Nɩ-tʋnɩsɩ tʋmɔ Sɛbɛ 10
10
A PƖƐR NA CEN A KƆRNƐƐ SƐ̃
1Daba dãa na be be a Sejare a ba bʋɔlɔ Kɔrnɛɛ. Ʋ ɩ na a sɔdaal-nɩ-kpɛ̃ɛ a Orom sɔdaalsɩ bala pʋɔ ba na bʋɔlɔ a Ɩtalɩ sɔdaalsɩ. 2Ʋ puoro na a Naaŋmɩn ɩ̃ mɩ jɔrɔ ʋ, a ʋlɔ nɩ a ʋ yir deme ba jaa. Ʋ ma irʼã libi-yayaw sũono nɩ a Jufisɩ ɩ̃ mɩ sʋɔrɔ a Naaŋmɩn ma gala wa. 3Bibir kãw a mɔtɔ̃w gɔrfʋ daar, ʋ nyɛ na a Naaŋmɩn sɩ-tʋnaa gbelẽgbelẽ ʋ kpɛ a ʋ sɛ̃ sɩɛ bom kaarɩ̃ ɩ̃ yel ʋ:
“Kɔrnɛɛ!” 4A Kɔrnɛɛ ꞌwuor ʋ kir-kir-kir ɩ̃ a dãbɩ̃ɛ nyɔw ʋ ʋ yel: “Boolo ʋ, Nɩ-kpɛ̃ɛ?”
A sɩ-tʋnaa yel ʋ:
“A Naaŋmɩn sɔw na a fʋ sʋɔrfʋ nɩ a fu sũofʋ fʋ na sũono a nãw deme, ɩ̃ cãa tɛrɛ a fʋ tɩɛrɛ. 5A ƴɛ̃ƴɛrɩ̃ na, tʋ nɩbɛ a ba cen a Jope na bʋɔl a daba ʋlɔ na dɩ a Sɩmɔ̃ ba na mɩ bʋɔlɔ a Pɩɛr. 6Ʋ be na a ʋ yuor Sɩmɔ̃ yir pʋɔ na ɩ a gan-cɔɔrɔ, a ʋ yir na be a man gbẽgbere nʋɔr.”
7A lɛ a sɩ-tʋnaa na ƴɛrʼɩ̃ a Kɔrnɛɛ ɩ̃ cen baar, ʋ bʋɔlʼã a ʋ tʋ̃tʋnbɔ ayi nɩ a sɔdaalaa ƴen sʋbɔ ʋ na barʼɩ̃ a nyãa na mɩ puoro, 8na ʋ miil ba a ala a jaa ʋ na nyɛ, ɩ̃ tʋ̃ ba a Jope.
9A dɩvɩɛ bio, a mɩnɛ a bana nɩbɛ na cãa be a sɔr pʋɔ pɩɛlɛ a Jope, a Pɩɛr do na a garɩ̃ a mɔtɔ̃-tuo a Naaŋmɩn sʋɔrfʋ ɩnɛ, 10a kɔ̃ nyɔw ʋ ʋ bʋɔrɔ a dɩb. Ɩ̃ a lɛ ba na cãa maala a dɩb, ʋ nyɛ na sɩɛ bom. 11Ʋ nyɛ na a saꞌlon ʋ yuo ɩ̃ a bom yi a be ɩ̃ suure wɔ̃ taa nɩ gã-kpɛ̃ɛ ba na nyɔw a jiir anaan ɩ̃ ture ʋ suure pɩɛlɛ a tene. 12A wɛ-yel-bʋrɔ bʋrɔ ba jaa be na a gãw pʋɔ: a gbɛɛ anaan deme, a yel-vurisɩ, nɩ a pɩrɛ deme. 13Ɩ̃ ʋ wõ na kɔkɩr na yel ʋ:
“Pɩɛr, ir kú ꞌwɔb!” 14Ɩ̃-cɛ a Pɩɛr yel ʋ na:
“Nɩ-kpɛ̃ɛ, maa tʋɔrɔ wa! A-na-ɩ a yel-ciirsɩ nɩ a yel-kpansɩ maa kpɛ a ɩ̃ nʋɔr pʋɔ wa.” 15Ʋ lɛ wõ na a kɔkɩr na lɛ yel ʋ:
“A ala a Naaŋmɩn na yel áa ɩ na yel-sono, taa yele áa ɩ na yel-kpansɩ wa.” 16A ta na gbɛɛ ata a na maal a lɛ, ɩ̃ a jie naan, ba lɛ de na a ana yele do nɩ a saꞌlon.
