Jã Sɛbɛ 9
9
A JƆ̃W MIMIE A JEEJU NA YUO
1A lɛ a *Jeeju na tɔlɔ, ʋ nyɛ na jɔ̃w ba na dɔw nɩ a lɛ. 2A *par-tuurbe soor a Jeeju:
“Jãjaana, ala ɩ̃ maal a fãa a ba dɔw a daba na ʋ ɩ a jɔ̃w? A ʋ dɔɔrbɔ ʋ, mɩɩ a ʋlɔ mɩ̃ɛ ʋ?” 3A Jeeju yel ba:
“Aa ɩ ʋlɔ ɩ̃ maal a fãa wa, aa mɩ yi a ʋ dɔɔrbɔ jie wa, ɩ̃-cɛ ʋ jɔ̃w na a lɛ a mɩnɛ a na saa a nɩbɛ na tʋɔ nyɛ a Naaŋmɩn tʋ̃-bie. 4A lɛ a mɔtɔ̃w na cãa caara, a sɛw na a sɩ na tʋnɔ a ʋlɔ na tʋ̃ ma tʋmɔ. A tɩsɔw tara na a nɩrɛ ma tʋɔrɔ tʋnɔ tʋn wa. 5A lɛ ɩ̃ na cãa a tẽw pʋɔ, maa ɩ̃ ɩ a tẽw pʋɔ cãa.”
6A mɩnɛ ʋ na ƴɛr a lɛ baar, ʋ cɩrʼã natɛɛr ƴɔ̃w a tana pʋɔ, ɩ̃ nyaka a tana ala de bol a jɔ̃w mimie, 7ɩ̃ yel ʋ:
“Cen na pɛw a fʋ nii-sɔw a Silowe #9.7 A Silowe: tɔ ɩ na a tãw yuor na tɛrɛ kʋ̃ɔ gbɛr. kʋ̃ɔ puulĩfʋ jie.” (A Silowe yuor par ɩ na “Tʋ̃fʋ.”) A daba cenʼĩ na pɛw a ʋ nii-sɔw nyɛrɛ lɩɛb waara nɩ.
8A ʋ lãa-pɩɛlbɛ nɩ a bala na ma dãa nyɛ ʋ ʋ jɛ sʋɔrɔ a yele sooro na taa:
“Aa ɩ a daba na ɩ̃ ma dãa jɛ sʋɔrɔ a yele wa?” 9A nɩŋmɛɛ ma yelʼã á ʋlɔ ʋ, ɩ̃-cɛ a nɩŋmɛɛ ma yel á aa ɩ ʋlɔ ʋ wa, á nɩ-wɔ̃ tar ʋ. Ɩ̃ a jɔ̃w mɩ̃ɛ yele na:
“Maa ʋ.” 10A ba soor ʋ:
“Mɩnɛ a fʋ mimie ɩ ɩ̃ yuo?” 11Ʋ yel ba:
“A daba ʋlɔ ba na bʋɔlɔ a Jeeju, ʋlɔ ɩ̃ nyaka a tana bol ma a mimie, ɩ̃ yel ma á ɩ̃ cen a Silowe kʋ̃ɔ puulĩfʋ jie na pɛw a nii-sɔw, ɩ̃ cen na pɛw, a ɩ̃ mimie yuo.” 12A ba soor ʋ:
“Nyɩnɛ a daba ʋlɔ be?”
Ʋ yel ba:
“Maa bɔ̃w wa.”
A DABA ƲLƆ MIMIE NA YUO NƖ A FARƖSƖ NƖBƐ
13Ba taw na a daba ʋlɔ na dãa jɔ̃w cenʼɩ̃ a *Farɩsɩ nɩbɛ jie, 14a-na-ɩ a bibir ʋlɔ a *Jeeju na nyaka a tana yuo nɩ ʋ a mimie ɩ na a *bibi-ciiraa dayen. 15A Farɩsɩ nɩbɛ mɩ sooro na a jɔ̃w a mɩnɛ ʋ na ɩ ɩ̃ nyɛrɛ, ʋ yel ba:
“Tana ʋ bol ma a mimie ɩ̃ pɛw bar ɩ̃ nyɛrɛ.” 16A lɛ, a Farɩsɩ nɩbɛ ŋmɛɛ yelʼã:
“A ʋna sʋbɔ na maal a lɛ, ꞌwaa yi a Naaŋmɩn jie wa, a-na-ɩ ꞌwaa sɔmɔ a bibi-ciiraa wa.”
