Zã 5

A Yeezu na sanɩ gbɛr kãw a

1Al pùorí, a Yeezu tɩ do n a Zerizalɛm a Zifʋ mɩnɛ cuw kãw ƴãw. 2A Zerizalɛm a, kʋ̃ɔ-puulu zie kãw be n be pɩɛlɩ a Píir-Dɩdɔr. Bɛ bʋɔlɛ nɩ a zie nɛ kɛ́ Bezata a Zifʋ mɩnɛ kɔkɔr pʋɔ. Bɛ-caar anũu tɩ jil'a koli a kʋ̃ɔ-puulu zie ŋa. 3Bàalbɛ mɩ́ tɩ gbõ n taa gã a bɛ-caar al pʋɔ: zɔn, wʋbr, gbɛɛ. [Bɛ mɩ́ tɩ gã na gù kɛ́ a kʋ̃ɔ wa ɓuule a, bɛ̃ɛ siw a kʋ̃ɔmɩ́. 4Tɛm kãw pʋɔ, Sore malkɩ mɩ́ siw na dam a kʋ̃ɔ a ɓuule, ɛ́ sob nɛ wa de niwn siw a kʋ̃ɔ na ɓuule a pʋɔ a, a ʋ bàalʋ saa ŋmɛ̃ ŋmɩŋmɩn a, a mɩ́ baar'a.] 5Nɩr kãw na tɩ ɩ nɩ-kɔw yome lɩzɛr'ɩ pie nɩ ani n'ɩ à ŋá a, tɩ be n a be. 6A Yeezu na tɩ nyɛ̃ ʋ ʋ gã a, ʋʋ wõ kɛ́ à ŋá n'a ʋ ŋmɛ̃ koro za a, ʋ sowr'ʋ na: «Fʋ bɔbr'a kɛ́ fʋ sanɩ bɩɩ?» 7A nɩ-kɔw nɛ tɩ sɔw ʋ na yel: «Sore e, ɩ̃ bɛ tɛr nɩr ʋ na mɩ́ nyɔw mɛ̃ ƴãw a kʋ̃ɔ pʋɔ a lɛn daar a na mɩ́ ɓuule a ɩ, ɛ́ mãa wa yel kɛ́ a cenu n'a a, kãw mɩ́ de nɩ niwn siw a ɩ̃ ƴãw.» 8A Yeezu yel ʋ: «Ìr, ɓáw a fʋ bʋ̃-gana cere nɩ.» 9Daadaalɛ, a nɩr ʋl tɩ sanɩ na, ɛ́ ɓáw a ʋ bʋ̃-gana cere nɩ. Zɩ̃ kɛ́ a Zifʋ mɩnɛ pɩ̃ɛnʋ-bibir tɩ n'a. 10Lɛ so a Zifʋ mɩnɛ tɩ yel a nɩr ʋl na lɛb kpɛ̃w a: «Pɩ̃ɛnʋ-bibir'ɩ a dɩ̃a, a bɛ tɛr sɔ́r kɛ́ fʋ tuo a fʋ bʋ̃-gana ɩ.» 11Ɛcɛ ʋ tɩ sɔw bɛ na: «A ʋlɩ sob na sanɩ mɛ̃ a, ʋlɛ n'ʋ yel mɛ̃: “Ɓáw a fʋ bʋ̃-gana cere nɩ.”» 12Bɛ tɩ sowr'ʋ na: «Ãa n'ɩ a nɩr ʋl na yel fʋ: “Ɓáw a fʋ bʋ̃-gana cere nɩ a?”» 13Ɛcɛ a sob nɛ na tɩ sanɩ a bɛ tɩ bãw ãa n'ʋ ɛ. Bʋ̃ʋ n'ʋ vɛ̃, a Yeezu tɩ cen na zãá nɩ a zu-sɛbla na tɩ gbõ taa a be a.

14Al pùorí, a Yeezu tɩ wa tuor'ʋ nɩ a Ŋmɩn-yir-kpɛ̃ɛ pʋɔ yel ʋ: «Ƴɛrɛŋa a, fʋ lɛb'a kpɛ̃w, taa lɛb maalɛ yel-bier ɛ, bom na kpɛ faa zuo lɛ a taa wa páwr fʋ ɛ.» 15A nɩr nɛ tɩ cen na tɩ manɩ kʋ̀ a Zifʋ mɩnɛ kɛ́ Yeezu n'ʋ sanɩ ʋ. 16A lɛ n'a a Zifʋ mɩnɛ tɩ tĩ bɛ bɛrɛ a Yeezu ɛ, ʋ na tɩ ɩ à à ŋá a pɩ̃ɛnʋ-bibir a. 17Ɛcɛ a Yeezu tɩ sɔw bɛ na: «Wa tɩ tɔ à ŋá a, a ɩ̃ Sãà be n a tome zu, ɩ̃ɩ mɩ̀ be a tome zu.» 18A na tɩ tĩ a lɛ a n'a a Zifʋ mɩnɛ tɩ bɔbr a ʋ kʋb tuotuo, ʋ na tone a pɩ̃ɛnʋ-bibir sãwnɛ a ciiru a, ɛ́ baa zuo a za ʋ na bʋɔlɛ a Naaŋmɩn ʋ Sãà tɔr za a, a ɩ ʋlɛ nɩ a Naaŋmɩn sɛw taa a.