17A lɛ a Pɩɛr na cãa pɛrɛ a sɩɛ bom ʋlɔ par ʋ na nyɛ, a dabsɩ bala a Kɔrnɛɛ na tʋ̃ sooro na a Sɩmɔ̃ yir wa ta nɩ a dɔ̃dɔrɩ̃. 18Ba bʋɔlʼã soor:
“Ka a Sɩmɔ̃ ʋlɔ ba na bʋɔlɔ a Pɩɛr be?” 19Ɩ̃ a lɛ a Pɩɛr na cãa pɛrɛ a sɩɛ bom ʋlɔ par, a Naaŋmɩn Sɩɛ yel ʋ na:
“Sɩmɔ̃, nɩbɛ ata be na be bʋɔrɔ fʋ. 20Ir suu pɔw ba a nyɩ lãa cen. Taa baala wa, a-na-ɩ maa ɩ̃ tʋ̃ ba a ba wa.” 21A Pɩɛr suu a bana nɩbɛ sɛ̃ na yel ba:
“Maa ɩ̃ ɩ a ʋlɔ nyɩ na bʋɔrɔ. A nʋmɔ na a nyɩ wa ka?” 22A ba yel ʋ:
“A sɔdaal-nɩ-kpɛ̃ɛ ʋlɔ ba na bʋɔlɔ a Kɔrnɛɛ ɩ̃ tʋ̃ sɩ. Ʋ ɩ na a nɩ-toraa na jɔrɔ a Naaŋmɩn, ɩ̃ a Jufisɩ ba jaa mɩ ƴɔnɔ ʋ. A Naaŋmɩn sɩ-tʋnaa yel ʋ na a ʋ bʋɔl fʋ a fʋ wɩ a ʋ yir ʋ cɛl a ala fʋ na tɛrɛ mana ʋ.” 23Ala-ɩ̃-sɔ a Pɩɛr ɩ na a ba kpɛ gã a be.
A bio vɩɛ, ʋ ir de a sɔr a ba lãa cere, a yɛɛr ŋmɛɛ na be a Jope pɔw ba cenʼɩ̃. 24A dɩvɩɛ bio a Pɩɛr ta na a Sejare nyɛ a Kɔrnɛɛ nɩ a ʋ yir deme nɩ a ʋ badɛɛ ʋ na bʋɔl a ba jɛ gu ʋ. 25A lɛ a Pɩɛr na ta kpɛɛrɛ, a Kɔrnɛɛ irʼã tuor ʋ ɩ̃ gburĩ a dume a ʋ nii-sɔw puoro ʋ. 26Ɩ̃ a Pɩɛr nyɔw ʋ na ʋ ir ʋ yel ʋ:
“Ir ɩraa, a-na-ɩ a maa mɩ, nɩrɛ ɩ̃ mɩ ɩ.” 27Ʋ ƴɛrɛ nɩ na a Kɔrnɛɛ a ba kpɛ, ʋ nyɛ a nɩ-yaw na duo 28ʋ yel ba:
“Nyɩmɩ mɩ̃ɛ bɔ̃w na a sɩmɩ Jufisɩ puorfʋ ƴɛrɩ̃ pʋɔ, sɔr ma be be a sɩ na lãa gbɛbɛ taa nɩ a nɩ-bʋlsɩ wa, wa yele nɩ a ba yir kpɛfʋ wa. Ɩ̃-cɛ a Naaŋmɩn man ma na a ɩ̃ taa wa ꞌwuoro nɩrɛ ʋ wɔ̃ taa nɩ nɩ-kpana mɩɩ nɩ-sãwnaa wa. 29Ala-ɩ̃-sɔ a mɩnɛ nyɩ na tʋ̃ bʋɔl ma, maa dãa baalɩ̃ wa. Ɩ̃ wa na. Ƴɛ̃ƴɛrɩ̃ na, ɩ̃ sʋɔrɔ nyɩ na, nyɩ́ man ma a ala ɩnɛ nyɩ na bʋɔl ma.” 30A Kɔrnɛɛ yel:
“A ɩ na bibie ata a dɩnaa ɩ̃ na be a ɩ̃ yir pʋɔ a nɔhɔ̃-wen, na ɩ̃ puoro a jaanʋɔr puorfʋ. A be a jie naan, ɩ̃ nyɛ na daba na su cẽcẽ-nyɩlaa ʋ ɩraa a ɩ̃ nii-sɔw 31ɩ̃ yel ma: ‘Kɔrnɛɛ, a Naaŋmɩn wõ na a fʋ sʋɔrfʋ, ɩ̃ ꞌwaa hiin a fʋ sũofʋ a nãw deme jie wa. 32Ala-ɩ̃-sɔ tʋ̃ nɩbɛ a ba cen a Jope na bʋɔl a Sɩmɔ̃ ʋlɔ na mɩ dɩ a Pɩɛr ʋ wa. Ʋ be na a ʋ yuor Sɩmɔ̃ ʋlɔ yir na ɩ a gan-cɔɔrɔ na be a man gbẽgbere nʋɔr.’ 33Ɩ̃ tʋ̃ na bʋɔl fʋ a jie naan a lɛ, ɩ̃ fʋ pɛlɩ̃ na pʋɔ ɩ̃ wa. Ɩ̃ a ƴɛ̃ƴɛrɩ̃ sɩ be na ka a Naaŋmɩn nii-sɔw sɩ jaa bʋɔrɔ sɩ cɛl a ala a jaa a Nɩ-kpɛ̃ɛ na ƴɔ̃w fʋ a fʋ na ƴɛr sɩ.”
