GIING'EETA 26
26
Isaka goobiida ng'eanyiida Gerari
1Iimuchu ghang'eat geejeeda aba jeeda ng'eanyiida, nea gabassa geejeeda ghayi bea madeeda bea damanda Abrahamu. Ak ghang'eat Isaka gawa ng'eanyiida Gerari, heeda Abimeleki was sugoocheanda Filisti. 2Hean gabussa NG'UTAMIIDA ak gwayeesha, “Aduwi ng'eanyiida Misri; abiidana ng'eanyiida jea darukuneey. 3Abiidana ng'eang'i, ak gajeendeayeena sea ang'iing'i, ak gaydagoonyi ghawooda; aba gideaba gaydagoonyi darooraksu ang'iing'i ea jeacheangaagu, ak gaydanung' gwasa habeawoodeanyu ghayi eayeaksi ghweandaang'u was Abrahamu. 4Gaydanung' ghwasaang'ayiit jeacheangaagu ea gwadeena miinga humng'eeda, ak gaydaadaw jeacheangaagu darooraksu seaniin; nea aba jeacheangaagu gaydaadaw ghawooda eemoojiga sean bea muunda ng'eanyiida: 5aba gideaba Abrahamu nisissa mureeda ng'asheega ghuuteanyu nea ghoang'waay huumeanyeekeasu, ea diigheanyeekeasu, ea ng'asheega eargu, ea deaweedajeegeasu.”
6Hean goobiida Isaka ng'eanyiida Gerari. 7Muchu nea ghoanyaash fugeaba ng'eanyiita niny iita gatmoadaanyi gwayeesha, “Nih hudiya gil”; aba gideaba ghoawal gwayi, “Nih gatmoodeanyu,” nea ghaghay gideaba, “gwadeepa gwanuusan fugeaba ng'eanyiita aba badayda Rebeka”; aba gideaba niny aamiy aba leanga. 8Iing'ata nea niibiida hoowa sugoocheanda siguura Abimeleki bea eemeeda Filisti ghoang'weardaawa seawadeeda ak ghwadaah Isaka sea Rebekayda was gatmoadaanyi nea ghwadaanghan. 9Gaguursa Abimeleki Isaka ak gwayeesha, “Ng'ula, nih gatmoadaang'u gil; abeeda giimuustiin eena, ‘Nih hudiya’?” Ghwalamda Isaka ak gwayeesha, “Geabaysiini gideaba, ‘Gwadeepa eenuusan aba badaydaanyi’.” 10Ghwalamda Abimeleki ak gwayeesha, “Ang'iing'i gisimaneasa naaha? Aba gideaba gwadeepa gwanda siyagi deepa ea nindeawa gatmoadaang'u, ak abeeda gigoonyeasa munyinda.” 11Ng'ata ghamiin Abimeleki gheanyanga buuneesean, nea gwayeesha, “Siida wassean jea ghwasat siisi ghana gatmoadaanyi gajeenuus.”
12Iimuchu ghabwar ng'eanyi Isaka ak gwahista booga aba ng'eanyiita, ak ghwalach aba gweaydida ak ghwanyas niba bughala booga ghayi hista. Aba gideaba ghoadaw NG'UTAMIIDA ghawooda, 13hean gabaruur siida, ak gooheadiisachi haleanjeadaanyi ea ghoah meanang'oocheanda. 14Gwandeawa nooga ea dugwa, ea soomjooga saang'a, ea gwashissa ghaang' fuga Filisti. 15(Iimuchu gwadaksa fuga Filisti healatka sean aba sigeeda was gea ghayi ghurghur soomjooga Abrahamu was ghwaan damanda duu gwandeewa.) 16Ghwalamda Abimeleki ak gwayeesha Isaka, “Ng'amwana ng'eang'deanya; aba gideaba niburdeaweasa uurda.”
