GIING'EETA 30

1Hean nea ghwadaah Raheli mii gwajiilsa Yakobo baleanda, iidu gwashissa ghaang' huda ghaamwat; ak gwayeesha Yakobo, “Goonean diibiga, ghana iimaygoona abeeda ghang'wana ghaameayi!” 2Iidu gwanyareeksa Yakobo Raheli, nea gwayeesha, “Neada aniini geandi hoorgeeda ASEETA weadaneey nyasooda diibiga?” 3Ghwalamda Raheli ak gwayeesha, “Nukwa hudeanyu bea gadiyeeda siguura Bilha; una heeda, ak abeeda gwajiilnean diibiga, ak abeeda ghaanyaschi diibiga aba niny.” 4Hean ghoadaw siyeadaanyi huda gadiyeeda siguura Bilha ghoah gatmoadaanyi; iimuchu gawa Yakobo heeda. 5Iimuchu gagweayiit Bilha ak gwajiilsa Yakobo baleanda. 6Ng'ata gwayi Raheli, “Ning'ullean ASEETA gideaba ghaadoabiiwji, nea ghabwada niyiiy ghuuteanyu ak gagoonan baleanda”; ak gaguura gheawungaaschi Dani. 7Gabiikta gagweayiit huda gadiyeeda siguura Bilha ak gwajiilsa Yakobo baleandeaba iyeenya. 8Hean gwayi Raheli, “Aniini neang'uchi ng'ucheeda ng'waan sea huda giyeanya, ak ea neajooriischi”; ak gaguura gheawunga baleanda Naftali.

9Iimuchu nea ghwadaah Leya gideaba niduulean jeataanyi, gageanu hudaanyi bea gadiyeeda siguura Silpa ak ghoadaw Yakobo ghoah gatmoadaanyi. 10Nea huda gadiyeeda bea Leya was Silpa gwajiilsa Yakobo baleanda. 11Ak gwayi Leya, “Geandeawi gheamamda!” Ak gaguura gheawungaaschi Gadi. 12Ak gwaji huda gadiyeeda bea Leya siguura Silpa baleandeaba iyeenya jiilsa Yakobo. 13Hean gwayi Leya, “Aniini geahoosanyi! Aba gideaba gaygaguureewean gadeemga hooseaneega”; ak gaguura gheawunga baleanda Asheri.

14Eaweecha aba damanda lajita ngaano gawa Rubeni madamnyeanda ak gweadu geeta was meajooda miy weeda gadeemga ak ghwanung' ghwanyas diibiga ak gweassa ghaamwat nea Leyahi. Ng'ata gwayeesha Raheli Leya, “Geamuscheey goonean sakghwiilooda ng'ay bea orjeedang'u.” 15Ng'ata gwayeesha Leya, “Iing'ulayi ea ng'asheanda mwanang' gideaba gigeandi siyeedeanyu? Ak gigasayi geanda eara geeta orjeedeanyu?” Gwayeesha Raheli, “Abeeda gwadeepa mideawana eaweani Yakobo aba sakghwiilooda orjeedang'u.” 16Iidu nea ghwahina Yakobo madamnyeanda shing'ada, gwarita Leya jarooda ghwadeapta, ak gwayeesha, “Eaweani beeni heedeanyu; naadaydi aba badaydaang'u sakghwiilooda orjeedeanyu.” Ng'ata gwandeawa eaweedida. 17Hean ghwasha ASEETA gidamwaash Leya, ak gagweayiit ak gwajiilsa Yakobo balleandeaba muut. 18Gwayi Leya, “Nigoonan ASEETA gidamiy aba gideaba naadawji siyeedeanyu hudeanyu bea gadiyeeda”; ak gaguura gheawungaaschi Isakari. 19Ak gabiikta gagweayiit Leya, ak gwajiilsa Yakobo balleandeaba lah. 20Ak gwayi Leya, “Nigoonan ASEETA gidamiy; asi ghamneawa gaygwasinnean siyeedeanyu mureeda, aba gideaba neajiilsi orju lah”; ak gaguura gheawungaaschi Sabuloni. 21Iimuchu gwaji huda, ak gaguura gheawungaaschi Dina. 22Iidu ghoapkaat ASEETA Raheli, ak ghwasha mooshtaanyi bea ASEETA hean ghwanung' gootina jeeda. 23Hean gagweayiit ak gwaji balleanda, ak gwayi, “Nigeanda ASEETA baspaseegeasu”; 24ak gaguura gheawungaaschi Yosefu, nea gwayi, “Gidabal gooheanean NG'UTAMIIDA ballean nuut!”

