Jã Sɛbɛ 8
8
1Ɩ̃-cɛ a *Jeeju cen a *Olivi-tɩɩr tãw juu. 2A lɛ a bio na vɩɛ, a Jeeju lɛ cenʼĩ a Naaŋmɩn puor-yir kpɛ̃ɛ pʋɔ a dʋ̃ꞌwʋlɩ̃ ɓaaraa, a nɩbɛ ba jaa wɩ a ʋ sɛ̃, ʋ jɛ ɩ̃ jaana ba. 3Ɩ̃ a *ƴɛr-kpɛn-bɔɔnbɔ nɩ a *Farɩsɩ nɩbɛ wɩ nɩ na pɔw ba na nyɛ ʋ gã nɩ daba a ba nyɔw. Ba ƴɔ̃w ʋ na ʋ ɩraa a nɩbɛ ba jaa nii-sɔw, 4ɩ̃ a ba yel a Jeeju:
“Jãjaana, sɩ nyɔw na a pɔw naa a gã-ta-burbur pʋɔ. 5A Mowisi yel sɩ na a ʋ ƴɛr-kpɛn pʋɔ á sɩ lɔb a pɔw-lɛ nɩ kʋsɩɛ kú. Ɩ̃ a fʋ̃ʋ, bõ fʋ tɛrɛ yele?”
6Ba yelʼã a lɛ bʋɔrɔ ba bɩɩrʼɩ̃ a Jeeju, a mɩnɛ ba na tʋɔrɔ nyɛrɛ ƴɛr-fãa ƴɔnɔ ʋ. Ɩ̃-cɛ a Jeeju gũu na nyɩrɛ a tene nɩ a ʋ nubir. 7Ɩ̃ a mɩnɛ ba na cãa sooro ʋ, ʋ irʼã ɩ̃ yel ba:
“A ala ɩ̃ ɩ nɩrɛ be na ka a nyɩ pʋɔ ɩ̃ ma maal fãa wa, ú de nĩe lɔbʼɩ̃ a pɔw a kʋsɩr”, 8ɩ̃ na ʋ lɛ gũu nyɩrɛ a tene nɩ a nubir. 9Ɩ̃ a lɛ ba na wõ a ʋna ƴɛr-bir, a nɩ-bɛrɛ de na nĩe yire bõ-ƴene-ƴene wa ta nɩ a nɩbɛ ba jaa, ɩ̃ cɛ a Jeeju bar ʋ yẽ, nɩ a pɔw na cãa ɩraa a be. 10A lɛ, a Jeeju irʼã soor a pɔw:
“Nyɩnɛ ba be? Nɩrɛ ma ƴɔ̃w fʋ ƴɛrɩ̃ wa mɩɩ?” 11A pɔw yel ʋ:
“Nɩ-kpɛ̃ɛ, nɩrɛ ma ƴɔ̃w ma ƴɛrɩ̃ wa.”
A Jeeju yel ʋ:
“A maa mɩ, maa mɩ ƴɔnɔ fʋ ƴɛrɩ̃ wa. Fʋ na tʋɔ na cen, ɩ̃ taa lɔɔ maala fãa wa.”]
A JEEJU Ɩ NA A TẼW PƲƆ CÃA
12A *Jeeju lɛ ƴɛrʼã a ƴɛrɩ̃ kʋ a nɩbɛ yel:
“Maa ɩ̃ ɩ a tẽw pʋɔ cãa. A ʋlɔ na tuure ma kɔ̃ cere a libe pʋɔ fɩ̃ɩ wa, ɩ̃-cɛ ʋ na tɛrɛ na a baafʋ cãa.” 13A *Farɩsɩ nɩbɛ yel ʋ:
“Fʋ mɩ̃ɛ pʋɔ fʋ ƴɛrɛ ƴɔnɔ, ala-ɩ̃-sɔ a ala fʋ na mana ma tɛrɛ par wa.” 14A Jeeju yel ba:
“A ala ɩ̃ saarɩ̃ ɩ a ɩ̃ mɩ̃ɛ pʋɔ ɩ̃ ƴɛrɛ ƴɔnɔ, a ala ɩ̃ na mana tɛrɛ na par, a-na-ɩ ɩ̃ bɔ̃w na a jie ɩ̃ na yi ɩ̃ wa, nɩ a jie ɩ̃ na cere. Ɩ̃-cɛ a nyɩmɩ, nyaa bɔ̃w a jie ɩ̃ na yi ɩ̃ wa, nɩ a jie ɩ̃ na cere wa. 15A nyɩmɩ, nɩbɛ tɩɛrɩ̃sɩ nyɩ guoro nɩ a ƴɛrɩ̃sɩ, ɩ̃ a maa, maa guoro nɩrɛ ƴɛrɩ̃ wa. 16Ɩ̃-cɛ a maa wa guoro nɩrɛ ƴɛrɩ̃, a ɩ̃ guorfʋ na torʼã dẽdẽ, a-na-ɩ maa be ɩ̃ yẽ wa, ɩ̃-cɛ a ɩ̃ Sãa na tʋ̃ ma be nɩ ma na. 17A sɛbʼã a nyɩ ƴɛr-kpɛn pʋɔ áa ala ɩ̃ ɩ nɩbɛ ayi manʼã a ƴɛrɩ̃, áa tɛrɛ na par. 18A maa, ɩ̃ ƴɛrɛ na ƴɔnɔ a ɩ̃ mɩ̃ɛ, ɩ̃ a ɩ̃ Sãa na tʋ̃ ma, mɩ ƴɛrɛ na ƴɔnɔ ma.” 19A ba soor ʋ:
“Nyɩnɛ a fʋ Sãa be?”
