Luka 7
7
Yesu ashiisa ishinga lya nshilyi umwi
(Mat 8:5-13; Yoh 4:43-54)
1Naasa elyi ammaya marero alya moose efo maarwiny a vandu, kandefika kulya Kapernaumu. 2Naasa kweefo kishinga kya nshilyi umwi wa vasikari iyana elwee nnu deny, nawe ni nndu akundikye efo kwakwe. 3Naasa ammiita mbony ta Yesu kanrummya vamiku va Vayuda vandentereva neende nandeshiisa kishinga kilya kyakwe. 4Nawo vakafika kulya kwa Yesu vakantereva nnu, vakaamba, “Mmbo asumani kumbutye kindo ekyo, 5Kimmba akundye vandu va uruka lweru, katana alutanya na mmba yeyo ya iterevya.” 6Naasa kawara shia yeenda nawo. Naasa elyi amfika ando nalakyikee-se kwaasha nafike efo kyeny kwa nshilyi ulya, karuma vambuya vakashembia, “Nndumi nta kulakwaarise! Mashika nshimaa yewe kufike kyeny kwakwa-fo. 7Nkyo kimaruma na yeny shalolya nshikumaa shifike kwafo shimuni-fo. Indi amba kirero kyimwi-da, nalyo kyishinga kyakwa kyishiaa. 8Mashika na yeny mmbo shikee nndu mwiitorye mmbaniini vakwa. Shivetiri na vasikari shivaitorye. Naasa, shavia yeu, ‘Enda!’ Kaveenda. Shavia ungyi, ‘Osho!’ Kavesha. Shavia kishinga ekyo kyakwa, ‘Endetana ule!’ Kavetana.” 9Naasa elyi Yesu aita indo kasongololo kyakwe, Kaindukya valya vasangi-fo vellatyaa, kavavia, “Shamuvia, nta kunu Israeli nshandelolya kyikusiryo king'ani indo-fo.” 10Nalyo valya varumwa vakawuya na kulya kyeny vakakooya kishinga kyilya kyammishia.
Yesu aruta mwana wa nka wa ding'u
11Naasa kyikava elyi kyeeri kya numa-numa kawara shia yeenda kafika muriny uvangwaa Naini. Na vakiloshyony vakwe varyani nawe na vandu nkuka. 12Naasa elyi afika kufii na ngiri ya muri ulya, nalyo akakau nndu mfu ariwa eefo asomutwaa na kulya kipoo ya muri. Nawe ni mwana wa ngitany efo kwa maye akee nka wa ding'u, na vandu va kulya muriny veefo veengyi vemwimyaa. 13Nndumi kallollya kavavyo mmuu kyakwe, kammbia, “Kusyedo mai! Kulaiye!” 14Kaserikya yoo kufii, kapaana kitara kilya kirye nnying'a ulya. Na valya vakurikye vakairisha. Nawe Yesu kaamba, “Mwana shakuvia, kwiipoo!” 15Nndu ulya mfu kakwiipoo kakaa rembo, kapooka irera. Kaniingya maye. 16Naasa valya vaiyo vakatirwa mmbwerei woose, vakang'anisa Iruva, vakaamba, “Ate nndu mwawuya kisuku nniini ankwiipoo kunu kweru, na Iruva ansha isaiya vandu vakwe.” 17Na mbony tilya tikeenda iidukana kulya Yudaya koose na masangeny alya a minyanuny moose.
Vakiloshyony va Yohane Mmbatisi
(Mat 11:2-19)
18Nalyo valya vakiloshyony kya Yohane vakandemwoongoya mbony yeto toose. 19Nalyo Yohane kavaanga vavii va efo kiloshyony kyakwe na yoo akai, kavaruma kulya kwa Nndumi, kaamba, “A yewe mmbwe ulya avereyoo nashe, ao lukavereya ungyi?” 20Naasa vasoro valya vakafika kulya kwakwe vakaamba, “Ni Yohane Mmbatisi aluruma kunu kwafo kavesa kwakooya yewe mmbwe ulya avereywaa nashe, ao lukavera ungi?” 21Nalyo kyeeri kilya kyeni Yesu eefo ashiisaa vandu veengyi ndwari na fivalyilyisaa na mimuyo mikasha. Na vandu vafumiso veengyi kavasimba simbo yeelola. 22Nalyo kaalwa kavavia, “Endeny mundeongoya Yohane kindo mwalollya na iita, yewo vafu-miso veefo valolaa, yewo vakee miketekete veefo vashendaa, yewo va ivave veefo vasheeremukaa. Yewo vafu-maarwi vee-fo vashitaa. Yewo vafu veefo varukaa. Yewo vakiva veefo vashoongoywaa nrumi ya nsia. 23Na ngoma nndu nalaonisa nsindara yaa kwakwa.” 24Naasa vakiloshyony valya va Yohane vakakwiipoo vakeenda. Nawe kapooka irera na valya vakuumbye-fo kya Yohane kaamba, “A kimaruma mukakwipoo kyeny mukandefika kulya kasa a nkyikyi muleenda ilola-fo? Ndesa ni ikongye lyivivitwa-vivitwaa ni uraato? 25A kimaruma mukakwipoo mukandefika-fo, a nkyikyi muleenda ilola-fo? Ndesa ni nndu aree masara mamamiri? Yewo varee masara a wiitori na ilya usuri akawo vakee efo mmba ta kimangyi. 26A kimaruma mukakwipoo kyeny mukandefika-fo nkyikyi muleenda ilola-fo? Ni nndu mwaawuya fisuku ndesa? Ee-da, neeny shamuvia, Mmbo ang'annyi nndu nkisuku. 27We mmbwe ulya akee ndeiye kyeyamba,
