GIING'EETA 31

Yakobo gamng'awa Labani

1Iimuchu ghwayiiy Yakobo gideaba gwayeena baloojiga Labani, “Yakobo nigeanda haleanjeeda sean bea bwaabwa; nea aba haleanjeeda was gea bwaabwa hean ghwanyas baruureesu seaniin.” 2Iidu ghwadaah Yakobo gideaba Labani mudu gwaduupcheata gidaghayi bea mwadi. 3Iimuchu gwayeesha NG'UTAMIIDA Yakobo, “Biikta ng'eang'deang'wa ea heeda buweadeagaagu, ak gajeendeayeena.” 4Ng'ata goojeaksa Yakobo Raheli sea Leya gwaroonyeesa mooheeda heeda mida noagaaschi, 5ak gwayeesha, “Neajeeng'u gideaba gweanu mudu ghoasaamwan gidaghayi bea mwadi. Duuku aniini geandeawi ASEETA jih bwaabwa. 6Agooga ghoanali gideaba ghayi geagadiyeesi gweanu aba uurdeanyu sean; 7ak gwareenganean gweanu ak ghwayam gidageatindeanyu niba damanamughuush, ak iidu ghaheawa ASEETA ea masawanean. 8Iyayi, ‘Gea murearajeega gayghoah gidageatindaang'u’, abeeda gwaji nooga sean murearajeega; ama ayi, ‘Gea beari gayghoah gidageatindaang'u,’ abeeda gwaji nooga sean gea beari. 9Ak ghoah gidageandeaysa ASEETA dugwa gweanu, ak gagoonan. 10Iihita damanda duwooda noogaa geargweaday geagatkachi gheanyangeasu, ak ghaadaayi aba jeeda giirgweatka gideaba ghwarayga dugwiischi aba jeeda nooga ea beari nea gaba murearajeega, ea gea buscheeni. 11Hean gwayeeshean malaykajeanda ASEETA aba jeeda giirgweatka, ‘Yakobo,’ ak geayeeshi, ‘Geandi hiji!’ 12Ak gwayi, ‘Gatkada gheanyangaagu ak giing'weardi, ghwarayga sean deambiiriisa nooga ea beari, nea gaba murearajeega, nea buscheenyeewi; aba gideaba naadaayi ng'asheega sean simaneey Labani. 13Aniini geawooschi ASEETA Beteli, damanda iyeashi daraneeda ak giyeaksean habeawooda. Asi ng'eada, ak ging'ami ng'eang'i, ak gibiikti ng'eanyiida ghayi sijiilseey.’” 14Hean ghwasha Raheli sea Leya nea gwayeesha, “Mudugwanda gichea eehearana aba heeda bwaabwa? 15Neada niny ea mwanung' eahuuwa rabasta? Aba gideaba niny ghayi ghwashaaydaneasa, ak ghwaak lapiyeeda siitaw aba badahuukaasa. 16Haleanjeeda sean geanda ASEETA aba heeda ghweandeanya gaasa gil ea diibigaasa; asi ghamneawa, gida wassean rukuneey ASEETA sina.”

17Ng'ata ghang'eat Yakobo, ak goodiing'da orjoagaaschi sea gadeamgaaschi badahuuka ngamiyajeega; 18ak ghoawaas dugwaaschi sean, ea haleanjeadaanyi sean mideawa, was dugwa nyasa ng'eanyiida Badan-aramu, ak gawa ng'eanyiida Ganaani heeda ghweandaanyi was Isaka. 19Abeeda Labani nuwa ghwalajaada buudeega gisilgaaschi, ak gwajagwat Raheli aseecheeka ghwaan. 20Abeeda Yakobo nireengani Labani bea eemeeda Arami, aba gideaba marukusiina gideaba gagasa beata. 21Hean gamng'aw nea ghwaat haleanjeeda sean mideawa, ak ghang'eat ghoaghaawa eenda Furati, ak ghoaburbuur ng'eanyiida heayeeniga bea Gileyadi.

