Zã 4

A Yeezu nɩ a Samaari tẽw pɔw tuor-taa yele

1A Faarizɩ̃ɛ mɩnɛ tɩ wõ na kɛ́ a Yeezu páwr'ɩ po-tuurbɛ, ɛ́ kʋ̀rɛ bɛ a suob zuo a Zã. 2Ɛcɛ yel-mɩŋa sa ziri, a Yeezu tɔr za bɛ tɩ tɩrɛ suob ɛ, a ʋ po-tuurbɛ nɛbɛ tɩ tɩrɛ a suob. A Yeezu na tɩ wõ bɛ manɛ à à ŋá a, 3ʋ bɛr'ɩ a Zude tẽw ɛ́ lɛb cen a Galile tẽw lowr. 4A tɩ fɛr'a k'ʋʋ tu tɔl a Samaari tẽw pʋɔ. 5Lɛ n'a ʋ tɩ ta Samaari tẽw kãw pʋɔ bɛ na bʋɔlɛ kɛ́ Sɩkaar a, na pɩɛlɩ a zie ʋl a Zakɔb na kʋ̀ a ʋ bie Zuzɛb a. 6Be n'a a Zakɔb bule mɩ̀ tɩ be. A Yeezu na tɩ cen bàl a, ʋ tɩ zɩ̃ n a be, a bule nʋɔr. A tɩ man nɩ nɩ a mʋ̃tɔ̃w na põ-zɛ̃-taa a.

7Samaari tẽw pɔw kãw tɩ wa n kʋ̃ɔ 'wɔ̃wfʋ, a Yeezu wa yel ʋ: «Ɩ kʋ̃ɔ kʋ̀ m ɩ̃ nyũ.» 8A ʋ po-tuurbɛ tɩ cen nɩ a tẽw pʋɔ bʋ̃-dɩrɩ dab. 9Ɛcɛ a pɔw ʋl, a Samaari tẽw pɔw nɛ, tɩ lɛb'a yel ʋ: «Ŋmɩŋmɩn za n'a fʋ ɩ Zifʋ, ɛ́ zɛlɛ kʋ̃ɔ a ɩ̃ zie, mãa na ɩ Samaari tẽw pɔw a?» A Zifʋ mɩnɛ nɩ a Samaari tẽw nɩbɛ bɛ tɩ tuore ɩ. 10A Yeezu tɩ sɔw ʋ na yel: «Fʋ̃ʋ tɩ ɩ mɛ̃ fʋ bãw nɩ a Naaŋmɩn bʋ̃-kʋ̀ra a, nɩ ãa n'ɩ a sob ŋa na yere a fʋ zie: “Kʋ̀ m kʋ̃ɔ ɩ̃ nyũ” a, fʋ̃ʋ n'ʋ nãá nɩ̃ɛ zɛlɩ ʋ, ʋʋ nãá kʋ̀ b'ɩ kʋ̃ɔ na bùle yire a.» 11A pɔw lɛb yel a Yeezu: «Sore e, fʋ bɛ tɛr bʋ̃-'wɔ̃wna ɩ, ɛ́ a bule zulme, nyɩnɛ n'a fʋ na páw a kʋ̃ɔ na bùle yire a? 12Fʋ nɔ̃w ɩ n kpɛ̃ɛ zuo a tɩ sãàkʋm Zakɔb na kʋ̀ tɩ a bule ŋa a, ɛ́ nyũ a ʋ kʋ̃ɔ, ʋlɛ nɩ a ʋ bibiir nɩ a ʋ dʋn za a?» 13A Yeezu tɩ sɔw ʋ na: «Sob nɛ za na nyúur a kʋ̃ɔ á ŋá a, kʋ̃ɔ-nyúur na lɛb'a kpɩɛr ʋ. 14Ɛcɛ nɩr nãà wa nyũ a kʋ̃ɔ ɩ̃ na na kʋ̀ ʋ a, kʋ̃ɔ-nyúur kʋ̃ lɛb kpɛ ʋ towtow ɛ. Ɛ́ a kʋ̃ɔ ɩ̃ na na kʋ̀ ʋ a, a na lɩɛb'ɩ bul-nʋɔr a ʋ pʋɔ, a nyɔ-vʋʋrʋ na be kʋralɛ a bùle yire.» 15A pɔw tɩ lɛb'a yel a Yeezu: «Sore e, kʋ̀ m a kʋ̃ɔ al bʋʋrɛ, kʋ̃ɔ-nyúur taa lɛb kpɩɛr mɛ̃ ɩ, ɩ̃ɩ mɩ̀ ta mɩ́ lɛb waar ka kʋ̃ɔ 'wɔ̃wfʋ ɛ.»