Ʋ yel ba:
“Nyaa bɔ̃w a maa nɩ a ɩ̃ Sãa wa. A ala ɩ̃ ɩ nyɩ dãa na bɔ̃w ma, nyɩ naa mɩ bɔ̃w na a ɩ̃ Sãa.”
20A Jeeju ƴɛrʼã a ana ƴɛrɩ̃sɩ a libie ƴɔ̃wfʋ jie par, be a Naaŋmɩn puor-yir kpɛ̃ɛ pʋɔ, ɩ̃-cɛ nɩrɛ ma nyɔw ʋ wa, a-na-ɩ a ʋ daar ma ta sɛr wa.
NYAA TƲƆRƆ wɩɛrɛ A JIE Ɩ̃ NA CERE WA
21A *Jeeju lɛ yel ba na:
“Ɩ̃ cere na ɩ̃ nyɩ nɔɔ bʋɔrɔ ma na, ɩ̃-cɛ nyɩ na kpi nɩ na a nyɩ maal-faar. A jie ʋlɔ ɩ̃ na cere, nyaa tʋɔrɔ wɩɛrɛ a be wa.” 22A be jie, a Jufisɩ sooro na taa:
“Ʋ na kú na a ʋ mɩ̃ɛ mɩɩ? A-na-ɩ ʋ yelʼã á saa tʋɔrɔ cere a jie ʋ na cere wa.” 23A Jeeju yel ba:
“A nyɩmɩ, ka tẽw pʋɔ nyɩ yi, ɩ̃-cɛ a maa, saꞌlon ɩ̃ yi. A nyɩmɩ, nyɩ ɩ na a tẽw naa nɩbɛ, ɩ̃-cɛ a maa, maa ɩ a tẽw naa nɩrɛ wa. 24Ala-ɩ̃-sɔ ɩ̃ yel nyɩ a nyɩ na kpi nɩ na a nyɩ maal-faar, a-na-ɩ a ala ɩ̃ ɩ nyaa sɔw á maa ɩ̃ ɩ a ʋlɔ ɩ̃ na ɩ wa, nyɩ na kpi nɩ na a nyɩ maal-faar.” 25A ba soor ʋ:
“Ala fʋ ɩ?”
A Jeeju yel ba:
“Ɩ̃ ɩ na a ʋlɔ ɩ̃ na dãa yel nyɩ a korĩ-cɛ. 26Ɩ̃ tɛrɛ na yele yaw na ƴɛr ɩ̃ guor a nyɩ ɩnɛ. Ɩ̃-cɛ a ʋlɔ na tʋ ma ɩ na Yel-mɩ̃ɛ Sʋbɔ, ɩ̃ a ala ɩ̃ na ƴɛrɛ kʋrɔ a nɩbɛ a ka a tẽw pʋɔ ɩ na a ala tɛw ɩ̃ na wõ a ʋ jie.”
27Ɩ̃ a Jufisɩ ma dãa bɔ̃w ka a Sãa ɩnɛ a Jeeju ƴɛrɛ ba wa. 28Ala-ɩ̃-sɔ a Jeeju yel ba:
“A daar ʋlɔ nyɩ nɔɔ jɛwrɛ a *Nɩbɛ Bie duoro nɩ, ala nyɩ na bɔ̃w ka a maa ɩ̃ ɩ a ʋlɔ ɩ̃ na ɩ. Nyɩ na mɩ bɔ̃w na á maa maala bom ɩ̃ yẽ wa, ɩ̃-cɛ a ala a Sãa na man ma, ala tɛw ɩ̃ ƴɛrɛ. 29A ʋlɔ na tʋ ma be nɩ ma na. ꞌWaa bar ma ɩ̃ yẽ wa, a-na-ɩ a daar a jaa ɩ̃ maala na a ala na nʋmɔ ʋ.”
30A mɩnɛ a Jeeju na ƴɛrɛ a lɛ, yaw jie sɔw na de ʋ.
