Nɩ-tʋnɩsɩ tʋmɔ Sɛbɛ 9
9
A SOL YƐ̃ LƖƐBFƲ
1Ɩ̃-cɛ a Sol cãa na pure a Nɩ-kpɛ̃ɛ *par-tuurbe bʋɔrɔ ʋ kú ba. Ʋ cenʼã a Naaŋmɩn *baar-lo-nɩ-kpɛ̃ɛ sɛ 2na sʋɔr sɛbsɩ a ʋ cenʼɩ̃ na kʋ a *puorfʋ yir ni-dierbe na be a Damasɩ, ɩ̃ a ala ɩ̃ ɩ ʋ nyɛ na a nɩbɛ bala na tuure a Nɩ-kpɛ̃ɛ sɔr, a dabsɩ mɩɩ a pɔɔbɔ, ʋ tʋɔ nyɔɔr ba cenʼɩ̃ a Jerujalɛm.
3A lɛ ʋ na be a sɔr pʋɔ cere na pɩɛlɛ a Damasɩ, a cãa yi na a saꞌlon a jie naan ɩ̃ wa nyɩnyɩl pɔw ʋ, 4ʋ lo a tene ɩ̃ wõ kɔkɩr ʋ yel ʋ:
“Sol Sol, bõ ɩ̃ ɩ a fʋ hʋɔlɔ ma a nɔhɔ̃?” 5A Sol soor:
“Nɩ-kpɛ̃ɛ, ala fʋ ɩ?”
Ʋ yel ʋ:
“Ɩ̃ ɩ na a *Jeeju ʋlɔ fʋ na hʋɔlɔ. 6Ɩ̃-cɛ, ir kpɛ a tẽw pʋɔ. A
be, ba na yel fʋ na a ala fʋ na sɛw fʋ maal.” 7Ɩ̃ a dabsɩ bala na lãa cere nɩ a Sol, ba ɩraa na lɛ gbul, a mɩnɛ ba na wõ a kɔkɩr ɩ̃ ma nyɛ nɩrɛ wa.
8A Sol lɛ irʼã ɩraa ɩ̃ yuo a mimie ɩ̃ ma nyɛ bom wa, a ba nyɔw ʋ a nuu taw kpɛ nɩ a Damasɩ. 9Ʋ jɔ̃w na maalʼɩ̃ bibie ata, ɩ̃ ma dɩ bom wa, ma mɩ nyu kʋ̃ɔ wa.
10Ɩ̃-cɛ *par-tuure ƴen sʋbɔ be na be a Damasɩ-tẽw pʋɔ ba na bʋɔlɔ a Ananɩya. Ʋ nyɛ na a Nɩ-kpɛ̃ɛ a sɩɛ bom kaarɩ̃ ʋ bʋɔl ʋ:
“Ananɩya!”
Ʋ yel:
“Nɩ-kpɛ̃ɛ, ɩ̃ sɔw na.” 11Ɩ̃ a Nɩ-kpɛ̃ɛ yel ʋ:
“Ir cen a sɔr ʋlɔ pʋɔ ba na bʋɔlɔ a Sɔr Toraa. A fʋ̃ʋ cen, fʋ ta a Judasɩ yir ɩ̃ soor a Tarsɩ-tẽw daba ʋlɔ ba na bʋɔlɔ a Sol. Ʋ be na be sʋɔrɔ a Naaŋmɩn, 12ɩ̃ ʋ nyɛ na daba ba na bʋɔlɔ a Ananɩya a sɩɛ bom kaarɩ̃, ʋ kpɛ a ʋ sɛ̃ dɔɔl ʋ a ʋ nuu a ʋ mimie na lɛ yuo.” 13A Ananɩya yel:
“Nɩ-kpɛ̃ɛ, nɩ-yaw man ma na a daba na ƴɛrɩ̃, nɩ a bier a jaa ʋ na maal a fʋ nɩbɛ na be a Jerujalɛm. 14Ɩ̃ a ka mɩ, a *baar-lo-nɩ-bɛrɛ mɩ kʋ ʋ na a sɔr ʋ na nyɔɔrʼɩ̃ a bala ba jaa na bʋɔlɔ a fʋ yuor.” 15Ɩ̃-cɛ a Nɩ-kpɛ̃ɛ yel ʋ na:
“Cen, a-na-ɩ ɩ̃ vɛlʼã a ʋna daba ir ʋ na ɩ a ɩ̃ tʋtʋnɔ, miilʼɩ̃ a ɩ̃ yuor kʋ a nɩ-bʋlsɩ nɩ a ba jamansɩ nɩ a *Ɩsɩrayɛl nɩbɛ mɩ a ba na bɔ̃w ma. 16A maa mɩ̃ɛ, ɩ̃ na miil ʋ na a won ala ʋ na sɛw ʋ nyɛ a ɩ̃ ɩnɛ.” 17Ala-ɩ̃-sɔ a Ananɩya cenʼã na kpɛ a yir ʋlɔ pʋɔ a Sol na be ɩ̃ dɔɔl ʋ a nuu ɩ̃ yel:
“Ɩ̃ yɛbɛ Sol, a Nɩ-kpɛ̃ɛ Jeeju ʋlɔ na nyɩr fʋ a lɛ fʋ na be a sɔr pʋɔ waara ɩ̃ tʋ̃ ma a fʋ sɛ̃, a fʋ mimie na lɛ yuo ɩ̃ a fʋ na sɛw nɩ a Naaŋmɩn Sɩɛ.” 18A jie naan, bom ꞌlaw na a Sol mimie pʋɔ lo wɔ̃ taa nɩ jɩm pɔbɔ, ɩ̃-cɛ ʋ lɛ nyɛrɛ. A lɛ, ʋ irʼã a ba mʋr ʋ a kʋ̃ɔ, 19ɩ̃ a lɛ ʋ na dɩ a dɩb baar, ʋ lɛ nyɛ na kpɛ̃w.
