Luka 8

Vaka variani na Yesu

1Kyikava kyeeri kya elyi numa we muni ekee kyaaro kafika muriny ungyi na ungyi na kimuriny kingyi na kingyi akapaa weele na yoongoya vandu nrumi ya nsia ya umangyi lwa Iruva, na valya ikumi na vavii varyani nawe. 2Na vaka vaangu vakee vashiise mimuyo mikasha na ndwari, mmbwe Maria wa kulya Magdala embukwa ni mimuyo mikasha mfungare; 3na Yoane akee nka wa Kusa ulya mwiikalya findo fya Herode, na Susana na vengyi veengyi. Nawo vakava vemfurukannya na findo fyawo vatiri.

Kyaaso kya mweera mbeu

(Mat 13:1-9; Mar 4:1-9)

4Naasa vandu vakasha ikuumbya-fo ironda iniini, vakakwiipoo vauka miri mive na mive vakavingya kulya akai. Nawe karera nawo avaviaa fyaaso. 5“Kweefo nndu mweera mbeu, kakwipoo nandeera mbeu takwe. Eefo asheraa, tilya maata tikawa efo mbai ya shia. Tikavavarwa, na ndeye ta efo nginiiu tikalya tikamaa. 6Na tingyi tikaoloka ando iwe lyikwaalye si. Tikamya tikawuya yuuma mashika tilatiri nsiny. 7Tingyi tikawa ando a miingeny. Miinga ilya ikamia ando amwi nato, ikatifira. 8Tingyi tikawa ando a uteri usha, tikamia tikaraaka, ilya imwi ikavika iyana.” Elyi arera indo kaonisa unyanga kaamba, “Nndu atiri maarwi earanya navearanya!”

Kimaruma kya ilosha na fyaaso

(Mat 13:10-17; Mar 4:10-12)

9Naasa valya vakiloshyony vakwe vakammbesa, a kyaaso ekyo mmbo kyaambakyi? 10Nawe kaamba, “Yeni mmbo muleniingwa imanya mbony eto ta umangyi lwa Iruva tikee shirike. Na valya vengyi wo vakavio fyaaso tupu, naambo ilola valole valalolye, na yaaranya vaaranyi valaipuye.”

Yesu atambashwa kyaaso kya mweera mbeu

(Mat 13:18-23; Mar 4:13-20)

11Na kyaaso ekyo kyikee ule, “Mbeu tilya ni Irero lya Iruva. 12Na valya va mbai ya shia wo ni vandu vearanya. Vekyaaranya, yeto mmbishwa kasha nang'u, kaipoo irero llya efo nriminy mmbwawo, valakooye ikusirya nalyo na ikirwa. 13Na valya va efo iwe-u, mmbo vandu vearanya irero elyo, vakalyitira na nsia. Nawo kindo vauwa ni mirarii, mmbo vakusirye-u kivero tupu, na kyeeri kya yeeswa vakalakana-u. 14Na tilya tawa ando a miingeny, mmbo vandu vearanya-da, vakeenda vakafirwa ni ngyusau ta findo fya muu yeu, na masaa avayo, na lango ta vayo valakyivike-se kimu. 15Na tilya ta uteri usha, to ni vandu vearanya irero elyo vakalyitira na nrima usongovye ukee nsha, vakavika kimu kimaruma kya elyi vakee vandu vakusirye-u.”

Taa ikee shifinike na nakori

(Mar 4:21-25)

16Nkwiifo nndu ashataa taa ya mmba kaisikya na kiiya, ao kaivika kwasi ya kitara-fo. Mmbo aivikaa ando a yeekerya taa na vandu vaanga neefo mmba vakooye ilolya sa woose. 17Mashika kuleefo kindo kyikee kyirike kyikara kyilaparikya paa-fo. Nta nkwiifo kindo kyikee kisurumi kyikara kyilamanyika kyikafumirwa paa-fo. 18Naasany loleny waarya shaasa mushaaranyaa. Mashika wo nndu atiri kindo mmbo aniingwaa kingi, na yeto nalatiri kindo naakwa na ekyo atiri kavekisokwa.