A BALA NA Ɩ A MAAL-FAAR GBÃGBAAR
31A *Jeeju yelʼã a Jufisɩ bala na dãa sɔw de ʋ:
“A ala ɩ̃ ɩ nyɩ sɩrɩ̃ na jɔrɔ a ɩ̃ ƴɛrɩ̃sɩ, nyɩ na sɩrɩ̃ na ɩ a ɩ̃ *par-tuurbe. 32Nyɩ na bɔ̃w na a yel-mɩ̃ɛ ɩ̃ a ʋna yel-mɩ̃ɛ na ꞌlor nyɩ na bar a nyɩ sɔ nyɩ mɩ̃ɛ.” 33A ba yel:
“Sɩ ɩ na a Abʋraham bal par bibiir; saa dãa ɩ nɩrɛ kãw gbãgbaar wa. Ɩ̃ mɩnɛ fʋ ɩ ɩ̃ yel a sɩ na sɔ na sɩ mɩ̃ɛ?” 34a Jeeju yel ba:
“Yel-mɩ̃ɛ ɩ̃ yele nyɩ, a nɩrɛ lɛ na maala a fãa, ʋ ɩ na a maal-fãa gbãgbaa. 35Ɩ̃ a gbãgbaa ma tɛrɛ jaajie a yir deme sɔ̃w a daar a jaa wa, ɩ̃ a yir bie, ʋlɔ tɛrɛ na a jaajie a daar a jaa. 36Ala-ɩ̃-sɔ, a ala ɩ̃ ɩ a Bie ꞌlor nyɩ na bar, nyɩ na sɔ na nyɩ mɩ̃ɛ sɩrɛ jaa. 37Ɩ̃ bɔ̃w na bɔ̃w ka nyɩ ɩ na a Abʋraham bal par bibiir, ɩ̃-cɛ nyɩ bʋɔrɔ na nyɩ kú ma, a-na-ɩ nyaa sɔw a ɩ̃ jaanfʋ wa. 38A maa, ɩ̃ ƴɛrɛ na a ala ɩ̃ na nyɛ a ɩ̃ Sãa sɛ̃, ɩ̃-cɛ a nyɩmɩ, a ala nyɩ na wõ a nyɩ sãa jie, ala nyɩ maala.” 39A ba yel a Jeeju:
“Abʋraham ɩ̃ ɩ a sɩ sãa.”
Ʋ yel ba:
“A ala ɩ̃ ɩ a Abʋraham bibiir nyɩ dãa ɩ, nyɩ naa maala na a tʋ̃-bie ala ʋ na dãa maal. 40Ɩ̃-cɛ nyɩ ɛ̃ɛ na bʋɔrɔ nyɩ kú ma, a maa na yel nyɩ a yel-mɩ̃ɛ ala ɩ̃ na wõ a Naaŋmɩn jie. A Abʋraham ma dãa maal a lɛ wa. 41A nyɩ sãa tʋ̃-bie nyɩ maala.”
A ba yel ʋ:
“Saa ɩ sɛ̃sɛ̃-biir wa; sãa bõ-ƴen tɛw sɩ tɛrɛ, a Naaŋmɩn ʋ.” 42A Jeeju yel ba:
“A ala ɩ̃ dãa ɩ a Naaŋmɩn ɩ̃ sɩrɩ̃ ɩ a nyɩ Sãa, nyɩ naa nʋ ma na, a-na-ɩ a Naaŋmɩn jie ɩ̃ yi ɩ̃ wa. Maa wa nɩ a ɩ̃ mɩ̃ɛ yuor wa, ʋlɔ ɩ̃ tʋ̃ ma. 43Bõ ɩnɛ nyaa bɔ̃w a ɩ̃ ƴɛrɩ̃sɩ par wa? A-na-ɩ nyaa tʋɔrɔ bɔ̃wnɔ a ɩ̃ tɩɛrʋ̃ gbɛr wa. 44A nyɩ sãa ɩ na a Satã, ɩ̃ nyɩ mɩ bʋɔrɔ na nyɩ maal a nyɩ sãa pʋ-tɩɛrʋ̃. Wa nyɔw nɩ a korĩ-cɛ jaa, nɩ-kúrɔ ʋ ɩ, ɩ̃ ꞌwaa ɩraa a yel-mɩ̃ɛ pʋɔ wa, a-na-ɩ yel-mɩ̃ɛ ma be a ʋ jie wa. A ʋlɔ ɩ̃ wa ŋmaara a jiri, a ʋ wãa ɩ̃ be a lɛ, a-na-ɩ jir-ŋmara ʋ ɩ, ɩ̃ mɩ ɩ a jiri sãa. 45Ɩ̃-cɛ a maa, a yel-mɩ̃ɛ ɩ̃ na yele nyɩ, ala-ɩ̃-sɔ a nyaa sɔw de ma wa. 46Ala ɩ̃ be a nyɩ pʋɔ na tʋɔ miilʼɩ̃ a ɩ yel-mɩ̃ɛ á ɩ̃ maalʼã a fãa. Ɩ̃-cɛ a ala ɩ̃ ɩ a yel-mɩ̃ɛ ɩ̃ yele, bõ ɩnɛ nyaa sɔw a ɩ̃ ƴɛrɩ̃ wa? 47A nɩrɛ ʋlɔ na ɩ a Naaŋmɩn ben ma cɛlɛ na a Naaŋmɩn ƴɛrɩ̃. Ɩ̃-cɛ a nyɩmɩ, nyaa cɛlɛ wa, a-na-ɩ nyaa ɩ a Naaŋmɩn ben wa.”