A SOL NA ƳƐRƐ A NAAŊMƖN ƳƐRƖ̃ A DAMASƖ
A Sol jɛ na a be a Damasɩ fɩ̃ɩ nɩ a *par-tuurbe bala na be a be. 20A jie naan, ʋ cenʼã a *puorfʋ yie pʋɔ na nyɔw ɩ̃ hiere kʋrɔ ba áa *Jeeju ɩ na a Naaŋmɩn Bie. 21A nɔɛ ko na a bala ba jaa na wõ a ʋ ƴɛrɩ̃, a ba sooro taa:
“Aa ɩ a daba na ɩ̃ dãa bũbure a bala na bʋɔlɔ a yuorʼãa a Jerujalɛm wa? Ɩ̃ ꞌwaa mɩ wa a ka a ʋ nyɔɔr ba lũ cenʼɩ̃ a *baar-lo-nɩ-bɛrɛ jie wa?” 22Ɩ̃-cɛ a Sol fãw dɔɔlɔ na a bibie a jaa, ʋ ma ƴɛr a ƴɛrɩ̃ tʋɔ a Jufisɩ bala na be a Damasɩ, a jur bɔr ba, a mɩnɛ ʋ na ma miile ba áa Jeeju ɩ̃ sɩrɩ̃ ɩ a *Kirisi.
23A mɩnɛ a bibi-yaw na tɔl baar, a Jufisɩ duo na taa goro a Sol kúfʋ. 24Ɩ̃-cɛ nɩrɛ yel ʋ na á ba goro ʋ na. Ba gure na a tẽw dɔ̃dɔ-nɔɛ a mɔtɔ̃w nɩ a tɩsɔw a mɩnɛ ba na kúrɔ ʋ. 25Ɩ̃-cɛ a Sol par-tuurbe ɩ na ʋ kpɛ kpɛ̃jɛrɩ̃ pʋɔ a tɩsɔw a ba tur ʋ bar ʋ suu a tẽw dacin dapuor.
A SOL NA LƐ CEN A JERUJALƐM
26A mɩnɛ a Sol na ta a Jerujalɛm, ʋ bʋɔrɔ na ʋ pɔw a *par-tuurbe, ɩ̃-cɛ a ba jaa jɔrɔ ʋ na dãbɩ̃ɛ a-na-ɩ baa sɔw a ʋ sɩrɩ̃ na ɩ a *par-tuure wa. 27Ɩ̃-cɛ a Banabasɩ tɛrɛ ʋ na cenʼɩ̃ a *nɩ-tʋnɩsɩ sɛ̃ ɩ̃ man ba a mɩnɛ a Sol na nyɛ a Nɩ-kpɛ̃ɛ a sɔr pʋɔ, nɩ a mɩnɛ a Nɩ-kpɛ̃ɛ na ƴɛrʼɩ̃ ʋ. Ʋ mɩ yel ba na a mɩnɛ a Sol na de a *Jeeju yuor ƴɛrʼɩ̃ a ƴɛrɩ̃ nɩ ꞌlafʋ a lɛ ʋ na be a Damasɩ.
28Wa nyɔw nɩ a ʋna daarʼãa, a Sol pɔw na a par-tuurbe a ba lãa yʋɔrɔ a Jerujalɛm ɩ̃ de a Jeeju yuor ƴɛrɛ nɩ a ƴɛrɩ̃ nɩ ꞌlafʋ, 29ɩ̃ mɩ ƴɛrɛ nɩ a Jufisɩ bala na wono a Gɩrɛkɩ ƴɛrɩ̃ ɩ̃ mana taa nɩ ba, ɩ̃ a bala ʋlɔ bʋɔrɔ ba kú ʋ. 30A mɩnɛ a yɛɛr na wonaa, ba tɔw na a Sol cenʼɩ̃ a Sejare na ƴɔ̃w a sɔr ʋ cere a Tarsɩ.
