GIING'EETA 27

Isaka ghoadaw ghawooda Yakobo

1Iidu nea niwaasiit Isaka nea niisha uurda gheanyangaaschi ak ea mudu ghwadaah gil gaguursa orjeedaanyi haw siguura Esawu ak gwayeesha, “Orjeedeanyu”; ak gwayeesha, “Aniini geandi hiji.” 2Gwayeesha, “Ng'ula, aniini naawaasiichi; ak ea mwaanali eaweeda jea dameawa. 3Asi geani dabitaang'u ghuweang'daang'u ea rookghta, ak guwi dareabeeta, ak gibarneani diyeayda, 4ak giiwoolneani banyeega miyaasiin aabwariinyi, ak giyeanean daak; ak abeeda geagoonyeey ghawooda heeda miidameawa.”

5Aba damani ghoaleaydiit Rebeka nea goobalool Isaka orjeedaanyi was Esawu. Hean iidu nea gawa Esawu shageata aba dareabeeta ghabwar diyeanga ak gweadu, 6Ghwalamda Rebeka ak gwayeesha orjeedaanyi was Yakobo, “Naayiinyi nea goobalool gweanu orjeeda geamadu was Esawu, nea gwayeesha, 7‘Eanean diyeayda, ak gisinnean hamita miy, ak ghaayaaji, ak geagoonyeey ghawooda aba madeeda NG'UTAMIIDA heeda miidameawa’. 8Asi, orjeedeanyu, sisiina mureeda ng'asheegeasu earukuneey. 9Asi una jeenooga, ak giyeanean dayi iyeenya miyaas, ak geasinyi hamita miy jea ghwaak gweanu gawuurji gidabwariiyda; 10ak abeeda gajeasiina gweanu ghwaak, ak abeeda gagoonyi ghawooda heeda miighameawa.” 11Ng'ata gwayeesha Yakobo ghaamwat was Rebeka, “Ng'ula, orjeeda iyya niny siida mida saseeda buudeega gil, ak aniini geawooschi siida manda saseeda buudeega. 12Gwadeepa ghoang'waay bwaabwa saseedeanyu, ak abeeda gajeadaah gideaba geareenganayi, ak abeeda geanyaksi geaw mooshteayda nea ghwashiy ghawooda.” 13Ghwalamda ghaamwat ak gwayeesha, “Orjeedeanyu nung'waada ghwahidu mooshteaydaang'u badaydeanyu; ang'iing'i sisiina mureeda ng'asheandeanyu, ak guwi, eanean.” 14Hean gawa ak gweadu heeda ghaamwat; ak gwasin ghaamwat hamita miy, gawuurji gidabwariiyda ghwaan. 15Ng'ata gageanu Rebeka hang'weaka miyaasiin bea orjeedaanyi haw was Esawu, eawoojisu mideawa aba ghoah, amahit gooshuup orjeedaanyi mwanang' was Yakobo; 16ak gookwealsa eagweega dayeega geatingaaschi ea heeda manda gil was gheataanyi; 17ak ghoadaw hamita miy ea mukaateeyda heeta sin, ak ghwayiin geatinga orjeedaanyi was Yakobo.

18Hean gawa heeda ghwaan, ak gwayeesha, “Bwaabwa”; ak gwayeesha, “Aniini geandi hiji; ang'iing'i guwoosi ng'eaha orjeedeanyu?” 19Gwayeesha Yakobo ghwaan, “Aniini geawooschi Esawu was duweacheadaang'u. Neasinyi gidaheeta irukunean; asi ng'eada apteada aga banyeega eayeadu bea diyeayda, ak abeeda gigoonyeani ghawooda.” 20Ng'ata gwayeesha Isaka orjeedaanyi, “Anda eanean gibay nyasa neada ginyastiin orjeedeanyu?” Ghwasha nea gwayeesha, “Nih gweagu gideaba ghoanyaaktanaan NG'UTAMIIDA was ASEATAANG'U.” 21Hean gwayeesha Isaka Yakobo, “Beeni neekiida, daang'waanyi orjeedeanyu, danal aba huumwa ea guwoosi orjeedeanyu was Esawu ghanea muwoosi.” 22Gawa Yakobo ea gwaneekiisa Isakeeda was ghwaan, ak ghoang'waay ak gwayeesha, “Ghuuta gaba Yakobo, nea geatinga ea gheata gaba Esawu.” 23Iidu ea mudu ghwanal, aba gideaba geatingaaschi gwanda buudeega gawuurji geatinga orjeeda ghaamwat was Esawu; hean ghoadaw ghawooda. 24Ak gwayeesha, “Aba huumwa guwoosi orjeedeanyu was Esawu?” Ghwasha nea gwayeesha, “Ea aniini.” 25Ng'ata gwayeesha, “Eanean daak, banyeega diyeayda bwar orjeedeanyu ak geagoonyeey ghawooda.” Hean gweasa, ak ghwaak; ak gweasa difaayi, ak ghwali. 26Hit gwayeesha ghweandaanyi was Isaka, “Beeni neekiida ak gisami gheateanyu orjeedeanyu.” 27Hean gwaneekiisa ak ghwasam gheata; ak gwajoon shearooda hang'weakaaschi, ak ghoadaw ghawooda nea gwayi,

“Daaha, shearooda orjeedeanyu

goowiinyi shearooda madamnyeanda nibadiischeesa NG'UTAMIIDA!