Ɩ̃ a nɩŋmɛɛ yele na:
“Mɩnɛ a nɩ-fãa na tʋɔ maal a nɔ-kofʋ tʋmɔ a nɔhɔ̃?”
Ɩ̃ a baa dãa ɩ nɔ-bõ-ƴen wa.
17Ba lɛ bɔ̃w na soor a jɔ̃w:
“A fʋ̃ʋ, ala fʋ tɩɛr a ʋ ɩ? A-na-ɩ a fʋ mimie ʋ yuo.”
Ʋ yel ba:
“Ʋ ɩ na a Naaŋmɩn ƴɛr-hiere.”
18A Jufisɩ ma sɔw a jɔ̃w ʋ dãa ɩ ɩ̃ wa nyɛrɛ wa, ala-ɩ̃-sɔ a ba bʋɔl a ʋ dɔɔrbɔ soor:
19“A nyɩ bie nɩ a naa mɩɩ? A jɔ̃w nyɩ sɩrɩ̃ dɔw ʋ mɩɩ? Ɩ̃ mɩnɛ ʋ ɩ ɩ̃ nyɛrɛ a ƴɛ̃ƴɛrɩ̃?” 20A ʋ dɔɔrbɔ yel:
“Sɩ bɔ̃w ka ʋ ɩ na a sɩ bie sɩrɛ jaa, a sɩ mɩ dɔw ʋ ʋ ɩ a jɔ̃w, 21ɩ̃-cɛ a mɩnɛ ʋ na ɩ ɩ̃ nyɛrɛ a ƴɛ̃ƴɛrɩ̃ na, saa bɔ̃w wa. Saa mɩ bɔ̃w a ʋlɔ na yuo ʋ a mimie wa. Nyɩ́ soor ʋ, ꞌwaa ɩ bibile wa, a ʋlɔ mɩ̃ɛ na man nyɩ na.”
22A ʋ dɔɔrbɔ yelʼã a lɛ a-na-ɩ ba jɔrɔ na a Jufisɩ dãbɩ̃ɛ. A Jufisɩ dãa na man taa áa nɩrɛ ɩ̃ wa yel áa Jeeju ɩ na a *Kirisi, á ba na diw ʋ na bar a ba *puorfʋ yir. 23Ala-ɩ̃-sɔ a ʋ dɔɔrbɔ yel á ꞌwaa ɩ bibile wa, á ba soor a ʋlɔ mɩ̃ɛ.