31A lɛ, a *duo-puorbo dãa na be a pɩɛnfʋ pʋɔ a Jude nɩ a Galile nɩ a Samari wɛɛ a jaa. Ba pɔwrɔ na a fãw jɔrɔ nɩ a Nɩ-kpɛ̃ɛ, ɩ̃ a mɩnɛ a Naaŋmɩn Sɩɛ na sũono ba, a nɩbɛ wɩɛrɛ na dɔɔlɔ a ba pʋɔ.
A ENE BA NA MAAL Ʋ KPƐMƐ
32A Pɩɛr yʋɔrɔ na a ten a jaa. Ɩ̃ bibir bõ-ƴen ʋ cenʼã a popuorbo sɛ̃ a Lɩda, 33na nyɛ a daba ba na bʋɔlɔ a Ene a be, na maal yomo anuu-nʼata a sɛn pʋɔ a-na-ɩ ʋ gbɛrʼã. 34A Pɩɛr yel ʋ:
“Ene, a *Jeeju-Kirisi kpɛmɛ fʋ na. Ir pilĩ a fʋ sɛn”, a Ene ir a jie naan. 35A Lɩda nɩbɛ, nɩ a Saarɔ̃ nɩbɛ ba jaa nyɛ ʋ na ɩ̃ lɩɛb puoro a Nɩ-kpɛ̃ɛ.
A DƆRKASƖ BA NA MAAL Ʋ IR A KŨU PƲƆ
36Pɔw be na be a Jope ɩ̃ ɩ a popuoro a ba bʋɔlɔ Tabɩta, a ʋna yuor a Gɩrɛkɩ nɩbɛ lɩɛb bʋɔlɔ a Dɔrkasɩ, a lɛ yelʼã a “Wʋl-pɩɛl.” Tʋ̃-vɛlɛ ʋ dãa tʋnɔ a daar a jaa sũono nɩ a nãw deme. 37Wʋlɩ̃ dãa na nyɔw ʋ a ʋna daarʼãa ʋ kpi a ba so ʋ a kʋ̃ɔ baar ɩ̃ de ʋ do nɩ bin a bɔɔpɩɛn diem. 38A Lɩda pɩɛlʼɩ̃ na a Jope, ala-ɩ̃-sɔ a mɩnɛ a *par-tuurbe bala na be a Jope na wõ áa Pɩɛr be na a be, ba tʋ na nɩbɛ ayi a ʋ sɛ̃ nɩ a ƴɛrɩ̃ na: “Sɩ sʋɔr fʋ na a fʋ na wa a sɩ jie fɔfɔw,” 39a Pɩɛr ir a jie naan a ba lãa cen. A mɩnɛ ʋ na ta a be, ba de ʋ na do nɩ a garɩ̃ a bɔɔpɩɛn diem, ɩ̃ a kpɩ̃ɩ-pɔɔbɔ ba jaa taw na ta ʋ ɩ̃ kono miile nɩ ʋ a kparsɩ nɩ a cẽcene a Dɔrkasɩ na dãa maal a lɛdaar ʋ na dãa be nɩ ba. 40A Pɩɛr ɩ na a ba yi ba jaa ɩ̃ ʋ lo gburĩ a dume ɩ̃ sʋɔr a Naaŋmɩn, ɩ̃ lɩɛb a nii-sɔw cɔw a kũu ɩ̃ yel:
“Tabɩta, ir!”
A kũu yuo a mimie nyɛ a Pɩɛr ɩ̃ ir jɛ. 41A Pɩɛr nyɔw ʋ na a nuu sũo ʋ ʋ ir, ɩ̃ ʋ bʋɔl a popuorbo nɩ a kpɩ̃ɩ-pɔɔbɔ na ʋ miilʼɩ̃ ba ʋ lɛ ɩ a nɩ-mimir. 42A Jope-tẽw nɩbɛ ba jaa bɔ̃wnaa na ɩ̃ a nɩ-yaw sɔw de a Nɩ-kpɛ̃ɛ. 43A Pɩɛr jɛ na be a Jope kam a daba ʋlɔ yir ba na bʋɔlɔ a Sɩmɔ̃, na ɩ a gan-cɔɔrɔ.
Currently Selected:
Nɩ-tʋnɩsɩ tʋmɔ Sɛbɛ 9: BNT93
Highlight
Share
Compare
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