17Iimuchu gabalaga Isaka ng'eanyiita, ak ghamway mooheeda Gerari ak goobiida. 18Ak gabiikta Isaka ghang'alda healatka beega ghayi sighurghur damanda Abrahamu was ghwaan; aba gideaba ghayi gwadaksa fuga Filisti iing'ata miyeeda Abrahamu; ak gang'asa Isaka healatka gheawunga ghayi ng'assa ghwaan. 19Ghaghurghur soomjooga Isaka jeeda mooheeda ak ghwanyas healadeeda beega, 20iimuchu ghwajal jeagiischoodiga ng'eanyiida Gerari sea jeagiischoodiga Isaka nea gwayi, “Beega gaasa.” Ak gang'asa healadeeda gheawunga siyi Eseki, nea gideaba heesijalsa. 21Ak gabiikta ghaghurghur healadeeda nuut, ak gabiikta gwajalsa eara nih; ak gaguura gheawungaaschi Sicheeda. 22Ghabeawa hoowa ak ghaghurghur healada nuut, iidu nih ea mudu gwajalsa; ak gaguura gheawungaaschi Rehoboti, nea gwayi, “Asi ghamneawa nigooneasa NG'UTAMIIDA giibaldeaba geat ea giibinda ng'eanyiida, ak geejiili aba ng'eang'i.”
23Muchu ghabeawa hoowa ak gawa ng'eanyiida Beer-sheba. 24Ng'ata gabussa NG'UTAMIIDA niny ak gwayeesha, “Aniini geawooschi ASEETA Abrahamu was gweanu; adibeali, aba gideaba geendeayi aniini ea ang'iing'i ak gaydagoonyi ghawooda ak gaydanung' ghwasaang'ayiit jeacheangaagu aba badayda soomjeandeanyu was Abrahamu.” 25Muchu gwasissa hoowa heeda wagiida ak gaguushteawa gheawunga NG'UTAMIIDA, ak goongoorsa hoowa maheemajeandaanyi. Ak gagurgursa hoowa soomjooga Isaka healadeeda.
Neajeeda mida dageascheeda Isaka ea Abimeleki
26Iimuchu ghabeawa Abimeleki Gerari ak gawa headaanyi nea goodeayi Ahusati was siida ghuutaanyi ea Fikoli was shirikarajeanda ambal shirikareadaanyi. 27Ghwalamda Isaka ak gwayeesha, “Ghwasaan anda guwuni heedeanyu, nea nukwa gisichaan ak gihoananaan ng'eang'deang'wa?” 28Gwayeesha saawa, “Aseasa sidaayi muuchi gideaba ang'iing'i gindeawi NG'UTAMIIDA; ak geeyeenyi, gidabal gwanda dageascheedeanya hiing'weanda, asi eesina neajeeda sea agooga, 29nea gideaba maysimaneasa ng'asheega munyas, gawuurji gidamiyeesimaneega agooga ng'asheega munyas geesimaneegwa ng'asheega miyaasiin ak geanung' aweayeena nea goobea hoyyoo. Ak ghamneawa goowooschi fuga niidaw NG'UTAMIIDA ghawooda.” 30Hean gwasissa ghweelmeeda, ak gweagiischi nea gwaleeshi. 31Sakteayda gabay ghang'eat ak gaba siisi aksa nuut habeawooda; ak ghwanung' Isaka gaweay nea ghabeawa headaanyi nea gaba hoyyoo. 32Eaweedida ghwahidu soomjooga Isaka ak gwarukuta iita healadeeda heeta ghurghur, ak gwayeesha, “Sinyaschi beega.” 33Ak gaguura Shiba; ak gheawungeaba mujiineedida geeguura Beer-sheba ea ghoah ghamneawa.
Gatmooda Esawu bea eemoojiga
34Iimuchu nea gaba Esawu gweanyeew haradam ghaghi Yudisi was hudeaba Beri bea eemeeda Hiti, ea Basemati was hudeaba Eloni bea eemeeda Hiti; 35hean ghwanung' gwasawana jeeda Isaka ea dea Rebeka.
Currently Selected:
GIING'EETA 26: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