Labani ghwaat geeshta Yakobo

22Iimuchu nea geerukusa Labani eaweeteaba samwagu gideaba niwaapta Yakobo, 23gageanu buweadeagaaschi ak goodeayi sea niny ghwaat geeshta Yakobo ea ghwahita eawoojiga ispwa ea ghwanyasa ng'eanyiida heayeeniga Gileyadi. 24Ng'ata gabussa ASEETA Labaneeda eemeeda Arami eawa aba jeeda giirgweatka gwayeesha, “Shageada adiidu girukusi Yakobo ng'asheanda miy ghana dea muy.”

25Hean ghwasuut Labani Yakobo. Abeeda Yakobo niduuwsa ng'eanyiida heayeeniga ak goongoor maheemajeandaanyi, nea Labani sea buweadeagaaschi gooduuwsa ng'eanyiida giijeega Gileyadi. 26Iidu gwayeesha Labani Yakobo, “Ang'iing'i nisini naaha, ea eeyi bwak ea reenganean, ak giyaadi haweegeasu gawuurji giing'oonyanga ng'uta? 27Ghwasaan inyas gimng'awi nea gijagwadeadi, ak gireenganean nea mirukunean, ak abeeda ghaadoabiiwaneey hooseaneega ea sarmeeda, aba igeambooda ea gidoondooriida? 28Ak ea minung' daghat orjoogeasu ea haweegeasu? Ng'asheanji gisini leendeeda. 29Aba uurdeanyu ghaamuuschi dasawanyi; amadu goobaloolan ASEETA gweanu ghoosa eawa nea gwayi, ‘Shageada adiibalooli Yakobo ng'asheanda miy ghana dea muy.’ 30Ak ghamneawa ea nuwi aba gideaba gigasayi muuchi beata ghaheang'wa, abeeda ghwasaan inyas gijagwadi haleanjeedeanyu eagadoowanayi?” 31Ghwalamda Yakobo ak gwayeesha Labani, “Nih gweagu gideaba ghaabeali, aba gideaba geayeenyi gajiidu giireachaan haweagaagu aba uurda. 32Siida wassean inyasi haleanjeadaang'u igadoowanayi maygoobiida ng'eanyiida. Aba madeeda buweadeagaagu miina gida eandeawi was daang'u, ama ng'ata gigeandi.” Abeeda Yakobo mwanala gideaba nijagwat Raheli haleanjeedida.

33Ng'ata gawa Labani jeeda maheemajeanda Yakobo, ea jeeda maheemajeanda Leya, ea jeesinga maheemajeega haweega asiyeenya was soomjooga, ak ea mwanyasa. Ak gwariteawa maheemajeanda Leya ak gawa jeeda maheemajeanda Raheli. 34Abeeda Raheli nigeanda haleanjeeda sigadoowani ak gwayiin jeeda shageeda ngamiya, ak goopteadawa. Nea Labani abeeda ea nisaach jeeda maheemajeanda sean, ak ea mwanyasa. 35Ak gwayeesha ghwaan, “Ng'utamiideanyu adinyareeksean mwammuusi dang'eat aba madeadaang'u, aba gideaba gwaneaweesean eaghwada.” Hean ghoasaach ak ea mwanyasa haleanjeeda sigadoowani.