A Naaŋmɩn Sãà kʋ̀ n bom za fãw a ʋ Bie

19A Yeezu tɩ lɛb'a yel bɛ: «Yel-mɩŋa sɩza sɩza n'a ɩ̃ yere kʋ̀rɛ nyɩ: a Bie kʋ̃ tʋ̃ɔ́ nyɛ̃ ʋ tʋɔra ɩrɛ bom ɛ. Bom nɛ ʋ na nyɛ̃ a Sãà ʋ ɩrɛ a, ʋl yõ n'ʋ ʋ mɩ̀ mɩ́ ɩrɛ. Bom nɛ a Sãà na mɩ́ ɩrɛ a, a Bie mɩ̀ mɩ́ ɩrɛ ʋ nɩ a lɛ tɔr za. 20Bʋ̃ʋ n'ʋ vɛ̃, a Sãà nɔnɛ nɩ a Bie ɛ́ wule ʋ bom za ʋ na ɩrɛ a. A Sãà na wul ʋ nɩ tõ-bɛrɛ zuo lɛ, na na ɓãá nyɩ nʋɔr a. 21Bʋ̃ʋ n'ʋ vɛ̃, mɛ̃ a lɛ a Sãà na mɩ́ ɩ a kũuni bɛ lɛb ìr, ʋʋ ɩrɛ bɛ vʋʋrɛ a, lɛ n'a a Bie mɩ̀ mɩ́ ɩrɛ sob nɛ ʋ na bɔbr a ʋ vʋʋrɛ. 22A Sãà bɛ maalɛ nɩ nɩr ƴɛ̀rʋ ɛ, ʋ de nɩ a ƴɛ̀rʋ-maalʋ fãw za kʋ̀ a Bie, 23kɛ́ nɩbɛ za ƴãwnɛ a Bie, mɛ̃ a lɛ bɛ na ƴãwnɛ a Sãà a. Nɩr bɛ wa ƴãwnɛ a Bie a, ʋ mɩ̀ bɛ ƴãwnɛ a Sãà na tõ a Bie a ɩ.

24Yel-mɩŋa sɩza sɩza n'a ɩ̃ yere kʋ̀rɛ nyɩ: sob nɛ na bɛrɛ wone a ɩ̃ ƴɛ̀rʋ ɛ́ sàw de a ʋlɩ sob na tõ m a, ʋ páw nɩ a nyɔ-vʋʋrʋ na be kʋralɛ a. Bɛ bɛ maalɛ nɩ ʋ ƴɛ̀rʋ ɛ, ʋ yi n a kũu pʋɔ kpɛ a nyɔ-vʋʋrʋ pʋɔ. 25Yel-mɩŋa sɩza sɩza n'a ɩ̃ yere kʋ̀rɛ nyɩ, a daar waar'a, ɛ́ ʋlɛ n'ɩ ŋan ta, a kũuni na na wõ a Naaŋmɩn Bie kɔkɔr a, ɛ́ a bɛlɩ dem na na wõ a ʋ kɔkɔr a, bɛ na vʋʋrɛ na. 26Mɛ̃ a lɛ a Sãà na tɛr a nyɔ-vʋʋrʋ a ʋ pʋɔ a, lɛ n'a ʋ mɩ̀ kʋ̀ a Bie ʋ mɩ̀ tɛr a nyɔ-vʋʋrʋ a ʋ pʋɔ. 27A Sãà kʋ̀ n a Bie a ƴɛ̀rʋ-maalʋ fãw, ʋ na ɩ a Nɩsaal Bie a zũú. 28À á ŋá za, a ta cãà ɩ nɔ-ɓãa-yel a nyɩ zie ɩ. A daar tarɛ na, a bɛlɩ dem za na be a yarʋ pʋɔ a na na wõ a ʋ kɔkɔr, 29ɛ́ yi a bɛ yarʋ pʋɔ a. A bɛlɩ dem na tɩ tu a vla pùor a bɛ nyɔ-vʋʋrʋ pʋɔ a, na lɛb'a yi páw a nyɔ-vʋʋrʋ. Ɛcɛ a bɛlɩ dem na tu a faa pùor a, na lɛb'a yi nyɛ̃ dɔwrʋ. 30Mãa a, ɩ̃ kʋ̃ tʋ̃ɔ́ nyɛ̃ ɩ̃ tʋɔra ɩ bom kãw za ɩ. Ɩ̃ maalɛ nɩ a ƴɛ̀rʋ mɛ̃ a lɛ a Naaŋmɩn na yere kʋ̀rɛ mɛ̃ a, ɛ́ a ɩ̃ ƴɛ̀rʋ-maalʋ tu n yel-mɩnʋ, ɩ̃ na bɛ bɔbr mãa mɩŋa pʋ-tɩɛrʋ maalʋ, ɛ́ bɔbr a sob nɛ na tõ m a pʋ-tɩɛrʋ maalʋ a.»