‘Akakau nsu wakwa shanruma nakwiirye mbee,
mmbwe ashedeesyaa shia yafo nakusongoye.’ ”
28Naasa shamuviany, “Efo nnang'ani ya yewo vaire mmbaka nkwiifo nniini kairya Yohane-fo. Kya indi yeto akee n-du efo umanginy lwa Iruva mmbo ang'ani kamwiirya.” 29Na vandu va uruka loose sanda na vadedemi mmbo valearannya vakairikya Iruva mmbwa usumanu elyi valeenda ibatiswa ubatiso lwa Yohane. 30Indi Vafarisayo sanda na yewo vasunundye uvavaso mmbo valealwa makusaro a Iruva akusarye kyawo akafwa mmwasi elyi valelema indebatiswa mmbwe. 31“Naasany vandu va irika elyi a shivaananise neekyi? Mmbo vafwanani navi? 32Mmbo vafwanani na fivana fikee rembo ando a singira. Fikavaangana fikaamba, ‘A nkyikyi elyi lwamukapya fivale neeni mulafini? Lukaimba fiimbo fya kiiyo neeni mulaiye!’ 33Yohane Mmbatisi mmbo alesha ekee nndu nalalyaa nkate nta ina mfinyo. Mukaamba, ‘Mmbo atirwa mmumuyo nkasha.’ 34Kukasha nafo Mwana yeto wa Nndu akee mwiilya na ina mukawuya yaamba, ‘Akakau mwitalauwa ndeu na mwiina mfinyo, kavetira mbuya na vandu vadedemi na valyamari.’ 35Kyikavaany urango usha mmbo lulekooya ivinga mwaandu kyuuka na efo kwa yewo vakee vana va vayo woose.”
Yesu kyeny kwa Simon mfarisayo
36Naasa nndu wa efo kwa Vafarisayo kasha intereva nandelya nawe shoonga. Nalyo kandeanga na efo mmba kwa Mfarisayo ulya, kakaa-u rembo. 37Nalyo akakau nndu nka ansha nang'u akee wa kulya muriny atannyi fya ulyamari. Nawe elyi ammanya Yesu mmbo akeelya shoonga efo mmba kwa Mfarisayo ulya, kasha arie kishupa kya iwe yaa kitiri mafura ekwaamba afwaamaa nisha. 38Kashesalala yoo numa ando aoroye nang'u marende ashiiyaa kanshoshotya misoru alya marendeny. Kawuya kaangata-u na fii ta nrwe wakwe. Nawe kamiminda-miminda marende alya akwe kaamba mafura alya. 39Naasa mfarisayo ulya ammbaanga elyi alolya kive indo, karera efo nriminy kaamba, “Kukooye nndu yeu ekee nkisuku mmbo emanyaa nka yeu mmbwe vi na ni wa ngata-kyi yeu ampaana ndesa akee llyamari.” 40Nalyo Yesu kaalwa kammbia, “Simon-ro, mmbo ntiri kindo nkuviaa!” Nawe kaamba, “Llori, kwaambaye mbee!” 41Kammbia, “Kweefo nndu mwaakuya vandu etiri vaasile vavii. Yeto umwi etiri siye yakwe ya dinari mayana araanu, na yeto ungyi ni ya dinari makumi araanu. 42Kakooya valatiri kyetaa. Kavareeya siye woose ve vavii. Naasany, vandu yewo ni ungau ashenkundaa kilanya?” 43Simon kaalwa kammbia, “Shikusarye ni ulya alenreeya siye yeyo shiniini mmwasi.” Nawe kammbia, “Kwarumbwa kisumani.” 44Llyo kaindukya nka ulya kavia Simon, “Kulollye nka yeu-ro? Mmbo shaanga na kunu mmba kwafo, nta kulashiniinge mura wa marende akwa. Nawe katana ashishoshotya misoru yakwe marendeny. Kawuya kaangata na fii takwe ta nrweny. 45Nta nkwashimiminda na fyoomu-fo. Nawe kipookya shammaanga na kunu nalandederya ishimiminda-miminda marende-fo. 46Nta nkwashaamba mafura nrwen-fo. Nawe katana aamba marende akwa mafura afwamaa. 47Nkyo shakuviaany, mmbo amfwaaywa ngyulyamari takwe tikee shiingyi kimmba ankunda nnu. Indi yeto afwaaywa kyaangu, mmbo akunda kyaangu da.” 48Naasa kammbia, “Kwamfwaaywa ngyulyamari tafo!” 49Nalyo valya veefo vellyaa nawe shoonga vakapooka irera efo nriminy, “A nndu yeu ni vi katana afwaaya vandu kya ngyulyamari tawo?” 50Naasa nawe kavia nka ulya, “Kwankusirya-u indo, nkyo kyakukyira! Enda na ufoo!”
Currently Selected:
Luka 7: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