36Hean gwanyareeksa Yakobo Labani ak gwayeesha, “Neada ramaseandeanyu ea naaha? Riing'eedeanyu neada ea naaha, ea gasa ang'waanyaan? 37Earapeadi nisaaji haleanjeedeanyu sean, ninyasi naaha was gidaang'u? Iina madeeda buweadeegeasu ea buweadeagaagu, ak abeeda gooheelaneasa. 38Aniini sindeayi gweanyeew diktam sea ang'iing'i; jeata gisilgaagu ea noagaagu ea mii gahoosu, ak ea miidaak lagweendiga hawanigaagu. 39Dea ak diyeanga, iissa ea meayeaneey; iissa gigasayi aba geatingeasu ak ghaaghiischi aniini, adeejagwat askweari ghana eejagwat eawa. 40Iissa gwasawanan daknooda askweari, ak gwasawanan jeameeda eawa, ak iissa ea mwaanyasi eara ruweanga. 41Gweanyeeksu atiktamiin geabiiti gheang'u; neagadiyeeseey gweanyeew damanang'wan aba badahuuka haweagaagu asiyeenya, ea gweanyeew lah bea hawandaang'u, ak giyami gidageatindeanyu niba damanamughuush. 42Asi gwachi ii maduuksean ASEETA ghweandeanyu was ASEETA Abrahamu ea gheawalmeeda Isaka, gwachi aba huumwa gajea ninung' dawa nea mwaayaadi gil. ASEETA ghwadaah sawanadeedeanyu ea gadiyeeda geatingeasu ghoah gidaghoosa awoowsiinaneey.”

Neajeeda Yakobo ea Labani

43Ng'ata gwayeesha Labani Yakobo, “Haweesu haweegeasu, nea diibisu ea diibigeasu, nea hawaniga ea hawanigeasu, nea haleanjeeda sean iing'ulayi ea geasu. Ak abeeda gaydasin naaha aba haweesu ikeasuun, ghana diibiga nyaawa jih? 44Asi beeni, eesina neajeeda ang'iing'i ea aniini; ak abeeda ghoah muushoocheanda aba dageascheadaang'u ea deanyu.” 45Hean gageanu Yakobo lagheaneeda, ak ghamiinda ghoah daraneeda. 46Ak gwayeesha Yakobo buweadeagaaschi, “Oawwaamwa lagheanga,” ak gageanu lagheanga, ak ghoammughuush; ak gweagiischi aba guumda lagheanga. 47Ak gaguura Labani Yegar-sahaduta: nea gaguura Yakobo Galedi. 48Ak gwayi Labani, “Mughuusheanda lagheanga neajeeda gil aba dageascheadaang'u ea deanyu askweareani.” 49Ak gaguura gheawungaaschi Galedi, ak gaguura daraneeda Mispa, aba gideaba gwayi, “Gidabal goobiida NG'UTAMIIDA gang'ula aba dageascheedeanya ang'iing'i ea aniini, damanda siwoosi dardaawaat. 50Asi ang'iing'i isimi haweegeasu ng'asheega munyas ghana gheana gadeem suuk ak giroabi haweegeasu, earapeadi mwaanali, apkaada gideaba ASEETA muushoocheanda gil aba dageascheadaang'u ea deanyu.”

51Iidu gwayeesha Labani Yakobo, “Daaha mughuusheanji bea lagheangean ea daraneeda, aayiinnyi dageascheadaang'u ea deanyuun. 52Mughuusheanji bea lagheangean muushoocheanda, nea daraneeda ea muushoocheanda, gideaba maydaneawna lagheang'su ak ghaabwarjeey, ak ea mayneawnana lagheang'su ea daraneani ak guwuni heedeanyu, ak gisawanyean. 53ASEETA Abrahamu ea ASEETA Nahori, was ASEETA ghwaan, gagasa goobiida dageascheedeanya gooheelaneasa.” Hean ghwaak Yakobo habeawooda aba Gheawalmeeda ghwaan was Isaka, 54ng'ata ghoadayda Yakobo lukghumeeda aba uhuuda giijeeda ak gaguursa buweadeagaaschi ghwaak hamita; ak ghwaak hamita ak goobiida eaweesean uhuuda giijeeda. 55Iimuchu nea ghaghar gayeew ghang'eat Labani, ak ghwasam gheatkweaka diibigeaba gaaschi ea haweagaaschi ak ghoadaw ghawooda; ng'ata gwaheeli ak gabiikta ghoah.

Currently Selected:

GIING'EETA 31: BG15

Highlight

Copy