A bɛlɩ dem na dɩ a Yeezu dãsɩɛ a

31«Mãa tɩ lɛb ŋmɛlɩ dɩrɛ a ɩ̃ dãsɩɛ a, a ɩ̃ dãsɩɛ kʋ̃ʋ tɛr pɛr ɛ. 32Ɛcɛ nɩ-yũo n'ʋ dɩrɛ a ɩ̃ dãsɩɛ, ɩ̃ɩ bãwnɩ a na, a ʋ dãsɩɛ tu n yel-mɩŋa. 33Nyɩ tõ n nɩbɛ a Zã zie, ʋ́ʋ̀ tɩ dɩ a yel-mɩŋa dãsɩɛ. 34Mãa a, ɩ̃ bɛ tɛr nɩsaal dãsɩɛ yel-ɩra ɩ, ɛcɛ ɩ̃ ƴɛ̀rɛ nɩ à à ŋá kɛ́ nyɩ tʋ̃ɔ́ nyɛ̃ a faafʋ. 35A Zã tɩ ɩ na mɛ̃ fɩ̃tɩlɛ bɛ na mɩ́ tɔ̃w ʋ caalɛ a: ɛ́ nyɩ sàw a cãà ŋa caalɩ nyɩ blã, ɛ́ a tɩ ɩ nyɩ nʋ̃ɔ̀. 36Ɛcɛ ɩ̃ tɛr'ɩ dãsɩɛ na zuo a Zã dãsɩɛ a: alɛ n'ɩ a tome a Sãà na kʋ̀ m k'ɩ̃ɩ tõ a. Ɩ̃ tone nɩ a tome á ŋá, ɛ́ alɛ n'a dɩrɛ a ɩ̃ dãsɩɛ kɛ́ a Sãà tõ m a. 37A Sãà na tõ m a, ʋl mɩŋa n'ʋ dɩ a ɩ̃ dãsɩɛ. Ɛcɛ nyɩ bɛ dãw wõ a ʋ kɔkɔr ɛ, ɛ́ bɛ dãw nyɛ̃ a ʋ niwn ɛ, 38ɛ́ a ʋ ƴɛ̀rʋ bɛ kpɩɛr a nyɩ pʋɔ ɩ, nyɩ na bɛ sàw de a ʋlɩ sob nɛ ʋ na tõ a ƴãw. 39Nyɩ ƴãw nɩ fãw vuole a Sɛb-son pʋɔ, nyɩ na tɩɛrɛ kɛ́ be n'a nyɩ na páw a nyɔ-vʋʋrʋ na be kʋralɛ a, ɛ́ alɛ n'a dɩrɛ a ɩ̃ dãsɩɛ. 40Ɛ́ nyɩ bɛ bɔbr kɛ́ nyɩ wa a ɩ̃ zie wa páw a nyɔ-vʋʋrʋ na be kʋralɛ a ɩ.

41Nɩsaalbɛ zie bɛ n'a ɩ̃ bɔbr a danʋ ɛ. 42Ɛcɛ ɩ̃ bãw nyɩ na, a Naaŋmɩn nɔ̃wfʋ bɛ be a nyɩ zie ɩ. 43Ɩ̃ wa n a ɩ̃ Sãà yúor ƴãw, ɛ́ nyɩ bɛ wa de m ɛ. Ɛcɛ nɩ-yũo wa wa ʋ tʋɔra yúor ƴãw a, nyɩ na sàw na de ʋ! 44Nyɩ zɛwr'ɩ taa yée, ɛ́ bɛ bɔbr a yúor ʋl na yi Naaŋmɩn yõ zie a ɩ, ŋmɩŋmɩn n'a nyɩ na tʋ̃ɔ́ sàw de ʋ? 45Nyɩ taa tɩɛrɛ kɛ́ mãa n'ʋ na yel a nyɩ sãwna a ɩ̃ Sãà niŋé ɩ: Moyiir'ʋ, ʋl ƴãw nyɩ na ƴãw a nyɩ tɩɛrʋ a, ʋlɛ n'ʋ na yel a nyɩ sãwna. 46Bʋ̃ʋ n'ʋ vɛ̃, mãa yele n'a a Moyiir sɛb, lɛ so, nyɩmɛ tɩ sàw de a Moyiir a, nyɩ mɩ̀ nãá sàw na de m. 47Ɛcɛ nyɩ na bɛ sàw de a lɛ a Moyiir na sɛb a, ŋmɩŋmɩn n'a nyɩ pãa na sàw de a ɩ̃ ƴɛ̀rʋ?»

Currently Selected:

Zã 5: DBDC

Highlight

Copy