A JEEJU NƖ A ABƲRAHAM ƳƐRƖ̃
48A Jufisɩ yelʼã a *Jeeju:
“Má yel-mɩ̃ɛ sɩ yel a Samari nɩrɛ fʋ ɩ, ɩ̃ a kɔ̃tɔn mɩ tɛrɛ fʋ na!” 49A Jeeju yel ba:
“Kɔ̃tɔn ma tɛrɛ ma wa, ɩ̃-cɛ a ɩ̃ Sãa ɩ̃ ƴɔnɔ, ɩ̃ a nyɩ kpɛrɛ ma. 50A maa, maa bʋɔrɔ a ɩ̃ mɩ̃ɛ yuor ʋ yire wa, ɩ̃ a bõ-ƴen be na be na bʋɔrɔ a ɩ̃ yuor ʋ yire, ɩ̃ ʋlɔ mɩ ɩ a Ƴɛr-guoro. 51Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ jɔrɔ na a ɩ̃ ƴɛrɩ̃sɩ, ꞌwaa be na kpi wa.” 52A Jufisɩ yel ʋ:
“A ƴɛ̃ƴɛrɩ̃, sɩ pãa na bɔ̃w ka kɔ̃tɔn tɛrɛ fʋ na. A-na-ɩ a Abʋraham kpi na, a Naaŋmɩn ƴɛr-hierbe mɩ kpi, ɩ̃-cɛ a fʋ yel áa ala ɩ̃ ɩ nɩrɛ jɔrɔ na a fʋ ƴɛrɩ̃sɩ, a ꞌwaa be na kpi wa. 53Fʋ̃ʋ bɛrmɛ gãw a sɩ sãa Abʋraham mɩɩ? Ʋ kpi na, a Naaŋmɩn ƴɛr-hierbe mɩ kpi, ɩ̃ a fʋ̃ʋ, ala fʋ tɩɛr a fʋ ɩ?” 54A Jeeju yel:
“A ala ɩ̃ ɩ a maa mɩ̃ɛ ɩ̃ bʋɔrɔ a yuor, a ɩ̃ yo-bɔfʋ na ɩ na pɔrɔ. Ɩ̃ a ʋlɔ na maala a ɩ̃ yuor ʋ yire ɩ na a ɩ̃ Sãa, a ʋlɔ nyɩ na yel áa nyɩ Naaŋmɩn ʋ. 55Ɩ̃-cɛ nyaa bɔ̃w ʋ wa, ɩ̃ a maa, ɩ̃ bɔ̃w ʋ na. A maa ɩ̃ yel á maa bɔ̃w ʋ wa, ɩ̃ na mɩ ɩ na jir-ŋmara a nyɩ kaarɩ̃, ɩ̃-cɛ ɩ̃ bɔ̃w ʋ na ɩ̃ mɩ jɔrɔ a ʋ ƴɛrɩ̃sɩ. 56A nyɩ sãa Abʋraham dãa na cɩlɛ a mɩnɛ ʋ na tɩɛrɛ a ʋ na nyɛ na a ɩ̃ bibir#8.56 A ĩ bibir: A ɩ na a daar ʋlɔ a Jeeju na wa ka a tẽw pʋɔ.. Ʋ nyɛ ʋ na, a nʋ̃ɔ nyɔw ʋ.” 57A Jufisɩ yel ʋ:
“Faa mɩ pɔw yomo lɩjaayi nɩ pie sɛr wa, ɩ̃ yel a fʋ nyɛ na a Abʋraham?” 58A Jeeju yel ba:
“Yel-mɩ̃ɛ ɩ̃ yele nyɩ, a lɛ ba na ma dãa dɔw a Abʋraham sɛr wa, a maa, ɩ̃ be na be.”
59A be jie, ba woorʼã kubie bʋɔrɔ ba lɔbʼɩ̃ ʋ, ɩ̃-cɛ a Jeeju sɔɔlɩ̃ na yi a Naaŋmɩn puor-yir kpɛ̃ɛ pʋɔ cen.
Currently Selected:
Jã Sɛbɛ 8: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