28Gagasa gagoonyi ASEETA rahooda humng'eeda,

ea dea ghashneeda ng'eanyiida,

ea booga saang'a ea difaayi.

29Gidabal ghoah buuneeda soomjoagaagu

ak gwatkuy eemoojiga aba madeadaang'u

Huwa ng'utamiida ambala orjooga geamadu,

ak gwatkuy orjooga giyeang'wa aba madeadaang'u.

Gagasa eamwaashta siida mwaashtaneey,

ak geataw ghawooda siida goonyi ghawooda!”

Esawu gamus Isaka ghawooda

30Iing'ata nea niidaw Isaka Yakobo ghawooda, ghabeawa madeeda ghwaan was Isaka, deagheata ghwahidu orjeeda ghaamwat was Esawu nea gwaleabu shageata. 31Hean eara niny gwasin hamita miy, ak gweasa ghwaan. Hita gwayeesha ghwaan, “Bwaabwa ng'eada ak giyaagi banyeega eadu orjeedang'u, ak abeeda gigoonyean ghawooda.” 32Ghwalamda ghwaan was Isaka ak gwayeesha, “Ang'iing'i guwoosi ng'eaha?” Ghwasha nea gwayeesha, “Aniini geawooschi orjeedang'u was duweacheeda was Esawu.” 33Hean ghaboadan Isaka muuchi, ak gwayi, “Neada ea ng'eaha siidida weah shageata ak gweanean banyeega ak ghaayaaji nea miihini, ak ghaadawji ghawoodean? Asi huumwa gil, naadawji ghawooda ak ea maygudu eareat.” 34Iidu nea ghwayiiy Esawu ng'asheega ghwaan, gooyeawda nea goojuur nea gwasawana muuchi, ak gwayeesha ghwaan, “Ea Bwaabwa goonean ghawooda eara aniini!” 35Ghwalamda ghwaan ak gwayeesha, “Ghwahidu orjeeda geamadu ak gwareenganean, ak ea nigeanda ghawoadaang'u.” 36Ghwalamda Esawu ak gwayeesha, “Neada gheawungaaschi ea mii Yakobohi? Aba gideaba niny nireenganean deaba iyeenya. Ghayi gageanda hawundeanyu bea jeata; ak ging'ulayi, ghamneawa nigeanda ghawoodeanyu.” Ak gwayi, “Neada ea manda ghawooda abit nilaji aba badaydeanyu?” 37Gwayeesha Isaka Esawu, “Ng'ula, naanung' ghoah niny ng'utamiida aba headaang'u, ak gaydanung' ghoah orjooga sean bea ghaamwat soomjooga, ak gaydaadaw booga ea difaayi. Abeeda aniini gaygudu dagoonyi naaha orjeedeanyu?” 38Gwayeesha Esawu ghwaan, “Bwaabwa mindeawani eara ghawoanagi? Goonean ghawooda eara aniini, Bwaabwa.”

39Ghwalamda Isakeeda was ghwaan ak gwayeesha;

“Ng'ula maynyasa nagheeda ea baruureega ng'eanyiida,

ak ea maygwanda roopta jea gwaleabu humng'eeda.

40Aba ng'utaang'u gajabiidana ng'eanyiida,

ak gaygadiyeesiina orjeeda geamadu;

nea iidaambiilani

gayhirja yookeadaanyi aba gheataang'u.”

41Hean ghwasit Esawu Yakobo aba badayda ghawooda adaw ghwaan, ng'ata gwayeesha geaw, “Askwearjoojiga jea deayeawda bwaabwa nineekiit; ak abeeda gaydanuus Yakobo.” 42Iimuchu nea ghwayiiy Rebeka ng'asheega orjeedaanyi haw was Esawu; hean gawa ak gaguursa orjeedaanyi mwanang' was Yakobo, ak gwayeesha, “Ng'ula, orjeeda geamadu gayghawalda mureandooda ak gagasa gwanuusnyi. 43Asi orjeedeanyu, aleeysiiniit ng'asheegeasu; asi ng'eada, ak gimng'awsi gheeh Labani was orjeediyya mida ng'eanyiida Harani, 44ak ginyo ghanyi mideewana gili nuwaas, ea ghanyi ghahawda nyarasta orjeeda geamadu; 45geaghus eeyi bwak ea ghahawda nyarasta orjeeda geamadu, ea gwaroosa gida isimi niny; abeeda gaydeajeagu siida jea goodeelneey. Neada ghwasaan inyas gaydahuteawi orjoogeasu duwaawi aba eaweecheanjagi?”

Isaka goojeakta Yakobo gheeh Labani

46Ng'ata gwayeesha Rebeka Isaka, “Aniini neaburji nea ghoamiyaanan gatmooda eemeeda Hiti. Nea Yakobo earada iigheah huda eemoojiga uurji nih, ghana gatmoodeaba ng'eanyiita, abeeda eaweegeasu mii niisha?”

Currently Selected:

GIING'EETA 27: BG15

Highlight

Copy