16A Yeezu yel ʋ: «Cen tɩ bʋɔlɩ a fʋ sɩr, ɛ́ lɛb wa a ka.» 17A pɔw tɩ sɔw na: «Ɩ̃ bɛ tɛr sɩr ɛ.» A Yeezu yel ʋ: «Yel-mɩŋa n'a fʋ yel, fʋ na yel kɛ́ fʋ bɛ tɛr sɩr a. 18Sɩrbɛ anũu n'a fʋ kul, ɛ́ a dɛb ʋl fʋ na lãw kpɩɛr'ɩ a ƴɛrɛŋa a, bɛ ɩ a fʋ sɩr ɛ. A ka a, fʋ yel'ɩ yel-mɩŋa.» 19A pɔw lɛb yel ʋ: «Sore e, ɩ̃ nyɛ̃ na kɛ́ fʋ ɩ n naaŋmɩn-ƴɛ̀r-manɛ. 20Tãw ŋa na àr a zu n'a a tɩ sãàkʋm-kore tɩ dãw puore, ɛ́ a nyɩɩm Zifʋ mɩnɛ wa yel kɛ́ Zerizalɛm'a a fɛr kɛ́ a Naaŋmɩn puoru zie be.» 21A Yeezu sɔw yel: «Pɔw i, sàw a lɛ ɩ̃ na yere kʋ̀rɛ fʋ a, a daar tarɛ na, nyɩ na kʋ̃ mɩ́ cãà do a tãw ŋa zu, bɩɩ cen a Zerizalɛm tɩ puori a Naaŋmɩn Sãà a ɩ. 22A nyɩɩm n'a, nyɩ puore nɩ a Naaŋmɩn ɛ́ bɛ bãw ʋ ɛ, tɩɩm puore ʋ na ɛ́ bãw ʋ: Zifʋ mɩnɛ zie n'a a faafʋ yi. 23Ɛcɛ a daar tarɛ na, ʋ ta na mɔ̃ mɩ̀, a puor-puor-mɩn na puore a Sãà tu n vʋʋrʋ nɩ yel-mɩŋa. A puor-puorbɛ bɛ ŋa taabɛ nɛbɛ a Naaŋmɩn Sãà bɔbr. 24Naaŋmɩn ɩ n Vʋʋrʋ, ɛ́ a bɛlɩ dem na puore ʋ a, a fɛr'a kɛ́ bɛ puore ʋ tu n vʋʋrʋ nɩ yel-mɩŋa.» 25A pɔw tɩ lɛb'a yel ʋ: «Ɩ̃ bãw na kɛ́ a Naaŋmɩn Nɩ-kabra waar'a, a ʋl bɛ na bʋɔlɛ a Kɩrɩta a. Ʋlɛ wa wa a, ʋlɛ n'ʋ na ɩ tɩ bãw bom za.» 26A Yeezu yel ʋ: «Mãa n'ʋ, a mãa na ƴɛ̀rɛ nɩ fʋ a.»

