vakaamba, “Kwakooya ni indo, a nndu ashekooyaa ikirwa ni ungau?” 27Nawe kaamba, “Ekyo kyara kilaidimika kwa vandu, mmbo kyaidimika efo kwa Iruva.” 28Naasa Petro kaamba, “Lla-te yese mmbo lureeye findo fyeru lukasha ikulatya.” 29Nawe kavavia, “Nkya dede shamuvia, nkwiifo nndu anra naakwa ni mmba, naakwa ni nka, naakwa ni vanavamaye, naakwa ni ndeye, na maye, naakwa ni vana, kwakooya ni kimaruma kya umangyi lwa Iruva, 30nare nalaniingwa eviiryoo fiingyi fiingyi ando a kilya kimwi na kya efi fya ulaalu; na efo ulaniny elo lwishaa nawarye muu wa llung'anu.”

Yesu aamba kya ufu lwakwe

(Mat 20:17-19; Mar 10:32-34)

31Naasa kaumbya valya ikumi na vavii alya ando akai, vakee kyaanya kyawo. Kavavia, “Manyiny lwiifo lushendaa irwa na kulya Yerusalemu, na mbony tilya tikee shireiye ni valya veauya fisuku kya Mwana yeto wa nndu llyo tishiinukya-u indo toose. 32Mashika asherambikywaa efo maakony a vandu va masanga, naveteendwa, naveinyalwa, navemishyo minyiiri. 33Na elyi numa vapooke inkapa na ngova, vambwae-ny. Na elyi lya nkonu wa kararu asherukaany.” 34Nawo elyi avavia indo valamanyi nta kinnywa, kindo ekyo kikava sheelyi vankisurumwa, nta valamanyi kilya kyaambawa-u.

Yesu ashiisa nndu mfu miso

(Mat 20:29-34; Mar 10:46-52)

35Kyasia kikava elyi ee-fo ashaafukyaa Yeriko kwee-fo nndu mfu miso akee rembo yoo mbai ya shia asheereryaa vandu. 36Keeta vandu veshiraa-u nkuka, kavesa kindo kiifo. 37Vakammbia, “Ni Yesu wa kulya Nasareti ee-fo ashiiraa-u.” 38Nawe kafua nnu kaamba, “Woi Yesu kukee mwana wa Davidi, shisarya ukiva lwakwa!” 39Valya vasongoye vakankyeemya namalalye. Nawe keengera ifua kilanya, “Woi mwana wa Davidi, shisarya ukiva lwakwa!” 40Naasa Yesu kairisha, kavavasya neendwa na alya akai. Afika kufii kammbesa, 41A mmbo kwakunda shikutannyi inda? Nawe kammbia, “Nndumi naambo shimanyi ilola.” 42Yesu kammbia, “Idima ilolany! Kwankusirya-u indo nkyo kyakushiisa.” 43Nalyo yeni kaidima ilola. Kallatya eshaarafumaa Iruva. Na vandu valya vaiyo valolya indo, vakavikya Iruva nnduma.

Currently Selected:

Luka 18: MASNT00

Highlight

Copy