A ƳƐRƖ̃ A PƖƐR NA ƳƐR A KƆRNƐƐ YIR
34A Pɩɛr nyɔw na a ƴɛrɩ̃ ɩ̃ ƴɛrɛ yele:
“A ƴɛ̃ƴɛrɩ̃ na, ɩ̃ nyɛ na bɔ̃w ka a Naaŋmɩn ma ꞌwuoro a nɩbɛ kpee kpee wa, 35ɩ̃ a nɩ-bʋrɔ bʋrɔ ba jaa sɔ̃w, a nɩrɛ lɛ na jɔrɔ ʋ ɩ̃ maala a ala na tor, ma nʋmɔ ʋ na. 36A Naaŋmɩn turʼã a ƴɛr-son kʋ a *Ɩsɩrayɛl nɩbɛ miile ba a pɩɛnfʋ ʋlɔ na yi a *Jeeju-Kirisi jie, na ɩ a nɩbɛ ba jaa Nɩ-kpɛ̃ɛ. 37Nyɩ bɔ̃w na a ala na maal a Jude wɩɛr ʋ jaa wa nyɔw nɩ a Galile, a daar ʋlɔ a Jã na dãa ƴɛr a kʋ̃ɔ mʋrfʋ ƴɛrɩ̃ baar. 38Ɩ̃ nyɩ mɩ bɔ̃w na a mɩnɛ a Naaŋmɩn na vɛl ir a Najarɛtɩ *Jeeju ɩ̃ de a ʋ Sɩɛ nɩ a ʋ fãw kʋ ʋ, nɩ a mɩnɛ a Jeeju na dãa yʋɔrɔ maala a vɩlaa kpɛmɛɛ nɩ a bala a Satã na hʋɔlɔ, a-na-ɩ a Naaŋmɩn be nɩ ʋ na. 39A sɩmɩ, sɩ nyɛ na a ala a jaa ʋ na maal a Jerujalɛm nɩ a Jufisɩ tẽw ʋ jaa pʋɔ, ɩ̃ mana kʋrɔ a nɩbɛ. Ɩ̃ ba nyɔw ʋ na kpa yaal a daa juu ʋ kpi, 40ɩ̃-cɛ a Naaŋmɩn ir ʋ na a kũu pʋɔ a bibie ata dayen ɩ̃ maal ʋ ʋ nyɩr sɩ. 41Ɩ̃ aa ɩ a nɩbɛ ba jaa ɩ̃ nyɛ ʋ wa, ɩ̃-cɛ ʋ nyɩrʼã a sɩmɩ a Naaŋmɩn na de nĩe vɛl ir a sɩ ɩ a yel-mɩ̃ɛ ƴɛr-manba, a sɩmɩ na dãa lãa dɩ nɩ ʋ mɩ lãa nyu nɩ ʋ a lɛ ʋ na ir a kũu pʋɔ baar. 42Ʋ yel sɩ na a sɩ hiere kʋrɔ a nɩbɛ miile nɩ ba a ʋlɔ a Naaŋmɩn biin ʋ ɩ a nɩ-mimie nɩ a kũusɩ ƴɛr-guoro. 43A Jeeju ʋlɔ a Naaŋmɩn ƴɛr-hierbe ba jaa dãa miile yele nɩ áa nɩrɛ lɛ na sɔw de ʋ, áa Naaŋmɩn na de na a ʋ yuor barʼɩ̃ a sʋbɔ ʋlɔ maal-faar kʋ ʋ.”
A NƖ-BƲLSƖ MƖ PƆW NA A NAAŊMƖN SƖƐ
44A lɛ a Pɩɛr na cãa ƴɛrɛ, a Naaŋmɩn Sɩɛ suu na pɔw a bala ba jaa na cɛlɛ a ʋ ƴɛrɩ̃. 45Nɔɛ ko na a popuorbo bala na ɩ a Jufisɩ na dãa bɩɛl a Pɩɛr a ba lãa wɩ, a mɩnɛ ba na nyɛ a Naaŋmɩn ʋ mɩ tɩɩr a ʋ Sɩɛ ʋ suu pɔw a nɩ-bʋlsɩ, 46a-na-ɩ ba wõ na a ba ƴɛrɛ a ƴɛr-bɔ̃w-faarsɩ pɛwrɛ nɩ a Naaŋmɩn. A lɛ, a Pɩɛr yelʼã:
47“Sɩ na tʋɔ na mɔ̃w a nɩbɛ na a kʋ̃ɔ mʋrfʋ mɩɩ? A-na-ɩ ba mɩ pɔw na a Naaŋmɩn Sɩɛ a sɩ kaarɩ̃”, 48ɩ̃ na ʋ ƴɔ̃w a ba de a *Jeeju-Kirisi yuor mʋrʼɩ̃ ba a kʋ̃ɔ, ɩ̃ a ba sʋɔr ʋ a ʋ jɛ be fɩ̃ɩ a ba sɛ̃.
Currently Selected:
Nɩ-tʋnɩsɩ tʋmɔ Sɛbɛ 10: BNT93
Highlight
Share
Compare
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