27A lɛ pʋɔ n'a a ʋ po-tuurbɛ tɩ yi a tẽw pʋɔ ta. A Yeezu na tɩ ƴɛ̀rɛ nɩ a pɔw a, a tɩ ur bɛ na, ɛcɛ bɛ kãw za bɛ tɩ sàw sowr'ʋ: «Bʋ̃ʋ n'ʋ fʋ bɔbr a ʋ zie?» bɩɩ: «Bʋ̃ʋ so fʋ ƴɛ̀rɛ nɩ ʋ» ɛ. 28A lɛ n'a a pɔw tɩ bɛr a ʋ yuor a be, ɛ́ lɛb cen a tẽw pʋɔ tɩ yel a nɩbɛ: 29«Nyɩ wa nyɛ̃ nɩr kãw na yel a alɩ bome nɛ za ɩ̃ na ɩ a kʋ̀ m a, ʋlɛ taa wa n'ɩ a Kɩrɩta ʋ?» 30A nɩbɛ tɩ yi n a tẽw pʋɔ cen a Yeezu zie.

31Bɛ na bɛ tɩ ta sɛr a, a Yeezu po-tuurbɛ tɩ zɛlɛ ʋ na k'ʋʋ dɩ. Bɛ tɩ yel'a: «Wul-wul-kara a, dɩ wɛ!» 32Ɛcɛ a Yeezu tɩ yel bɛ na: «Ɩ̃ tɛr'ɩ bʋ̃-dɩra kãw nyɩ na bɛ bãw a na dɩ.» 33A lɛ n'a, a ʋ po-tuurbɛ tɩ sowre taa: «Nɩr ya wa n nɩ bʋ̃-dɩrɩ wa kʋ̀ ʋ bɩɩ?» 34A Yeezu yel bɛ: «A sob nɛ na tõ m a pʋ-tɩɛrʋ maalʋ nɩ a ʋ tome tob'a ɩ a ɩ̃ bʋ̃-dɩrɩ. 35A nyɩɩm tɛɛ za, nyɩ bɛ tʋ̃ɔ́ mɩ́ yel: “Cuwr anaar'a cɛ, ɛ́ a na ɩ a bʋ̃-dieri deb ɛ?” Ɛcɛ mãa yere na kʋ̀rɛ nyɩ: nyɩ dʋɔ zu jɩ́r nyɛ̃: a póru maal'a baarɩ gù a cɛb. 36A bʋ̃-diere tĩ na páwr a ʋ sã-ya, ʋ dier'ɩ a ʋ bome ɓanɛ taa a nyɔ-vʋʋrʋ na be kʋralɛ a ƴãw. Lɛ so, a bʋ̀r-bʋ̀rɛ nɩ a bʋ̃-diere lãw na cɩlɛ. 37A zʋkpar ʋl na yel kɛ́: “Bʋ̀rɛ be na, cɩɛrɛ be” a, tɛr'ɩ yel-mɩŋa. 38Ɩ̃ tõ nyɩ na nyɩ tɩ de bʋ̃-dieri púo pʋɔ nyɩ na bɛ tõ wõ tuo a, nɩ-yoru nɛbɛ tõ wõ n tuo ɛ́ nyɩ íre a bɛ hanʋ tɔnɛ.»

39Samaari tẽw nɩbɛ yaga, a tẽw ʋl pʋɔ, tɩ sàw na de a Yeezu yele a pɔw ƴɛ̀rʋ zũú, ʋ na tɩ dɩ a dãsɩɛ ŋa a ƴãw: «Ʋ manɩ nɩ a alɩ bome nɛ za ɩ̃ na ɩ a kʋ̀ m.» 40Alɛ so, bɛ na tɩ wa ta a ʋ zie a, bɛ zɛlɩ ʋ na k'ʋʋ tɛw a bɛ zie. A Yeezu tɩ tɛw na maalɩ bibie ayi a be. 41Nɩ-yaga tɩ lɛb'a pʋɔ de a ʋ yele, a ʋl mɩŋa ƴɛ̀rʋ zũú. 42Bɛ tɩ yere nɩ a pɔw zie: «Ƴɛrɛŋa a, fʋ̃ʋ na yel a bɛ cãà n'a so tɩ sàw ɛ. Tɩ mɩ̀ wõ n a ʋ ƴɛ̀rʋ, ɛ́ tɩ bãw na kɛ́ ʋlɛ sɩrɩ n'ɩ a tẽ-daa Faarɛ.»