Yakobo gabalool sea Labani

25Iimuchu nea niji Raheli Yosefu, gwayeesha Yakobo Labani, “Goonean beata dawa ng'eang'deanya. 26Goonean gadeemgeasu ea diibigeasu aba gideaba neagadiyeeseey, ak ginung' dawa; aba gideaba ang'iing'i ginali gadiyeeda neasineey.” 27Ghwalamda Labani ak gwayeesha, “Iimwasi darukuneey ng'ashaan, ea naadaayi aba giirgweatka gideaba nigoonan NG'UTAMIIDA ghawooda aba badaydaang'u; 28rukuni gidageatindaang'u, ak gaydagoonyi.” 29Ghwalamda Yakobo ak gwayeesha, “Ginali ang'iing'i gidaneagadiyeesiindaneey, ea gidahaadaata dugwaagu damanda aahaaghwiidi. 30Aba gideaba heeda mii dahina dugwaagu ea ng'ay, ak ea niihaada muuchi; ak ea nigoonyi NG'UTAMIIDA ghawooda aba heeda eagali sean. Ak ghamneawa gaydagadiyeesa eeju gheenyu?” 31Gwayeesha niny, “Gaydagoonyi naaha?” Ghwalamda Yakobo ak gwayeesha, “Adigoonyean eara gil; iisinnean ng'asheanji, gaydabiikta gicha haghweeda hawandaang'u nea geang'ulayi: 32nung' dawa jeeda hawandaang'u sean askweareani, ak ghaaghwali gilinyoo ea gisilleanda buscheeni gil ea dea murearajeega, ea gilinyo ea gisilleanda duwi, ea gilinyo ea mbooyda bwaash, ea gea murearajeega; ak abeeda gayghoah gidagadiyeedeanyu. 33Ak abeeda iidu gayjeeng'ni gideaba geawooschi doabiiwaat, iwuni sikteawana gidageatindeanyu aba headaang'u. Mbooyda wassean mii buscheeni ghana gaba murearajeega aba jeeda nooga, ea dea duwi aba jeeda gisilga, iisinyasa heedeanyu, gajeanung' ghoah gili sijagwat.” 34Ghwalamda Labani ak gwayeesha, “Aamiy! Gagasa ghoah gida inyaashi.” 35Hean askweardida ghwasach Labani ghwarayga beari ea gea murearajeega, ea nooga sean seaweadi beari ea gea murearajeega, ea gilinyoo gwandeawa heedeesh aba saseeda, ea gilinyoo ea gisilleanda duwi, ak ghwanung' ghoahaaghwa orjoagaaschi; 36ak gawa heeda sheagi gooheelli geaw Yakobo jea ghwahita eawooji samwagu hiteayda; ak ghoahaaghwa Yakobo gisilga siipuut bea jeeda hawanda Labani.

37Ng'ata gageanu Yakobo ng'aritka shabeadi bea seegiida ea gooseamng'eanda, ea lagawjeanda, ak ghawaas badatka mwaatkwa ak gaweeriidi ng'ooruutka nyaawa, ak ghwadaajiit ng'ooruutka ng'aritka. 38Ak ghwayiin ng'aritsu waawiin madeeda simeeda nooga, leehha nooga beega, aba gideaba gwatkwiischi hawanda nea ghapka ghwaleayda, 39hean gwatkwiischi ghwarayga aba madeeda ng'aritka, ng'ata gwaji hnooga gea beari, ea gea buscheenyeewi ea gea murearajeega. 40Ng'ata gooheeldooschi Yakobo dayeega gisilga ak ghwanung' gagal iheenga nooga heeda gea beari nea gea duwas sean mida jeeda nooga Labani; ak ghwajap jaboadaanyi nea gooheeli sea dea nooga Labani. 41Hean iissa nooga majeekcheewi gageanu Yakobo ak ghwayiin ng'aritka madeeda nooga, ak abeeda gwatkwiischi aba dageascheeda ng'aritka, 42ak ea mwayiina ng'aritka madeeda nooga ribeacheewi; ak nooga ribeacheewi gaba Labani nea nooga majeekcheewi gaba Yakobo. 43Hean gabaruur siida muuchi, ak gwasin nooga saang'a, ak ghwanyas haweega gadiyeeda ea soomjooga was headiga, ak ghwanyas ngamiyajeega ea digeeniga.

Currently Selected:

GIING'EETA 30: BG15

Highlight

Copy