Maye na vanavamaye va Yesu

(Mat 12:46-50; Mar 3:31-35)

19Naasa kakooya maye na vanavamaye vafika kulya kwakwe. Nalyo valeedimi ifika yoo akai kimaruma kya vandu valya vakuumbye-fo. 20Naasa kashevio sheelyi maye na vanavamaye vasalali yoo poo vakundye illolya. 21Nawe kaalwa kavavia, “Ma na vanavama vakwa mmbo vandu yewo vaaranya ndera ya Iruva vakaveilatya.”

Yesu akyeemya uraato

(Mat 8:23-27; Mar 4:35-41)

22Naasa kyikava nkonu umwi kasaama na ngalaveny we na vakiloshyony vakwe, kavavia, “Ndifony-te, luruuke lufike kulya kwakulya ya iruva elyi!” Vakaporomwa ngalava ilya ikeenda iivarye. 23Naasa elyi vee-fo vashendaa nayo we karengeya kalala. Nalyo uraato uniini lukaoloka efo iruveny. Ngalava ilya ikeenda ishishwaa mura, kikavany ni ando eeretya muu. 24Nawo vakamweengya vakamwaanta vakaamba, “Woi Llori, woi llori, lwiifo lusyaa!” Nawe kakwiipoo kakyeemmya uraato llwa na mwaalukoluko ulya wa mura. Fikamalallya kukava kimammya sau. 25Naasa kavavia, “Nkwi mweera kikusiryo kyany?” Naasa vakasongololo vatirwa mmbwerei. Vakaviana, “A nndu yeu mmbwa kwi katana arerya na ngyuraato na mura, nafyo fikamwiirikya?”

Yesu ashiisa nndu atirwa mmumuyo nkasha

(Mat 8:28-34; Mar 5:1-20)

26Nalyo vakaruuka na kulya kwa kulya vakafika kulya urukeny lwa Vagerasi nalo lusumani na lwa Galilaya. 27Naasa elyi ammooloka na kulya kwaarutu auka efo ngalaveny nalyo kakwaannya na nndu nsoro umwi auka kulya muriny atirwa mmimuyo mikasha. Nawe kipookya kyeeri kyaasha nnyeraa soori-fo. Na ando akwe ekaa nshi efo mmba-fo, ni efo mmbangeny ta vafu. 28Naasa kalollya Yesu kakooma. Kamwolokya-si karera na unyanga uniini, kaamba, “Nkyiki kyeru neewe Yesu kukee Mwana wa Iruva yeto akee uwe ya findo fyoose? Mmbo shakutereva kulashilyi-se ukiva-fo!” 29Nyeli eekundye ivavasya mumuyo ulya nkasha wa utefusu uuke nndu ulya. Mashika uleva mwiintafukya fyeeri fiingyi. Nawe kava mwiifingwa na mise na ikapyo minya eeringwaa indo. Indi filya fyamfinga kava mwiififisha karumbutwa ni mumuyo ulya nkasha ukamfita kundo kulalelwa. 30Naasa Yesu kauvesa kaamba, “A irina lyafo ni yewe vi?” Nato ukaamba, “Ni itorito,” mashika emmaangwa ni mimuyo mikasha miingyi. 31Nayo ikamfuuya nalaivavasye yeende yooloka irininy. 32Naasa kweifo ironda lya nguve shiingyi lyeshiiswaa yoo kipirimikony kya ifumbu. Nayo ikamwooshora naivikye mumu yeende itaanga. Nawe kaivikya mumu. 33Naasa Mumuyo ilya mikasha ikauka nndu ulya ikandeanga nguve tilya. Nalyo ironda llya lyikapufuka-fo lyikaoloka neefo waangeu. Lyikasiiya kulya iruveny, lyikafumbwa mmura. 34Nalyo veesi valya valolya indo vakarisha vakandevia vandu kulya muriny na kulya mareminy. 35Na vandu vakakwiipoo-fo vandelola kilya kyatanyika. Vakafika kulya Yesu akai. Vakavekooya-fo nndu ulya ammbukwa mmimuyo ilya mikasha akee rembo yoo marendeny a Yesu aree soori ammbuiyo ni urango. 36Naasa valya valolya nndu ulya eetirwa ni mimuyo mikasha shaasa ashiiswa, vakawoongoya. 37Nalyo ikwaanu lyoose lya vandu va Gerasini vasangyi na valya va nnyanu vakantereva nakwipoo kulya kwawo nnyeli vatirwa mmbwerei wiingi. Naasa we muni kandesaama neefo ngalaven. Kawuya na kulya ooka nafo. 38Naasa nsoro ulya aukwa ni mimuyo ilya mikasha kantereva mumu wekaa nawe. Nawe kansama kaamba, 39“Kuwuiye na kyeny kwafo kundeongoya-fo vengyi kyoose Iruva akutannya.” Nalyo kakweengya kandeamba kyoose Yesu alentanya kakwaanisa kulya muriny koose.