Tõ-tõ-nɩ-kpɛ̃ɛ kãw bie a Yeezu na sanɩ a

43A Yeezu na tɩ kpɛ a be bibie ayi a, ʋ bɛr'ɩ a be ɛ́ lɛb cen a Galile tẽw. 44Ʋl tɔr za n'ʋ tɩ háa nʋɔr yel kɛ́ naaŋmɩn-ƴɛ̀r-manɛ bɛ nyɛrɛ ƴãwfʋ a ʋ tẽ-dɔwra tɔr za pʋɔ ɩ. 45Ɛcɛ ʋ na wa ta a Galile tẽw a, a be dem tuor'a nyɔw ʋ a sãanʋ vla, bʋ̃ʋ n'ʋ vɛ̃ bɛ mɩ̀ tɩ cen nɩ a Zerizalɛm a cuw, be n'a bɛ tɩ tʋ̃ɔ́ nyɛ̃ a alɩ yele nɛ za a Yeezu na maalɩ a.

46Lɛ n'a a Yeezu tɩ lɛb wa a Kana, Galile tẽw, a be ʋ na tɩ ɩ a kʋ̃ɔ a lɩɛbɩ a divɛ̃ a. Nãà tõ-tõ-nɩ-kpɛ̃ɛ kãw tɩ be n be. A ʋ bidɛb tɩ ɩ n bàal gã a Kafarnawɔm. 47A nɩ-kpɛ̃ɛ ŋa na tɩ wõ kɛ́ a Yeezu yi n a Zude tẽw wa a Galile tẽw a, ʋ wa na wa páw ʋ zɛlɛ ʋ k'ʋʋ wa cen tɩ sanɩ a ʋ bidɛb na ŋmaar vʋʋrʋ a. 48A Yeezu tɩ yel ʋ na: «A ɩ lɛ nyɩmɛ dɛ bɛ nyɛ̃ yele-na-ɩ-bãwfʋ-sãá nɩ yel-bãw-guuri a, nyɩ kʋ̃ sàw de ɩ?» 49A nãà tõ-tõ-nɩ-kpɛ̃ɛ yel ʋ: «Sore e, ta a ɩ̃ yir páw a ɩ̃ bie, ʋʋ bãw kpi!» 50A Yeezu yel ʋ: «Kule, a fʋ bie vʋʋrɛ na.» A nɩ-kpɛ̃ɛ ŋa tɩ sàw na de a Yeezu ƴɛ̀r-bir ŋa ɛ́ lɩɛb kule. 51Ʋ tɩ cãà nɩ a sɔ́r zu, ɛ́ a ʋ tõ-tõ-biir zɔ tuor'ʋ yel ʋ: «A fʋ bie vʋʋrɛ na!» 52Ʋ tɩ sowri bɛ na kɛ́ debor daar'a a tɩ tɛr ʋ a saba. Bɛ sɔw yel ʋ: «Zãa mʋ̃tɔ̃w gɔ̃wfʋ daar'a a ƴã-tʋlʋ bɛr ʋ.» 53A sãà tɩ nyɛ̃ na a ɩ a ʋlɩ tɛm nɛ tɔr za a Yeezu na tɩ yel ʋ a: «A fʋ bie vʋʋrɛ na.» A lɛ n'a ʋlɛ nɩ a ʋ yir dem za tɩ sàw de a Yeezu. 54A yele ayi sob, na ɩ bãwfʋ sãá a, n'ɩ á ŋá a Yeezu na maalɩ, a lɛn daar ʋ na yi a Zude tẽw lɛb wa a Galile tẽw a.

Currently Selected:

Zã 4: DBDC

Highlight

Copy