GIING'EETA 28
28
1Iidu gaguursa Isaka Yakobo ak ghoadaw ghawooda, nea gwayeesha, “Maygheana huda eemeeda Ganaani. 2Asi ng'eada ak guwi ng'eanyiida Badan-aramu gheeh Betueli was gheambageamadu ak gigheani hudeaba Labani was orjeeda ghamageamadu ghoah gatmoadaang'u. 3Gagasa gagoonyi ASEETA haw ghawooda ak ghwanung' anyasa jeata ak ghoasaang'ayiichi, ak ghoahuuyi eemeeda saang'a. 4Gagasa ASEETA ghayi adaw Abrahamu ghawooda gagoonyi sea jeacheangaagu ghawooda, ak googeandi ng'eanyiida oondi ghayi adaw ASEETA Abrahamu!” 5Ng'ata ghwanung' Isaka gawa Yakobo; ak gawa ng'eanyiida Badan-aramu gheeh Labani, was orjeeda Betueli bea eemeeda Arameni, was orjeeda geenyea Rebeka, was gheamata Yakobo ea Esawu.
Esawu ghaghi gatmu nuut
6Hean ghwadaah Esawu gideaba ninung' Isaka gawa Yakobo ak ghwanung' gawa ng'eanyiida Badan-aramu ghaghi gatmooda, ea gideaba niidaw ghawooda ak ghamiin gheang'da nea gwayeesha, “Adigheani huda eemeeda Ganaani,” 7ea gideaba Yakobo nisissa ghwaan mureeda ea ghaamwat ak gawa ng'eanyiida Badan-aramu. 8Iidu nea gwajeeng'u Esawu gideaba Isaka mwabwariinya gadeemga Ganaani, 9gawa Esawu heeda Shumwaheeli ak ghaghi gatmooda, ghwaroabwa gadeemga mideawa Mahalati was hudeaba Shumwaheeli was orjeeda Abrahamu, was huda geenyea Nebayoti.
Giirgweatka Yakobo aba Beteli
10Muchu ghabeawa Yakobo ng'eanyiida Beer-sheba, ak gawa ng'eanyiida Harani. 11Iidu ghwahita hich, ak gwalla hoowa eaweedida, aba gideaba nimikta aseeta. Hean gageanu lagheaneanagi aba hoowa, ak gwadiiwa uhuudaanyi ak gwalil. 12Hean goorgweadi ak ghwadaah gidingeanda miinaada aba ng'eanyi nea ghwahita uhuudaanyi humng'eeda; ak ging'ulayi, malaykajeega ASEETA gwadiyeada nea ghwararang'aan aba uhuuda! 13Asi ng'ula, NG'UTAMIIDA ghamiinaada aba uhuuda ak gwayeesha, “Aniini geawooschi NG'UTAMIIDA, ASEETA Abrahamu was gweanu ea ASEETA Isaka; ng'eanyiini iwiiligeawiin gaydagoonyi ang'iing'i ea jeacheangaagu; 14ak gaygwadeena jeacheangaagu birjeanda ng'eanyiida ak gajadarda nea goorakti nea ghoatoaschi nea googali wiilooda ng'eanyiida ghayeawa ea googali wiilooda ng'eanyiida biyeara; nea aba badaydaang'u ea jeacheangaagu gayghwanyas ghawooda eemoojiga sean bea muunda ng'eanyiida. 15Ng'ula, aniini gajeendeayeena ak gaydaahaaghwaneey aba hiji uwi sean, ak gaydeadeelneey ng'eang'i; aba gideaba maydanung'useey heeda ea dasin ng'asheanda ghayi earukuneey.” 16Ng'ata ghang'eada Yakobo ruweanga ak gwayi, “Aba huumwa hiji gwanda NG'UTAMIIDA; ak ea mwaanali.” 17Hean ghabeal, ak gwayi, “Hiji ea haloataan! Iyeang'ulayi hiji ea gheeda ASEETA, ak nih ea gidaghuuta humng'eeda.”
18Ghang'eat Yakobo nea ghaghar gayeew, ak gageanu lagheaneeda gwachi diiwa uhuudaanyi ak ghaghurghurda ghamiinaada ghoah daraneeda ak goodalealsa uhuuda nagheeda. 19Ak gaguura gheawungeaba ng'eanyiita Beteli; nea gheawunga mujiini aba mwadi geeguura Lusu. 20Hean ghwaak Yakobo habeawooda, nea gwayi, “ASEETA iijea dandeawa, ak ghoahaaghwanaan aba naweani aayaachiin, ak gagoonan hamita jea daak ea hang'weaka jea deakwa, 21ea dabiigu gicha ghaheanya nea geabea seayu, abeeda gayghoah NG'UTAMIIDA ASEETEANYU, 22ak eara lagheaneani aaghurghurdi ghoah daraneedeani, gayghoah gheeda ASEETA; nea haleanjeeda sean igoonyean gaydagoonyi agi aba jeeda gilatamanamughuush.”
Currently Selected:
GIING'EETA 28: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