Mwana wa kyeny wa Yairo na nka umwi vashiiswa

(Mat 9:18-26; Mar 5:21-43)

40Naasa kikava elyi Yesu awuya nafo mamwiingyi ulya wa vandu ukamwaambya na nsia, nyeli woose veefo vemmbereyaa. 41Nalyo akakau nndu nsoro ansha nang'u na irina lyakwe ni Yairo. Nawe ni nndu nsongoru wa efo mmba yeeterevya. Kasha ikweera si yoo marendeny a Yesu. Kantereva nandefika kulya kyeny kwakwe. 42Mashika etiri mwana wa kyeny akee wa ngitany amaye irika lya myaaka ikumi na ivii, nawe eefo akumbaa muu. Naasa elyi eefo ashendaa vandu valya vakuumbye-fo vakava vansisiraa deny. 43Nalyo kweifo nndu nka alwee ndwari ya kyika ando a myaaka ikumi na ivii. Nawe ellyiwa nnu mmbaanga enretya-fo masaa akwe moose efo kwa vaanga nta kulakee-fo nndu eedima inshiisa. 44Nawe kashesha na yoo numa ya Yesu nakooye ipaana nse wa soori yakwe ya yeerya, nalyo yeni kishoru kya ndwari ilya yakwe ya kyika kyikafikya. 45Na Yesu kaamba, “Ni vi ashipaana?” Naasa vakakana woose. Na Petro asangyi na valya aryani nawe kambia, “Llosha, ni vandu vakekusisira-sisira.” 46Naasa Yesu kaamba, “Kwiifo nndu ashipaana-da! Mmbo shamanya shammbukwa ni finya.” 47Naasa nka ulya kalollya nalakiidimi-se imalallya, kasha nang'u eereremaa. Kamwolokya si kaamba paa kimaruma kampaana, na shaasa akooya ishia na lyimwi. 48Nawe kammbia, “Mwana-akwa kwankusirya-u indo nkyo kyakukira! Kweengye kukooyaa ufoo!” 49Naasa eefo areraa indo nalandemanda kukasha nafo nndu auka kyeny kwa nndu ulya nsongoru wa mmba yeeterevya. Kaamba, “Mwana wafo ammaa ifwa, nta kulakivinise llosha yeu!” 50Naasa elyi Yesu eeta kanndouwa, “Kulairyee-fo Kusirye-u tupu! Nawe ashekirwaa.” 51Naasa elyi amfika kulya poo, nta nalalekeye nndu kaanga nawe mmba, kulaore ni Petro na Yohane na Yakobo na ndeye wa mwana ulya na maye. 52Naasa kakooya valya vaiyo woose veshiyaa na ikapa kapa mbafu. Nawe kaamba, “Nta mulaiye-fo! Nshi afiiye-fo, mmbo alele rweny.” 53Nawo vakanseka, nyeli veeshi amfwa. 54Nawe Yesu kantira woko kambaanga kaamba, “Mwana kwiipoo!” 55Nalyo kawuiyo ni muu wakwe kakwiipoo kyaangu naakyo. Nawe kavavasya vanniinge kyeelya. 56Na vamiku vakwe vakeesing'ang'a. Nawe kaveekimba kindo kyilya kyautika valeshekyivia nndu-fo.

Currently Selected:

Luka 8: MASNT00

Highlight

Copy