24A lɛ a na be, a Farɩsɩ nɩbɛ lɛ bʋɔlʼã a daba na dãa ɩ a jɔ̃w gbɛɛ ayi pʋɔ ɩ̃ yel ʋ:
“Yel yel-mɩ̃ɛ a Naaŋmɩn nii-sɔw, a-na-ɩ a sɩmɩ, sɩ bɔ̃w ka a ʋna daba ɩ na nɩ-fãa.” 25Ʋ yel ba:
“A ala ɩ̃ ɩ nɩ-fãa ʋ ɩ, maa bɔ̃w wa. Bõ-bõ-ƴen tɛw ɩ̃ bɔ̃w: jɔ̃w ɩ̃ dãa ɩ, ɩ̃-cɛ ƴɛ̃ƴɛrɩ̃ na, ɩ̃ nyɛrɛ na.” 26A ba soor ʋ:
“Bõ ʋ maal fʋ? Mɩnɛ ʋ ɩ ɩ̃ yuo fʋ a mimie?” 27Ʋ yel ba:
“Ɩ̃ dãa na man kʋ nyɩ, ɩ̃ nyaa cɛl ma wa. Bõ nyɩ bʋɔrɔ nyɩ lɛ wõ ɩ nɩ? A nyɩmɩ mɩ, nyɩ mɩ bʋɔrɔ na nyɩ lɩɛb ɩ a ʋ *par-tuurbe mɩɩ?” 28A ba tʋrɔ ʋ ɩ̃ yele:
“Fʋ̃ʋ ɩ a ʋna daba naa *par-tuure, ɩ̃-cɛ a sɩmɩ, Mowisi par-tuurbe sɩ ɩ. 29Sɩ bɔ̃w ka a Naaŋmɩn dãa na ƴɛrʼɩ̃ a Mowisi ɩ̃-cɛ a daba ʋlɔ, saa bɔ̃w a jie ʋ na yi wa.” 30A daba yel ba:
“A ko ma na nʋɔr nyɩ na ma bɔ̃w a ʋ yifʋ jie wa, ɩ̃-cɛ ʋ yuo ma na a mimie. 31Sɩ bɔ̃w ka a Naaŋmɩn maa cɛl a nɩ-faar wa, ɩ̃-cɛ a nɩrɛ lɛ na jɔrɔ ʋ ɩ̃ maala a ʋ pʋ-tɩɛrʋ̃, ʋlɔ ʋ ma cɛl. 32Wa nyɔw nɩ a tẽkorĩ, nɩrɛ ma dãa wõ a ba yel a ba yuo na a nɩrɛ ba na dɔw ʋ ɩ a jɔ̃w mimie wa. 33A ala ɩ̃ ɩ a daba ʋlɔ ma dãa yi a Naaŋmɩn jie wa, ꞌwaa tʋɔrɔ maala bom kãw wa.” 34A Farɩsɩ nɩbɛ yel ʋ:
“Wa nyɔw nɩ a fʋ dɔwfʋ daar, maal-fãa pʋɔ fʋ be. Mɩnɛ a ɩ a fʋ bʋɔrɔ fʋ jaan sɩ bom?” Ɩ̃ na ba diw ʋ bar a ba sɔ̃w.
A SƖƐ PƲƆ JƆ̃WFƲ
35A *Jeeju wõ na a ba diw ʋ na bar a ba sɔ̃w, ɩ̃ bɔ ʋ soor:
“Fʋ tɛrɛ na ƴɔ̃w-nyãa a *Nɩbɛ Bie jie mɩɩ?” 36A daba yel a Jeeju:
“Nɩ-kpɛ̃ɛ, yel ma a sʋbɔ ʋlɔ ʋ na ɩ, ɩ̃ na tʋɔ tɛrɛ nɩ ʋ a ƴɔ̃w-nyãa.” 37A Jeeju yel ʋ:
“Fʋ nyɛ ʋ na; ʋlɔ ɩ̃ ƴɛrɛ nɩ fʋ a ƴɛ̃ƴɛrɩ̃ na.” 38A daba yel:
“Nɩ-kpɛ̃ɛ, ɩ̃ sɔw na,” ɩ̃ gburĩ a dume puor ʋ.
39A Jeeju yel:
“Ƴɛrɩ̃ guorfʋ ɩnɛ ɩ̃ wa a ka a tẽw pʋɔ, a mɩnɛ a bala na jɔ̃w na tʋɔ nyɛrɛ, ɩ̃-cɛ a bala na nyɛrɛ na lɩɛb ɩ a jɔn.” 40A *Farɩsɩ nɩbɛ ŋmɛɛ na dãa be nɩ ʋ wõ na a ala ʋ na ƴɛr ɩ̃ soor ʋ:
“A sɩmɩ mɩ, jɔn sɩ mɩ ɩ mɩɩ?” 41A Jeeju yel ba:
“A ala ɩ̃ ɩ jɔn nyɩ dãa ɩ, nyɩ kɔ̃ɔ tɛrɛ cɛfʋ jie wa, ɩ̃-cɛ a mɩnɛ nyɩ na yel a nyɩ nyɛrɛ na, a nyɩ fãa cãa na be a nyɩ jie.”
Currently Selected:
Jã Sɛbɛ 9: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
